ބްރޯޑްކާސްޓިން ކޮމިޝަނުގެ ރައީސް މުހައްމަދު ޝަހީބު އަދި ނައިބު ރައީސް ފާތިމަތު ޒައިނާ ކޮމިޝަނުން ވަކިކުރަން ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއިން ނިންމި ރިޕޯޓު މަޖިލީހުގެ ރައީސް، ރައީސް މުހައްމަދު ނަޝީދުގެ މޭޒުކޮޅުގައި އޮންނަތާ މަހެއް ވުމާ ގާތްވެއްޖެ އެވެ.
ޝަހީބާއި ޒައިނާ ވަކިކުރަން މިނިވަން މުއައްސަސާތަކާ ބެހޭ ކޮމިޓީއިން ނިންމީ ޖުލައި މަހުގެ 24 ވަނަ ދުވަހު އެވެ. އެ މައްސަލަ ކޮމިޓީއިން ނިންމައި ރިޕޯޓު މަޖިލީހުގެ ރައީސަށް ފޮނުވާފައިވާކަން މިނިވަން މުއައްސަސާތަކާއި ބެހޭ ކޮމިޓީގެ މުގައްރިރު އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ކަށަވަރުކޮށްދެއްވި އެވެ.
ނަމަވެސް މިހާތަނަށް އެމައްސަލަ އެޖެންޑާ ކޮށްފައެއް ނުވެ އެވެ. އެމައްސަލަ ފޮނުވި ފަހުން ގަވައިދު ބުނާ ގޮތަށް މަޖިލީހުގެ ޖަލްސާތައް ދަނީ ބާއްވަމުންނެވެ. ނަަމަވެސް އެމައްސަލަ އެޖެންޑާ ނުކޮށް ލަސްވަނީ ކީއްވެ ކަމެއް ސާފުވާ ގޮތެއްނުވެ އެވެ. މަޖިލިސް ޖަލްސާއަށް ކަންކަން އެޖެންޑާކުރުމުގެ ބާރު އޮންނަނީ މަޖިލީހުގެ ރައީސްއަށެވެ.
މިނިވަން މުއައްސަސާ ތަކާ ބެހޭ ކޮމިޓީއިން ޝަހީބާއި ޒައިނާ ވަކިކުރަން ނިންމީ އެ ކޮމިޓީގެ ހުރިހާ މެމްބަރުންގެ އިއްތިފާގުންނެވެ.
ބްރޯޑްކާސްޓް ގާނޫނުގެ 12 ވަނަ މާއްދާގެ (ށ) ގައި ބުނެފައިވަނީ ބްރޯޑްކާސްޓިންގް ކޮމިޝަނުގެ މެމްބަރަކު މަގާމުން ވަކިކުރުމަށް ރައްޔިތުންގެ މަޖިލީހުން ފާސްކުރުމުން އޭނާ މަގާމުން ވަކިވާނެ ކަމަށެވެ. އަދި ވަކި ކުރުމުގެ ކުރިން އޭނާ ދިފާއުގައި ވާހަކަ ދެއްކުމުގެ ފުރުސަތު ދޭން ވާނެ ކަމަށް ބްރޯޑް ކާސްޓް ގާނޫނުގެ 12 ވަނަ މާއްދާގެ (ނ) ގައި ވަނީ ބުނެފަ އެވެ. ބްރޯޑްކޮމްގެ މެމްބަރުން ވަކިކުރުމުގެ ކުރިން ޖަވާބުދާރީވާން ވަކި މުއްދަތަކަށް ނޯޓިސް ދޭން ޖެހޭނެ ކަމަށް ގާނޫނުގައި ބުނެފައެއް ނުވެ އެވެ.
ޝަހީބު ވަކިކުރަން ނިންމި ސަބަބުތައް
- ކޮމިޝަންގެ ރައީސް ޝަހީބު ގާނޫނާ ހިލާފަށް މައްސަލަތައް ކޮމިޝަންގެ ބައްދަލުވުންތަކުގައި އެޖެންޑާކުރުން.
- ގާނޫނު އަސާސީއާއި ގާނޫނު ކަށަވަރުވެފައިވާ އަސާސީ ހައްގުތައް ނިގުޅައިގަނެވޭ ގޮތަށް ކޮމިޝަންގެ ނިންމުންތައް ނިންމެވުމުގެ ފުރުސަތު ޝަހީބު ދެއްވި ކަން ހާމަވުން.
- ކޮމިޝަންގެ ކުރީގެ ނައިބު ރައީސް އިސްމާއިލް ސޮފްވާން މުސާރަ ނަންގަވައިގެން ރަސްމީ މަސައްކަތަށް ނުނުކުންވާތާ އެތަށް ދުވަސްވީއިރުވެސް، ކޮމިޝަންގެ މެމްބަރުންގެ ފަރާތުން އެކަން ކޮމިޝަންގެ ރައީސްގެ ސަމާލުކަމަށް ގެނައުމުންވެސް، ކޮމިޝަންގެ މެމްބަރުކަމުން ސޮފްވާން އިސްތިއުފާ ދެއްވުމާ ހަމައަށް ނައިބު ރައީސަށް ދޭ އެލެވަންސް އޭނާއަށް ދެއްވަމުން ގެންދިޔަކަން.
ޒައިނާ ވަކިކުރަން ނިންމި ސަބަބުތައް
- ކޮމިޝަންގެ ނައިބު ރައީސް ޒައިނާ އިންސާފުންވެރިކަމާއި ހަމަހަމަކަމުގެ އުސޫލުތަކާ ހިލާފަށް ވަކި ފަރާތަކަށް ބުރަވެ ކޮމިޝަނަށް މައްސަލަ ހުށަހެޅުން.
- ކޮމިޝަންގެ ނައިބު ރައީސް ޒައިނާ ސިޔާސީ ހަރަކާތެއްގައި ބައިވެރިވުމަކީ އޭނާގެ މުސްތަގިއްލުކަމާ މެދު ސުވާލު އުފެދޭ ކެމެއްކަން.
ބްރޯޑް ކާސްޓިންގް ކޮމިޝަނުގެ އެހެން މެމްބަރުންގެ މައްސަލަ މިނިވަން މުއައްސަސާތަކުގެ ކޮމިޓީއިން އަދިވެސް ދަނީ ބަލަމުންނެވެ. އެ މެމްބަރުންނާ މެދު ގޮތް ނިންމާނީ އެ މެމްބަރުންނާ އިންޓަވިއު ކުރުމަށް ފަހު ކަމަށް ކޮމިޓީގެ މުގައްރިރު ވަނީ ވިދާޅުވެފަ އެވެ.
އެ ކޮމިޓީއިން މައްސަލަ ބަލަން ފެށުމުން، ބްރޯޑްކޮމްގެ ނައިބު ރައީސްއަކަށް ހުންނެވި، އިސްމާއިލް ސޮފްވާން އަދި ކޮމިޝަންގެ މެންބަރު ހަސަން ނަބާހު ވަނީ އަމިއްލައަށް ކޮމިޝަނުން އިސްތިއުފާދީފަ އެވެ. އެ ހުސްވި މަގާމަށް ކުރިމަތިލާން ވެސް ވަނީ ހުޅުވާލައިފަ އެވެ.
މިފަހުން ރައީސް ނަޝީދު ވަނީ މަޖިލީހުން މިނިވަން މުއައްސަސާތަކާއި މަގާމުތަކަށް ބޭފުޅުން އައްޔަން ކުރުމާއި ވަކިކުރުމާ ގުޅޭ ގޮތުން ހާއްސަ ކޮމިޓީއެއް އުފެއްދުމަށް ހުށަހަޅުއްވައިފަ އެވެ. އެހެން ނަމަވެސް އެމްޑީޕީގެ ޕީޖީ ގްރޫޕްގައި އެކަމަށް ތާއީދެއް ނުލިބުނެވެ.