އެމްއައި ކޮލެޖުގެ 17 ވަނަ އަހަރީ ދުވަހާ ދިމާކޮށް ޖުމްލަ 85 ސްކޮލާޝިޕަކަށް ކުރިމަތިލުމުގެ ފުރުސަތު މިއަދު ހުޅުވާލައިފިއެވެ.
އެމްއައި ކޮލެޖުގައި ބޭއްވި ހާއްސަ ހަފުލާއެއްގައި މި ސްކޮލާޝިޕްތަކާ ބެހޭ މައުލޫމާތު ނޫސްވެރިންނަށް ދެއްވަމުން އެމްއައި ކޮލެޖުގެ ރެކްޓާ، ލަމްޔާ އަބްދުލް ހާދީ ވިދާޅުވީ އެމް އައި ކޮލެޖުން މި ފަހަރު ހުޅުވާލި 85 ސްކޮލާޝިޕްގެ ތެރެއިން ފަސް ސްކޮލާޝިޕަކީ ގައުމީ ޓީމުގެ ކުޅުންތެރިންނަށް ޚާއްސަ ސްކޮލާޝިޕްތައް ކަމަށެވެ.
އެގޮތުން ޤައުމީ ޓީމުގައި އުޅޭ ކޮންމެ ކުޅިވަރެއް ކުޅޭ ކުޅުންތެރިޔަކަށް ވެސް މި ސްކޮލާޝިޕްތަކުގައި ބައިވެރެިވެވޭއިރު، މި ސްކޮލާޝިޕްތައް ޚާއްސަކުރެވިފައި ވަނީ "ގައުމަށްޓަކައި" މި ނަމުގެ ދަށުން ކަމަށް އޭނާ ވިދާޅުވިއެވެ. މިއީ ޓިއުޝަން ފީ ހިލޭ ސްކޯލާޝިޕްތަކެކެވެ.
ލަމްޔާ އިތުރަށް ވިދާޅުވީ ބާކީ ތިބި 80 ސްކޮލާޝިޕް ޚާއްސަކުރަނީ އެ ކޮލެޖުގައި ތަޢުލީމު ޙާސިލްކުރަމުންދާ ދަރިވަރުންނަށް ކަމަށެވެ. އެގޮތުން މާލެ އާއި އަތޮޅުތެރޭގައި ހުރި އެ ކޮލެޖުގެ 16 ކެމްޕަހުގައި ތައުލީމު ޙާސިލްކުރަމުންދާ ދަރިވަރުންނަށް ހުޅުވާލެވޭ މި ފުރުސަތުގައި، ކޮންމެ ކެމްޕަހަކުން ފަސް ކުދިންނަށް ސްކޮލާޝިޕުގެ ފުރުސަތު ދެވޭނެ ކަމަށް އޭނާ ވިދާޅުވިއެވެ.
އެމްއައި ކޮލެޖުގެ ދަރިވަރުންނަށް ހުޅުވާލި ސްކޮލާޝިޕްތައް ބެހިފައި ވަނީ، މާސްޓާސް ލެވެލްގެ އެއް ސްކޯލާޝިޕް އަދި ލެވެލް ތިނެކާއި ލެވެލް ހަތަރެއްގެ ކޮންމެ ލެވެލްއަކުން ދެ ސްކޮލާޝިޕަށް ކަމަށެވެ.
އެހެންކަމުން ޖުމްލަ ސްކޯލާޝިޕްގެ ގޮތުގައި މާސްޓާސް ލެވެލްގެ 16 ސްކޯލާޝިޕް، ލެވެލް ތިނެއް އަދި ލެވެލް ހަތަރަކުން ކޮންމެ ލެވަލްއަކަށް 32 ސްކޯލާޝިޕަށް ކުރިމަތިލުމަށް ހުޅުވޭނެ ކަމަށް ލަމްޔާ ވިދާޅުވިއެވެ.
އެމްއައި ކޮލެޖުގެ ސްކޮލާޝިޕްތަކަށް އެދި މިއަދުން ފެށިގެން ހުށަހެޅޭނެއެވެ. މި ސްކޯލާާޝިޕްތަކަށް ކުރިމަތި ލުމުގެ މުއްދަތު ހަމަވާނީ މިމަހުގެ 29 ވަނަ ދުވަހުގެ މެންދުރު 12 ގެ ނިޔަލަށެވެ.
ސްކޮލާޝިޕްތަކަށް އެޕްލައި ކުރަން ޖެހޭ ގޫގުލް ފޯމް އެމްއައި ކޮލެޖުގެ ވެބްސައިޓުންނާއި އެ ކޮލެޖުގެ މީސް މީޑިޔާގެ މަންސަތަކުން ލިބޭނެއެވެ.