ތިން ރަށެއްގެ ބަނދަރު ހެދުމުގެ މަސައްކަތް، 92 މިލިއަން ރުފިޔާ އަށް ހެވީ ފޯސް މޯލްޑިވްސް ޕްރައިވެޓް ލިމިޓެޑާ ހަވާލުކޮށްފި އެވެ.
މިއަދު ޕްލޭނިން އެންޑް އިންފްރާސްޓްރަކްޗާ މިނިސްޓްރީ އިން ހެވީ ފޯސް އާ ހަވާލުކޮށްފައި ވަނީ ތ. އޮމަދޫ، ސ. މަރަދޫ ފޭދޫ އަދި ދ. ރިނބިދޫ ބަނދަރުގެ މަސައްކަތެވެ.
އޮމަދޫ ބަނދަރު މަޝްރޫއު އެ ކުންފުންޏާ ހަވާލުކުރީ 32.21 މިލިއަން ރުފިޔާ އަށެވެ. އެ މަސައްކަތް ނިންމަން ޖެހެނީ 366 ދުވަސް ތެރޭގަ އެވެ. އެ ރަށުގައި 307 މީޓަރުގެ ބޭރު ތޮއްޓެއް ޖަހައި 123 މީޓަރުގެ ރިވެޓްމެންޓު ޖަހަން ހަވާލުކުރި އެވެ.
މަރަދޫ ފޭދޫ ބަނދަރު ހަދަން ހަވާލުކުރީ 31.68 މިލިއަން ރުފިޔާ އަށެވެ. އެ މަސައްކަތް ހަވާލުކޮށްފައި ވަނީ 366 ދުވަސް ތެރޭ ނިންމާ ގޮތަށެވެ. އެ މަޝްރޫއުގެ ދަށުން އެ ރަށުގައި 243 މީޓަރުގެ ބޭރު ތޮށީގެ ހިލަޖަހައި 100 މިޓަރުގެ ރިވެޓްމެންޓެއް ޖެހުމަށް ހަމަޖެހިފައިވެ އެވެ. މީގެ އިތުރުން ނެރުބައްތި ޖަހައި ޕޭމަންޓެއް ވެސް ގާއިމްކުރަން ދެ ފަރާތުން އެއްބަސްވި އެވެ. އަދި ބަނދަރު ސަރަހައްދުގައި ރޭމްޕެއްގެ އިތުރުން ބަނދަރު ލައިޓް ޖެހުމަށް ވެސް ދެ ފަރާތުން އެއްބަސްވި އެވެ.
ރިނބިދޫ ބަނދަރުގެ މަޝްރޫއުގެ ދަށުން އެ ރަށުގައި 20 މީޓަރުގެ ގްރޯއިން ޖަހައި 254 މީޓަރުގެ ކޮންކްރީޓް ބްލޮކް ޖެހުމަށް އެެއްބަސްވި އެވެ. އަދި 120 މީޓަރުގެ ރިވެޓްމެންޓުގެ އިތުރުން 65 މީޓަރުގެ ބޮޑު ހިލައިގެ ތޮއްޓަކާއި 23.5 މިޓަރުގެ ވޯކްވޭ އެއްގެ އިތުރުން އެއްގަމު ތޮއްޓާ އިންވެގެން ޕޭމެންޓް ހަދައި ރޭމްޕެއްވެސް ހަދެމަށް ދެ ފަރާތުން އެއްބަސްވި އެވެ. މީގެ އިތުރުން މަގުބައްތި ޖަހައި ބަނދަރު ފުނކޮށް ނެރުބައްތިޖަހަން ވެސްް ވަނީ ނިންމައިފަ އެވެ.
އެ މަޝްރޫއަށް 29 މިލިއަން ރުފިޔާ ހަރަދު ކުރެ އެވެ. އެ މަސައްކަތް ނިންމަން ހަވާލުކޮށްފައި އޮތީ 240 ދުވަހުގެ ތެރޭގަ އެވެ.
އެ ތިން ރަށުގެ ބަނދަރުގެ މަސައްކަތް ކުރުމަށް ހެވީ ފޯސް އާ ހަވާލުކުރި އެއްބަސްވުމުގައި ޕްލޭނިން އެންޑް އިންފްރާސްޓްރަކްޗާގެ ފަރާތުން ސޮއިކުރެއްވީ ޑިރެކްޓާ ޖެނެރަލް ޝާނާ ފާރޫގެވެ. ހެވީ ފޯސްގެ ފަރާތުން ސޮއިކުރެއްވީ މެނޭޖިން ޑިރެކްޓަރު އިބްރާހިމް ޒަމީރެވެ.