ރާއްޖޭގެ ކޮލެޖެއް ކަމަށްވާ މައި ކޮލެޖުގެ ޗެއާމަން އަހުމަދު މުއްތަކީ ލިޔުއްވި "ދަ ފައިވް އިޔާ މިލިއަނާ ޕްލޭން" ފޮތް ނެރެފިއެވެ.
އިއްޔެ ހޮޓެލް ޖެންގައި ބޭއްވި ހާއްސަ ރަސްމިއްޔާތެއްގައި އެ ފޮތް ނެރެދެއްވީ ހަޔާ އެޑިއުކޭޝަން މިނިސްޓްރީގެ ސްޓޭޓް މިނިސްޓަރު މުހައްމަދު ހާޝިމެވެ.
އެ ފޮތުގައި ފަސް އަހަރުގެ ތެރޭގައި މިލިއަނަރަކަށް ވުމަށް ކުރަން ޖެހޭ މަސައްކަތްތަކާއި އަދި ފޮތުގެ މުސައްނިފް އަހްމަދު މުއްތަކީ އޭނާގެ ހަޔާތުގައި ކާމިޔާބު ވިޔަފާރިވެރިއަކަށް ވުމަށް ކުރި ތަޖުރިބާގެ ވާހަކަ ކިޔައިދީފައިވެއެވެ.
ޖުމްލަ 97 ސަފުހާގެ މައްޗަށް އެކުލެވޭ އެ ފޮތް މައި ކޮލެޖުންނާއި އަދި އެމެޒެއިންވެސް ލިބޭނެ ކަމަށް މުއްތަކީ ވިދާޅުވިއެވެ
މައި ކޮލެޖުގެ ޗެއާމަން އެންމެ ފުރަތަމަ އުޅުއްވީ ކުކުޅުގެ ވިޔަފާރީގައެވެ. މައި ކޮލެޖު ހިންގަން ފެށި ފަހުން އޭނާގެ ވިޔަފާރި ފުޅާވެ މިއަދު އެ ކޮލެޖުގެ 19 ގޮފި ރާއްޖޭގެ އެކި ކަންކޮޅުތަކުގެ ހުރެއެވެ.
އެ ފޮތް ލިޔަން ފެށުނުގޮތާ ބެހޭގޮތުން މުއްތަކީ ވިދާޅުވީ އެ ފޮތް ލިޔަން ހިޔާލުއައީ ސެމިނާއެއްގައި އޭނާ ދެއްކިވާހަކައެއްގެ ތެރެއިން ކަމަށެވެ.
"އެ ސެމިނާގައި އަޅުގަނޑު ކިޔަައިދިން އަޅުގަނޑުގެ ހަޔާތުގެ ވާހަކަ. ކުޑަކުޑަ ވިސްނުމަކުންވެސް މިލިއަނަރަކށް ވެވިދާނެގޮތުގެ. އެންމެ ފަސް އަހަރު ތެރޭވެސް. ދެން އެ ސެމިނާގައި އަޅުގަނޑުގެ ކައިރިއަށް އައި މީހަކު. އަޅުގަނޑު އޭނާއަށް ކިޔައިދިނިން އިތުރަށް. ދެން އޭނަ އަޅުގަނޑު ކައިރީގައި ބުނީ ފޮތެއް ލިޔަންވީހެއް ނޫނޭ،" މުއްތަކީ ވިދާޅުވިއެވެ.