މެޑްހޮޕް އިންޑިއާ އާއި އަސަރީ ސާވިސަސް ޕްރައިވެޓް ލިމިޓެޑް ގުޅިގެން ބާއްވާ "އިންޑިއާ ހެލްތު އެކްސްޕޯ 2019" އަންނަ މަހު 13 ގައި ދަރުބާރުގޭގައި ފަށާގޮތަށް ނިންމައިފިއެވެ.
މިއީ ތިން ދުވަހުގެ މުއްދަތަށް ކުރިއަށްގެންދާ އެކްސްޕޯއެކެވެ.
އިންޑިއާ ހެލްތް އެކްސްޕޯ އަކީ އިންޑިއާގެ ހޮސްޕިޓަލްތަކާއި ކްލިނިކް އަދި ސިއްހީ ދާއިރާގެ ހާއްސަ ޑޮކްޓަރުން ބައިވެރިވެގެން ރާއްޖޭގެ ސިއްހީ ދާއިރާއަށް އަމާޒުކޮށްގެން ހިންގާ އެކްސްޕޯއެކެވެ.
އަސަރީ ސާވިސަސްއިން ބުނީ އެ އެކްސްޕޯގައި އިންޑިއާގެ 31 ހޮސްޕިޓަލަކުންނާއި ސިއްހީ ހިދުމަތްދޭ ތަންތަނުން ބައިވެރިވާނެ ކަމަށެވެ. އަދި 25 ސްޕެޝަލިސްޓް ޑޮކްޓަރުންނާ ބައްދަލުކޮށް ވާހަކަދެއްވުމުގެ ފުރުސަތު އެ އެކްސްޕޯގެ ތެރެއިން ލިބިގެން ދާނެ ކަމަށް އޭނާ ވިދާޅުވިއެވެ.
އޭގެ އިތުރުން ސިއްހީ ހަތަރު ދާއިރާ އަކަށް އަމާޒުކޮށްގެން ރާއްޖޭގެ އާންމުންނަށް ވަރަށް މުހިންމު ސެމިނާ ތަކެއްވެސް ދަރުބާރުގޭގައި ޖޫން 14 އަދި 15 ގައި ކުރިއަށް ގެންދިއުމަށް ހަމަޖެހިފައިވާ ކަމަށްވެސް އަަސަރީ ސާވިސާސްއިން ބުންޏެވެ.
އެ ފެއާގައި ރާއްޖެއިން ފަރުވާ ކުރެވެން ނުހުންނަ ހާއްސަދާއިރާތަކާއި ޖެނެޓިކް ބަލިތައް (އައި ވީ އެފް އަދި އިންފާރޓިލިޓީ، ލާރނިންގ ޑިސްއެބިލިޓީސް، އޯޓިޒަމް ފަދަ ބަލިކާއި) ގުޅޭ ހާއްސަ ފަރާތްތަކާއި ބައްދަލުކޮށް މައުލޫމާތު ސެޝަންތައް ކުރިއަށް ގެންދިއުމަށް ހަމަޖެހިފައިވާ ކަމަށްވެސް އަސަރީ ސާވިސާސް އިން ބުންޏެވެ.
އެ ފެއާގައި އަޔުރްވެދިކް މެޑިސިން އަދި ޓެލެ ކޮންސަލްޓޭޝަންގެ ހިދުމަތްތައް ރާއްޖެއަށް ތައާރަފްކުރުން ފެނިގެން ދާނެކަމަށްވެސް އަސަރީ ސާވިސާއިން ބުންޏެވެ.