އަރުޝީފު ކުރުމުގެ މަސައްކަތް ކުރާ ފަރާތްތަކަށް ސަރުކާރަށް ވެދެވެން އޮތް އެންމެ ބޮޑު އެހީތެރިކަމެއް ފޯރުކޮށްދޭނެ ކަމަށް އާޓްސް ކަލްޗަ އެންޑް ހެރިޓޭޖް މިނިސްޓަރު ޔުމްނާ މައުމޫނު ވިދާޅުވެއްޖެ އެވެ.
މިއަދު ފާހަގަ ކުރަމުންދާ ބައިނަލްއަގުވާމީ އަރުޝީފުގެ ދުވަހުގެ މުނާއްސަބަތުގައި މިނިސްޓަރު ޔުމްނާ ދެއްވި ހިތާބެއްގައި ވިދާޅުވީ ގައުމީ އަރުޝީފު އެކަށޭނެ ގޮތުގައި ގާއިމުވެ ފުރިހަމަ ވުމަކީ މުޅި ގައުމަށް އަދި އަންނަން އޮތް ޖީލުތަކަށް ނުހަނު ބޭނުންތެރި އެހާމެ ފައިދާ ކުރާނެ ކަމެއް ކަމަށެވެ.
"ދިވެހި ގައުމުގެ އެންމެހާ ކަންކަން އަންނަން އޮތް ޖީލުތަކަށް ފުރިހަމައަށް ވާސިލު ވާހުށީ ދިވެހި ޤައުމުގެ ފަތްފުއްތަކާއި ފުރޭފުތަކާއި ލިޔެކިޔުންތަކާއި ރިކޯޑުތައް ރަނގަޅަށް ރައްކާތެރިކޮށް ބެލެހެއްޓިގެން" މިނިސްޓަރު ޔުމްނާ ވިދާޅުވި އެވެ.
އަދި މިހާރުންމިހާރަށްވެސް ދައުލަތުގެ އޮފީސްތަކުން ދެވޭ ހިދުމަތްތައް ހަރުދަނާކޮށް ފުރިހަމަކުރުމަށްޓަކައިވެސް ރެކޯޑްސް މެނޭޖްމަންޓްގެ ކަންކަން ފުރިހަމަ ކުރެވޭނީ ގައުމީ އަރުޝީފު އެކަށޭނެ ގޮތެއްގައި ގާއިމުކުރެވިގެން ކަމަށް ޔުމްނާ ވިދާޅުވި އެވެ.
ޔުމްނާ ވިދާޅުވީ ގައުމީ އަރުޝީފު ފުރިހަމައަށް ގާއިމް ކުރުމަށް ސަރުކާރުން ބޮޑެތި މަސައްކަތްތަކެއް ކުރަމުންދާ ކަމަށެވެ.
"ސަރުކާރުގެ އިތުރުން އަރުޝީފުކުރުމުގެ މަސައްކަތް ކުރައްވަމުން ގެންދަވާ އަމިއްލަ ފަރާތްތަކުގެ ހިދުމަތްތައް ފާހަގަކޮށް އެފަރާތްތަކަށް ހިތްވަރުދީ ޝުކުރުއަދާ ކުރުމަކީވެސް މިއަދު އަޅުގަނޑަށްލިބޭ ހާއްސަ އުފަލެއް. އަމިއްލަފަރާތްތަކަށް މިރޮނގުން ވެދެވެންއޮތް އެންމެބޮޑު އެހީތެރިކަމެއް ސަރުކާރުން ވެދޭނެ ކަމުގެ ޔަގީންކަން އަޅުގަނޑު އަރުވަން." ޔުމްނާ ވިދާޅުވި އެވެ.
ބައިނަލްއަގުވާމީ އަރުޝީފު ދުވަހުގެ ގޮތުގައި ޖޫން ނުވައެއް ފާހަގަ ކުރަނީ ީ، ޔުނެސްކޯގެ ޖަމާޢަތެއް ކަމުގައިވާ އިންޓަރނޭޝަނަލް ކައުންސިލް އޮން އާކައިވްސް (ބައިނަލްއަޤްވާމީ އަރުޝީފު ޖަމްޢިއްޔާ) އައިސީއޭ އުފެދުނީ 1948 ޖޫން ނުވައެއްގައި ކަމަށް ވާތީ އެވެ.