ޕާސްޕޯޓު ހިފަހައްޓާފައި ވަނިކޮށް ފިއްލަވަން މަސައްކަތް ކުރި ކުރީގެ ނައިބު ރައީސް އަހްމަދު އަދީބު އަބްދުލް ގަފޫރު އަނެއްކާ ވެސް ހައްޔަރުކޮށް ދޫނިދޫއަށް ގެންގޮސްފި އެވެ.
އަދީބު އިންޑިިއާއިން އަނބުރާ މާލެ ގެނެސް ރޭ ކުރިމިނަލް ކޯޓަށް ހާޒިރުކުރުމުން އެ ކޯޓުން ވަނީ އޭނާ ހައްޔަރުކޮށްފައިވަނީ ގަނޫނާ ހިލާފަށް ކަނޑައަޅާ އޭނާ ބަންދުކުރެވެން ނެތް ކަމަށް އަމުރުކޮށްފަ އެވެ.
ނަމަވެސް އަނެއްކާވެސް ފުލުހުން ވަނީ މިއަދު ހެނދުނު 6:37 އެހާކަށްހާއިރު އަދީބު ހައްުޔަރުކޮށްފަ އެވެ. އަދީބު ހައްޔަރުކޮށްފައި ވަނީ ކޯޓު އަމުރަކާއެކު ކަމެއް އަދި ސާފެއް ނޫނެވެ.
ރޭ ބޭއްވި ބަންދުގެ އަޑުއެހުމުގައި ފުލުހުން ބުނެފައިވަނީ، އަދީބު އަނެއްްކާވެސް ހައްޔަރު ކުރުމުގެ އަމުރަކަށް އެދޭނެ ކަމަށެވެ. ނަމަވެސް އެ އަމުރު ނެރެދިން ކަމެއް އަދި ކަށަވަރެއް ނޫނެވެ.
ފުލުހުންގެ އިދާރާ ކައިރީގައި ހުރި "ސަން"ގެ ނޫސްވެރިޔާ ބުނީ އަދީބު ހައްޔަރުކުރުމަށް ފަހު މިހާރު ދޫނިދޫއަށް ގެންގޮސްފައިވާ ކަމަށެވެ.
މިކަމާ ގުޅޭ ގޮތުން ފުލުހުންގެ ރަސްމީ ބަހެއް އަދި ވަނީ ލިބޭ ގޮތް ނުވެފަ އެވެ.
ރާއްޖޭގެ ކޯޓުން ނެރޭ ހުކުމްތައް ބައިނަލް އަގުވާމީ ކަނޑުގެ ސަރަހއްދުގައި ތަންފީޒު ނުކުރެވޭނެ ކަމަށް ދިފާއީ ވަކީލު ފާހަގަ ކުރެއްވި އެވެ. އަދި އަދީބު ހައްޔަރުކޮށްފައި ވަނީ ބައިނަލްއަގުވާމީ ގާނޫނުތަކާއި މުއާހަދާތަކާ ހިލާފަށް ކަމަށް ދައުލަތުގެ ގާނޫނީ ވަކީލާ ވެސް އިއުތިރާފު ވެފަ އެވެ.
މައްސަލަ ބައްލަވާ ގާޒީ އަލީ ރަޝީދު ވިދާޅުވީ، ބައިނަލްއަގުވާމީ ގާނޫނުތަކުގެ މަތިން އެގޮތައް ކަނޑުގެ ސަރަހައްދުން ބޭރުން ހައްޔަރު ކުރެވޭނީ އެންމެ ހާލަތެއްގައި ކަމަށެވެ. އެއީ ސަލާމަތީ ބާރުތަކުން ހައްޔަރު ކުރާ މީހާ ހުރީ ދިވެހި ދިދަ ޖެހި، ރާއްޖޭގެ ރަޖިސްޓްރީ އޮތް އުޅަނދަކަށް ވާ ނަމަ ކަމަށް ގަޒީ ވިދާޅުވި އެވެ.
އަދީބު ހައްޔަރު ކުރި އިރު ޓަގު ބޯޓުގައި ހުރި ކޮން ގައުމެއްގެ ދިދައެއްތޯ އަދި އެއީ ރާއްޖޭގެ އުޅަނދެއްތޯ ސުވާލު ކުރުމުން އައިއޯ ވިދާޅުވީ، އެ އުޅަނދުގައި ހުރީ އިންޑިއާގެ ދިދައެއް ކަމަށާއި އެ އުޅަނދަކީ ރާއްޖޭގެ އުޅަނދެއް ނޫން ކަމަށެވެ.
މައްސަލަ ބައްލަވާ ގަޒީ ނިންމެވީ އަދީބު ހައްޔަރު ކޮށްފައި ވަނީ ގަނޫނާ ހިލާފަށް ކަނޑައަޅާ އޭނާ ބަންދު ކުރުމުގެ އަމުރު ނެރެން ނުފެންނަ ކަމަށެވެ.
ގާޒީ އަލީ ރަޝީދު ވިދާޅުވީ، މީހަކު ބަންދު ކުރަން އަމުރެއް ނެރޭ އިރު، އެންމެ އަސާސީ އެއް ކަމަކީ އޭނާ ހައްޔަރުކުރި ގޮތް ކަމަށެވެ. ހައްޔަރުކުރުން ގޯސް ނަމަ ދެން އެއާ ގުޅިގެން އެހެން އިޖުރާއަތްތަކެއް ނުހިނގާނެ ކަމަށް އަލީ ރަޝިދު ވިދާޅުވި އެވެ.
ޓަގް ބޯޓެއްގައި ފިލައިގެން ދިއުމުން އިންޑިއާގެ ސަލާމަތީ ބާރުތަކުން އޭނާ ހިފަހައްޓާފައި ވަނީ އިންޑިއާގެ ޓުޓިކޮރިން ބަނދަރު ކައިރިން މިދިޔަ ބުރާސްފަތި ދުވަހު އެވެ. ނެވެ. އެއަށް ފަހު ދިވެހި ފުލުހުންނާ އޭނާ ހަވާލު ކުރީ ހޮނިހިރު ދުވަހުގެ ހަވީރު އެވެ.
އަދީބު ފިލި މައްސަލާގައި ހެއްކާ ގަރީނާ ހޯދުމަށް ފުލުހުން ވަނީ މިދިޔަ ހޮނިހިރު ދުވަހުގެ ރޭ އޭނާގެ ދިރިއުޅުއްވާ އެޕާޓްމަންޓު ވެސް ކޯޓު އަމުރެއްގެ ދަށުން ބަލައި ފާސްކޮށްފަ އެވެ.
އެކި އެކި ކުށްތަކުގައި އަދީބުގެ މައްޗަށް 33 އަހަރުގެ ޖަލު ހުކުމްތަކެއް އައެވެ. ނަމަވެސް ފަހުން ކޯޓުތަކުން އެ ހުކުމްތައް ވަނީ ބާތިލްކޮށްފަ އެވެ.
މިހާރު ކޯޓުގައި އޮތީ އަދީބާ ގުޅޭ އެންމެ މައްސަލައެކެވެ. އެއީ ޅ. މާބިންހުރާގައި ޓޫރިސްޓް ރިސޯޓެއް ތަރައްގީ ކުރުމަށް ކުއްޔަށްދިން ކުރެއްދޫ ހޯލްޑިންގްސްއިން އެމްއެމްޕީއާރްސީއަށް ދިން އެއް މިލިއަން ޑޮލަރަށް ހިޔާނާތްތެރިވި މައްސަލައިގައި އަދީބަށް އިއްވި އަށް އަހަރުގެ ޖަލު ހުކުމް ބާތިލު ކުރި މައްސަލަ ދައުލަތުން އިސްތިއުނާފު ކުރި މައްސަލައެއެވެ. އެ މައްސަލަ އޮތީ ސުޕްރީމް ކޯޓުގައެވެ. އިސްތިއުނާފީ މައްސަލާގައި ގޮތެއް ކަނޑައަޅަން ދެން ޖޫން، 24 ވަނަ ދުވަހު ސުޕްރީމް ކޯޓުން އޭނާގެ ޕާސްޕޯޓު ހިފެހެއްޓި އެވެ.