އިސްލާމްއާބާދު (ޖޫން 3): އިނގިރޭސިވިލާތުގެ ގައުމީ އެއާލައިނުން ޕާކިސްތާނަށް ކުރާ ދަތުރުތައް ހުއްޓާލިތާ 11 އަހަރު ފަހުން އަނެއްކާވެސް އެގައުމަށް ދަތުރުތައް ފަށައިފި އެވެ.
ޕާކިސްތާނުގެ ޖިއޯ ނޫހުގައިވާ ގޮތުން މިއަދު ބްރިޓިޝް އެއާވޭސް ފުރަތަމަ ފްލައިޓް ވަނީ އެގައުމުގައި ޖައްސާފަ އެވެ. އަދި އެ އެއާލައިނުގެ ފްލައިޓުތައް އޮންނާނީ ހަފްތާއަކު ތިން ފަހަރު، ހީތުރޯ އާއި އިސްލާމްއާބާދާ ދެމެދުގަ އެވެ. އެހެންކަމުން ބްރިޓިޝް އެއާވޭސް ވެގެން ދާނީ ޕާކިސްތާނަށް ދަތުރު ކުރާ ހަމައެކަނި ޔޫރަޕުގެ އެއާލައިނަށެވެ.
ބްރިޓިޝް އެއާވޭސްއިން ޕާކިސްތާނަށް ކުރާ ދަތުރުތައް ހުއްޓާލީ 2008 ވަނަ އަހަރު އިސްލާމްއާބާދުގެ މެރިއޮޓް ހޮޓެލްގައި އަމިއްލައަށް މަރުވެގެން ދިން ޓެރަރިސްޓު ހަމަލާއަކާ ގުޅިގެންނެވެ. އެހަމަލާގައި 54 މީހަކު މަރުވި އެވެ.
ޕާކިސްތާނުގައި ހުންނަވާ ބްރިޓިޝް ހައި ކޮމިޝަނަރު ތޯމަސް ޑްރޫ ވިދާޅުވި ގޮތުގައި ބްރިޓިޝް އެއާވޭސްއިން ޕާކިސްތާނަށް ދަތުރު ފެށުމަކީ އެގައުމުގެ ސަލާމަތީ ހާލަތު ރަނގަޅުވަމުންދާ ކަމުގެ ހެއްކެކެވެ. އަދި އޭގެ ސަބަބުން ޕާކިސްތާނުގެ ވިޔަފާރި އާއި އެގައުމުގައި ކުރާ އިންވެސްޓުމެންޓުތައް އިތުރުވުމަށް މަގުފަހިވާނެ އެވެ.