މާރުކޭޓްގައި މިއަދު ރަސްކަން ކުރަނީ ރަތް ޖަނބުރޯލު!

"ބައްޕާ! މިހުރީ ރަތްޖަނބުރޯލު. މީތި ކޮންމެހެން ވެސް ބޭނުން!" ކަރާ މާރުކޭޓަށް ވަންނަ ދޮރުކައިރީގައި މޭޒެއްގައި ހުރި ރަތް ޖަބުރޯލު ފުންޏަކަށް އިޝާރާތް ކުރަމުން ކުޑަ ކުއްޖަކު އޭނާގެ ބައްޕަ ކައިރީ ބޮޑާހޭކި އެވެ.

މީގެ ކުރިން އަނބުގެ ރީދޫ ކުލައިން ޖަރީވެފައި އޮންނަ އެ ސަރަހައްދުން މިއަދު ރީދޫ ކުލަ ފަނޑުވެ، ގަދަވެފައި ވަނީ ރަތް ކުލަ އެވެ. އެ ސަރަހައްދު އޮތީ ރަތް ޖަނބުރޯލުން ޖަރީވެފަ އެވެ.

އެކަމަކު މީގެ ހަފްތާއެއްހާ ދުވަސް ކުރިން، ކަރާ މާރުކޭޓުން ބޭރު މަގާ ވީ ދިމާލުގައި ހުންނަ ވަގުތީ ގޮޅިތައް ފުރާލާފައި އޮތީ ދޮން އަނބުންނެވެ. އެތަނުގައި ތިބި ވިޔަފާރިވެރިން ބުނާ ގޮތުގައި މިހާރު އަނބު މޫސުން މި ވަނީ ނިމިފަ އެވެ. އެތަނުގައި ހުރި އަނބުތައް ދަނީ ދުވަހެއް ދުވަހަކަށް މަދުވަމުންނެވެ. އެއާ އެކު، ރަތްޖަނބުރޯލުގެ ގިނަވަނީ، ޖަނބުރޯލު މޫސުން އަދި ނިމޭނެ ކޮޅުމަތި ނުފެންނާތީ އެވެ.

ކަރާ މާރުކޭޓޫގެ ބޭރުގައި ހުރި ސްޓޯލްތަކުގައި ހުރި ރަތް ޖަނބުރޯލު -- ސަން ފޮޓޯ: އަހުމަދު އަވްޝަން އިލްޔާސް

ކަރާ މާރުކޭޓުގައި ޖަނބުރޯލު ވިއްކަމުން ދަނީ ބޮނޑިއެއް 100 ރުފިޔާއަށެވެ. ޖަނބުރޯލުތަކުގެ ސައިޒުތައް އެކި ވަރެވެ. ވިޔަފާރިވެރިން ބޮނޑީގައި ހިމެނޭ ޖަނބުރޯލުގެ އަދަދު ކަނޑައަޅާފައި ވަނީ ސައިޒަށް ބަލާފަ އެވެ. ކޮންމެ ބޮނޑިއެއްގައި 25، 20 ނުވަތަ 15 ޖަނބުރޯލް ހުރެ އެވެ.

ޖަނބުރޯލްގެ މައި މަރުކަޒަކީ ށ. އަތޮޅު

މާލެއާއި ކުޅުދުއްފުށި އަދި ރިސޯޓުތަކަށް އެންމެ ގިނައިން ޖަނބުރޯލު އެތެރެ ކުރަނީ ށ. އަތޮޅުންނެވެ. ހާއްސަކޮށް ށ. އަތޮޅުގެ ފޯކައިދޫ އާއި ފީވަކުންނެވެ.

"ފީވަކުން މި ދޭތެރެއިން ވަރަށް ބައިވަރު ޖަނބުރޯލު ގެނައި. ފޯކައިދޫއިންނާ،" ޖަނބުރޯލު ވިއްކަން ހުރި ވިޔަފާރިވެރިއަކު ބުންޏެވެ.

ފީވަކު ކައުންސިލުގެ ރައީސް ހަސަން ޝުޖާއު ވިދާޅުވި ގޮތުގައި، އެ ރަށުގައި ޖަނބުރޯލު ގަހެއް ނުހުންނަ ގެއެއް މަދުވާނެ އެވެ. އޭނާވެސް ވިދާޅުވި ގޮތުގައި ށ. އަތޮޅުގައި ޖަނބުރޯލު ވިއްކުމުގެ ވިޔަފާރި ދެން އެންމެ ބޮޑަށް ކުރަނީ ފޯކައިދޫގަ އެވެ.

ކަރާ މާރުކޭޓުގެ ބޭރުގައި ހުރި ސްޓޯލްތަކުގައި މިހާރު ރަތް ޖަނބުރޯލު ގިނަ-- ސަން ފޮޓޯ: އަހުމަދު އަވްޝަން އިލްޔާސް

ފޯކައިދޫ ކައުންސިލުގެ ރައީސް މުހައްމަދު ރާޝިދު ވިދާޅުވީ، އެ ރަށުގައި އެވަރެޖުކޮށް ކޮންމެ ގެއެއްގައި ދެ ޖަނބުރޯލު ގަސް ހުންނާނެ ކަމަށެވެ.

"ނިސްބަތުން ބުނަންޏާ 470 ވަރަކަށް ގޯތި އޮންނާނެ މިރަށުގައި ގެވަޅާ އެއްކޮށް. އެވަރެޖްކޮށް ކޮންމެ ގޯއްޗެއްގައި ދެ ގަސް ވަރު ހުންނާނެ،" އެނާ ވިދާޅުވި އެވެ. "ފުދޭ ވަރަކަށް ބޮޑު އާންމުދަނީއެއް ލިބޭނެ ޖަނބުރޯލު ސީޒަނުގައި،"

ރަތާއި ފެހި އައީ ސުނާމީއާ އެކު

ކަރާ މާރުކޭޓުގައި މިހާރު ގިނަވެފައިވާ ރަތް ޖަނބުރޯލަކީ ހަގީގަތުގައި ރާއްޖޭގައި މީގެ ކުރިން ހެދޭ ޒާތުގެ ޖަނބުރޯލު ނޫން ކަމަށް ބައެއް މީހުން ބުނެ އެވެ. އަދި ފެހި ޖަނބުރޯލުވެސް އެއީ ބޭރު މުޑުވަކެއް ކަމަށް ދަނޑުވެރިން ބުނެ އެވެ. މީހުން ބުނެ އުޅޭ ގޮތުގައި ރާއްޖެ ޖަނބުރޯލަކީ ހުދު ކުލައިގައި ހުންނަ ޖަނބުރޯލެކެވެ.

ފީވަކު ކައުންސިލުގެ ރައީސް ޝުޖާއު ވިދާޅުވި ގޮތުގައި އެ ރަށުގައި ރަތް އަދި ފެހި ޖަނބުރޯލު ހެދެން ފެށީ، ސުނާމީއަށް ފަހު އެވެ.

ކަރާ މާރުކޭޓޫގެ ބޭރުގައި ހުރި ސްޓޯލްތަކުގައި ހުރި ރަތް ޖަނބުރޯލު -- ސަން ފޮޓޯ: އަހުމަދު އަވްޝަން އިލްޔާސް

"ހުދު ޖަނބުރޯލު އެއީ އަސްލު މި ކިޔާ ރާއްޖެ ޖަނބުރޯލު. ރަތާ ފެއްސާ އެއީ ކުރިން ސުނާމީގައި ބެހިގެން އައި ގަސްތަކަކުން ހައްދަން ފެށި އެއްޗެހިތަކެއް. އޭގެ ފަހުން ރަތް ޖަނބުރޯލު ހެދެން ފެށީ،" އޭނާ ވިދާޅުވި އެވެ.

ފޯކައިދޫ ކައުންސިލުގެ ރައީސް ރާޝިދު ކިޔައިދެއްވި ގޮތުގައި ފޯކައިދޫގައިވެސް ރަތް އަދި ފެހި ޖަނބުރޯލު ހައްދަން ފެށީ ހަމަ އެގޮތަށެވެ.

މިހާރު ހުދު ޖަނބުރޯލު މާރުކޭޓްގައި ނެތޭ ވެސް ބުނެވިދާނެ އެވެ. މާރުކޭޓުގައި މިހާރު ރަސްކަން ކުރަނީ ސުނާމީއާ އެކު މި އައި ރަތް ޖަނބުރޯލެވެ.