ހއ. މާރަންދޫއަށް ދިމާވެފައިވާ މައްސަލަތައް އެރަށުގެ ކައުންސިލްގެ މެމްބަރުން ނާއިބު ރައީސް ފައިސަލް ނަސީމްއާ ހިއްސާކޮށްފިއެވެ.
ހއ. އަށް ނާއިބު ރައީސްއަށ މިހާރު ކުރައްވަމުންދާ ރަސްމީ ދަތުރުގައި މިއަދު ވަނީ މާރަންދޫއަށް ޒިޔާރަތް ކުރައްވައި، އެރަށު ކައުންސިލް މެމްބަރުންނާ މިއަދު ވަނީ ބައްދަލުކުރައްވައިފައެވެ.
އެ ބައްދަލުވުމުގައި މާރަންދޫ ކައުންސިލްގެ މެމްބަރުން ވިދާޅުވީ އެ ރަށުގެ ބައެއް އަސާސީ ޚިދުމަތްތައް އަދިވެސް ފުރިހަމަވެފައި ނެތުމުން ރައްޔިތުންނަށް ދަތިތައް ދިމާވަމުންދާ ކަމަށެވެ. އަދި ކުރިއަށް އޮތް ތާނގައި ރަށަށް ބޭނުންވާ އުމްރާނީ ތަރައްގީގެ މަސައްކަތްތަކުގެ މަޢުލޫމާތު ވެސް ފައިސަލްއާ ވަނީ ހިއްސާކުރައްވައިފައެވެ.
އެގޮތުން އެރަށުގެ ފަޅުގެ ދަތިކަމާއި، ސްކޫލް ޢިމާރާތުގެ ހުރި ދަތިތައް ފާހަގަ ކުރައްވައި، ރަށުގެ ޒުވާނުންނަށް ފުޓުބޯޅަ ދަނޑެއްގެ މުހިންމުކަން ކައުންސިލް މެމްބަރުން ވަނީ ފާހަގަކުރައްވައިފައެވެ.
މި ބައްދަލުކުރެއްވުމުގައި ފައިސަލް ވިދާޅުވީ މި ސަރުކާރުން ވަކި ރަށެއް ތަފާތު ނުކުރައްވާނެ ކަމަށާއި، މާރަންދޫ ކައުންސިލާއި މުޢައްސަސާތަކުން ފާހަގަކުރެއްވި ކަންކަން ވީހާވެސް އަވަހަށް ހައްލުކުރެއްވުމަށް މަސައްކަތް ކުރައްވާނެކަމަށެވެ.