އާދައިގެ މަސްތަކުގައި ވެސް ދިޔާތަކެތި ގިނައިން ބޭނުން ކުރުމަށް ޑޮކްޓަރުން އަބަދުވެސް ލަފާދެ އެވެ. އާދައިގެ މަސްތަކާ ހިލާފަށް ރޯދަ މަހު ދިޔާތަކެތި ބޭނުން ކުރާ އަދަދު ގިނަ ކުރަން ޖެހޭ ކަމަށް ޑޮކްޓަރުން ބުނެ އެވެ.
އޭޑީކޭގެ ޖެނެރަލް ޑރ. މުހައްމަދު މައުރޫފު ހަސަން ވިދާޅުވީ ރޯދަ މަހު ވެސް އަށް ތައްޓާއި 12 ތައްޓާއި ދެމެދުގެ އަދަދަކަށް ފެން ބޯން ޖެހޭނެ ކަމަށެވެ. އަދި ރޯދަ ވީއްލާ ވަގުތުން ފެށިގެން ހާރު ކެއުމާ ދޭތެރޭ އެ އަދަދު ހަމަ ކުރަން ޖެހޭނެ ކަމަށް ވެސް ވިދާޅުވި އެވެ.
"ރޯދަ ވީއްލާ ގަޑީގައި ގިނަ އަދަދެއްގެ ފެން އެއްފަހަރާ ބުއިމަކީ އެހާ ރަނގަޅުކަމެއް ނޫން." ޑރ. މައުރޫފު ވިދާޅުވި އެވެ.
ފެން މަދުވުމުން ދިމާވެދާނެ މައްސަލަތައް
- ބޯ އަނބުރާގޮތް ވުން
- ބޮލުގައި ރިއްސުން
- އާދަޔާ ހިލާފަށް ވަރުބަލިވުން
- ހަރަކާތްތެރިވެ ނޫޅެވުން
ފެން ބޯއިރު ބަލަން ކަމެއް ދޭން ޖެހޭ ކަންކަން ވެސް އެބަހުއްޓެވެ. އެގޮތުން އެހާ ފިނި ނޫން ފެން ބުއިމަކީ މުހިންމު ކަމެއް ކަމަށް ޑރ. މައުރޫފު ވިދާޅުވި އެވެ. އޭރުން ހަކަމް ކުރަން ފަސޭހަވާނެ ކަމަށް ވިދާޅުވި އެވެ.
ކަރުހިއްކުން ކުޑަކުރުން ކުރެވިދާނެ ބައެއް ކަންކަން
- ކެފެއިން ހުންނަ ތަކެތި ބޭނުންކުރުން މަދު ކުރުން
- ރޯދަވީއްލާ އިރު ތަރުކާރީއާ މޭވާ ގިނައިން ބޭނުން ކުރުން
- ލޮނު އަދި ކުޅި އެއްޗިހި މަދުން ބޭނުން ކުރުން
ލޮނު އެއްޗިހި އަދި ކުޅި އެއްޗެހި ގިނައިން ބޭނުން ކުރާ ނަމަ ކަރުހިއްކުމުގެ އިހުސާސް ކުރެވޭލެއް އިތުރުވާނެ އެވެ. ޑީހައިޑްރޭޓްވުމުގެ ފުރުސަތު ބޮޑު މީހުންގެ ތެރޭގައި ކުޑަކުދިން އަދި މުސްކުޅިން ހިމެނެ އެވެ. އަދި ހަކުރު ބަލި ހުންނަ މީހުންވެސް ހިމެނެ އެވެ.