ރަހްމަތްތެރި ދައުލަތްތަކާ ގުޅޭ މަސަލަތަކެއް ހިމެނޭތީ، ގަވައިދާ ހިލާފަށް އުޅޭ ބިދޭސީންގެ މައްސަލަ ބަލާ ރައްޔިތުންގެ މަޖިލީހުގެ ގައުމީ ސަލާމަތާއި ހާރިޖީ ގުޅުންތަކާ ބެހޭ ކޮމިޓީގެ ބައްދަލުވުން މިއަދުވެސް ސިއްރު ކޮށްފި އެވެ.
މި މައްސަލައާ ގުޅިގެން ކޮމިޓީން މިދިޔަ ހަފްތާގައި ބޭއްވި ބައްދަލުވުންވެސް ފެށީ ނޫސްވެރިން ނުވައްދައި، ސިއްރުކޮށްގެނެވެ.
މިއަދު ކޮމިޓީ ފެށި އިރު، ނޫސްވެރިން ވެއްދިނަމަވެސް، ކޮމިޓީގެ މުގައްރިރު، މަރަދޫ ދާއިރާ މެމްބަރު އިބްރާހިމް ޝަރީފު ވިދާޅުވީ، ކޮމިޓީގެ މެމްބަރުން އިއުތިރާޒެއް ނެތް ނަމަ މިއަދުގެ ބައްދަލުވުންވެސް ސިއްރުކޮށްގެން ކުރިއަށް ގެންދިޔުމަށެވެ.
"ބޭރުގެ ރަހްމަތްތެރި ދައުލަތްތަކުގެ މައްސަލަތަކާ އަދި މިނޫންވެސް ކަންކަން [ކަމާ ބެހޭ އިދާރާތަކުން] ކޮމިޓީއަށް ދެއްވަން ޖެހޭތީވެ، މިހާރު ބަލަމުން މިދާ މައްސަލައިގެ ބާވަތުން،" ކޮމިޓީ ސިއްރު ކުރާ ސަބަބު ހާމަ ކުރައްވާ ކޮމިޓީގެ މުގައްރިރު ޝަރީފު ވިދާޅުވި އެވެ.
ކޮމިޓީގެ މިއަދުގެ ބައްދަލުވުމުގައި އެޖެންޑާ ކޮށްފައިވަނީ، ގަވައިދާ ހިލާފާ މަސައްކަތް ކުރަމުންދާ ބިދޭސީންނާ ގުޅޭ ގޮތުން ތިން މުއަސަސާއެއްގެ އިސްވެރިންނާ ބައްދަލުކުރެއްވުމަށެވެ. އެގޮތުން ހޯމް މިނިސްޓްރީ، އިކޮނޮމިކް މިނިސްޓްރީ އަދި އިމްގްރޭޝަންގެ އިސްވެރިން ހިމެނެއެވެ.
ގަވައިދާ ހިލާފަށް އުޅޭ ބިދޭސީންގެ މައްސަލަ ހައްލުކޮށް ދިނުމަށް އެދި، 2،000 މީހުންގެ ސޮޔާއެކު އަމިއްލަ ފަރާތަކުން މަޖިލީހަށް ޕެޓިޝަނެއް މިދިޔަ މަހު ހުށަހަޅި އެވެ. ނަމަވެސް އެ ޕެޓިޝަންގައި ހުންނަން ޖެހޭ ޝަރުތުތަކެއް ފުރިހަމަ ނުވާ ކަމަށް ބުނެ، އެ ކަންކަން ފުރިހަމަ ކުރުމަށް ފަހު، އަލުން ފޮނުވަން މަޖިލީހުގެ ޕެޓިޝަނާ ބެޖޭ ކޮމިޓީން ވަނީ ހުށަހެޅި ފަރާތަށް އެންގި އެވެ.
ނަވާރަނަ ވަަނަ މަޖިލީހަށް ހުށަހެޅި ފުރަތަމަ އެ ޕެޓިޝަނަގައި ބުނެފައިވަނީ، ރާއްޖޭގައި ގަވައިދާ ހިލާފަށް އުޅޭ ބިދޭސީންގެ މައްސަލަ އަކީ ގައުމީ ސަލާމަތަށް ނުރައްކަލަކަށް ވެފައިވާ މައްސަލައެއް ކަމަށެވެ. އެގޮތުން އެ މައްސަލަ ހައްލުކޮށް ދިވެހިންނަށް ވަޒީފާގެ ބާޒާރުގައި ފުރުސަތުތައް އިތުރުކޮށް ދިނުމަށް ޕެޓިޝަންގައި އެދިފައިވެއެވެ. އަދި އެކަން ހައްލު ކުރުމަށް ވުޒާރާއެއް އުފައްދަން ވެސް ޕެޓިޝަންގައި އެދިފައިވެ އެވެ.
ފުރިހަމަ ކުރަން ޖެހޭ ކަންތައް ފުރިހަމަ ކުރުމަށްފަހު، އަލުން އެ މައްސަލަ މަޖިލީހަށް ހުށަހެޅި ކަމަށް ޔަގީނެއް ނޫނެވެ.
ރާއްޖޭގައި ގަވާއިދާ ހިލާފަށް ބިދޭސީން އުޅޭ މައްސަލައަކީ ބޮޑު މައްސަލައެކެވެ. ރާއްޖޭގައި ވަޒީފާ އަދާކުރާ ބިދޭސީންގެ އަދަދު 200،000 އަށް އަރާނެ ކަމަށް އިމިގްރޭޝަނުން މީގެ ކުރިން ވަނީ ބުނެފަ އެވެ. އޭގެ ތެރެއިން ގިނަ މީހުންނަކީ ގަވައިދާ ހިލާފަށް އުޅޭ މީހުންނެވެ.