އިންޑިއަން އޯޝަން އައިލެންޑް ގޭމްސް 2023 ގައި ރާއްޖޭގައި ބޭއްވުމަށް ހުށަހެޅި ބިޑް ކާމިޔާބްކޮށް އެ ފުރުސަތު ރާއްޖެ އަށް ލިބިއްޖެ އެވެ. އެކަން ރައީސް ސޯލިހު ދެންމެ ވަނީ ކުރެއްވި ޓްވީޓެއްގައި އިއުލާން ކުރައްވައިފަ އެވެ.
ރާއްޖެއިން ހުށަހެޅި ބިޑު ކާމިޔާބުވިކަން އިއުލާން ކޮށްދެއްވީ ރައިސުލްޖުމްހޫރިއްޔާ އިބްރާހިމް މުހައްމަދު ސޯލިހުއެވެ. އެކަން އިއުލާން ކޮށްދެއްވަމުން ރައީސް ކުރެއްވި ޓްވީޓްގައި ވިދާޅުވީ، 2023 ގައި އޮންނަ 11 ވަނަ އައިއޯއައިޖީ ގޭމްސް ބޭއްވުމުގެ ފުރުސަތު ރާއްޖެއަށް ރަސްމީކޮށް ލިބިއްޖެ ކަމަށެވެ.
މީގެ ކުރިން ބޭއްވި އައިއޯއައިޖީ 10 މުބާރާތުގައިވެސް ރާއްޖެއިން ބައިވެރިވިކަން ފާހަގަކޮށް ރައީސް ވިދާޅުވީ، ރާއްޖޭގައި ބާއްވާ ގޭމްސްގައި ބައިވެރިވާ ގައުމުތަކަށް ވެސް ރަނގަޅު މެހެމާންދާރީއެއް ދެއްވާނެ ކަމަށެވެ.
މިއަހަރުގެ އައިއޯއައިޖީ ބާއްވަމުން އަންނަ މޮރީޝަސްގެ އިންޓަކޮންޓިނެންޓަލް ހޮޓަލްގައި މިދިޔަ ހަފްތާގެ ހޮނިހިރު ދުވަހު ހެނދުނު ބޭއްވި ބިޑު ހުށަހެޅުމުގެ ހަފްލާގައި މި މުބާރާތް 2023 ވަނަ އަހަރު ބޭއްވުމަށް ރާއްޖެއިން ބިޑު ހުށައެޅި އިރު މަޑަގަސްކާ އަދި ކޮމޮރޮސްއިންވެސް ވަނީ ރަސްމީކޮށް ބިޑު ހުށަހެޅިއެވެ. ރާއްޖޭގެ ފަރާތުން ބިޑު ހުށަހަޅުއްވައި ދެއްވީ ކުޅިވަރާ ބެހޭ ވަޒީރު އަހުމަދު މަހުލޫފްއެވެ.
ރާއްޖޭގައި އިންޑިއަން އޯޝަން އައިލެންޑް ގޭމްސް ބޭއްވުމަކީ ރައީސް އިބްރާހިމް މުހައްމަދު ސޯލިހުގެ ސަރުކާރުން ބޮޑު އިސްކަމެއް ދެއްވައިގެން ކުރި ކަމެކެވެ. އެގޮތުން ރައީސްގެ ހާއްސަ މަންދޫބުންގެ ގޮތުގައި މިނިސްޓަރު މަހުލޫފް އަދި ފޮރިން މިނިސްޓަރު އަބްދުﷲ ޝާހިދު ވަނީ ގޭމްސްގައި ވާދަކުރާ ހަތަރު ގައުމަކަށް ދާދި ފަހުން ވަޑައިގެން އެ ގައުމުތަކުގެ ރައީސުންނާއި ސަރުކާރުގެ އިސްފަރާތްތަކާ ބައްދަލުކޮށް އެގައުމުތަކުގެ ކުޅިވަރުގެ ހާލަތުވެސް ދެނެގެންފައެވެ.
މި ދަތުރުފުޅުގައި އެ ދެ ބޭފުޅުން ވަޑައިގެންފައި ވަނީ ސީޝެލްސްއަށާއި މަޑަގަސްކާ އަދި މޮރިޝަސްގެ އިތުރުން ކޮމޮރޮސްއަށެވެ. އަދި އެ ގައުމުތަކަށް ވަޑައިގެން ރައީސް އިބްރާހިމް ސޯލިހުގެ ހާއްސަ ސިޓީފުޅެއްވެސް ވަނީ ކޮންމެ ގައުމެއްގެ ރައީސަށް އަރުވައިފައެވެ.
ރާއްޖޭގެ ބިޑު ހުށަހަޅުއްވަމުން މިނިސްޓަރު މަހުލޫފް ވިދާޅުވީ މި މުބާރާތަކީ ދިވެހިންގެ ހިތްތަކާ ގުޅިލާމެހިފައިވާ މުބާރާތެއް ކަމަށެވެ. އެގޮތުން އައިއޯއައިޖީއަކީ ރާއްޖެއިން އެންމެ ފުރަތަމަ ބައިވެރިވި ބައިނަލްއަގްވާމީ ކުޅިވަރު މުބާރާތްކަމާއި، ރާއްޖެއިން ބައިނަލްއަގްވާމީ ފުޓުބޯޅައިގައި ޖެހި ފުރަތަމަ ގޯލު ޖެހީ މި މުބާރާތުގައިކަން މިނިސްޓަރު ފާހަގަކުރެއްވިއެވެ.
މީގެ އިތުރުން ކަނޑު ހުރަސްކޮށް މި މުބާރާތުގައި ބައިވެރިވުމަށް ރާއްޖެއިން މި ސަރަހައްދުގެ އެހެން ގައުމުތަކަށް ދަތުރުކުރާތާ 40 އަހަރުވީ ކަމަށާއި އަދި އެންމެ ފަހަރަކުވެސް މުބާރާތުގައި ބައިވެރިނުވެ ދޫކޮށްލާފައިނުވާނެ ކަމަށް މަހުލޫފް ވަނީ ވިދާޅުވެފައެވެ. އަދި އެކަންކަން ފާހަގަކުރައްވައި މިއީ ރާއްޖެއަށް މުބާރާތް ބޭއްވުމުގެ ފުރުސަތު ދޭންވީ ފަހަރުކަމަށްވެސް މިނިސްޓަރު ވިދާޅުވިއެވެ.
ރާއްޖެއިން 2023 ވަނަ އަހަރުގެ އައިއޯއައިޖީއަށް ބިޑު ކުރަން ނިންމުމާ ގުޅިގެން އައިއޯއައިޖީގެ ޑެލިގޭޝަން ޓީމެއް ވެސް ދާދި ފަހުން ވަނީ ރާއްޖެ ވަޑައިގަތް ހާލަތު ބަލައިފައެވެ.