ރާއްޖޭގައި ބިދޭސީން ކުރަމުންދާ މަސައްކަތްތަކާ ދިވެހީން ހަވާލުވުމަކީ، ގައުމުގެ އިގްތިސާދަށް ލިބޭނެ ވަރަށް ބޮޑު ކުރިއެރުމެއް ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ބައިނަލްއަގުވާމީ ގޮތުން ފާހަގަކުރާ މަސައްކަތްތެރިންގެ ދުވަހުގެ މުނާއްސަބަތުގައި ރައީސް ސޯލިހު މިއަދު ދެއްވި ހިތާބުގައި ވިދާޅުވީ ދިރިއުޅުމަށް ޓަކައި މަސައްކަތް ކުރުމަކީ އިންސާނަކަށް ވީތީ ކޮންމެ މީހެއްގެ ކޮނޑުގައި އެޅިފައިވާ ފަރުދީ އަދި އިޖްތިމާއީ ވާޖިބެއް ކަމަށެވެ. ހަލާލު ގޮތުގައި ކުރެވޭ އެއްވެސް މަސައްކަތަކީ އޭގެ ޒާތުގައި ހުތުރު ނުވަތަ ދަށު ދަރަޖައިގެ މަސައްކަތެއް ނޫން ކަމަށް ރައީސް ވިދާޅުވި އެވެ.
"ނަމަވެސް ވަކި ކަހަލަ ވަޒީފާއެއް ނުލިބޭތީ މަސައްކަތެއް ނުކޮށް ދެއަތް އުރާލައިގެން ތިބި އެތައް ޒުވާނުންނެއް މިހާރު ވެސް ރާއްޖޭގައި އެބަތިބި. އެކަން އެހެން އޮތް އިރު ތަފާތު މަސައްކަތްތައް ކުރުވުމަށް ކޮންމެ އަހަރަކު އެތައް ހާސް ބިދޭސީންނެއް ރާއްޖެއަށް އެބަ ގެނޭ." ރައީސް ސޯލިހު ވިދާޅުވި އެވެ.
ދިރިއުޅުމުގެ މަސްއޫލިއްޔަތުތަކާއި ޒިންމާތައް އަމިއްލައަށް އުފުލުމުގެ މުހިންމުކަން ޒުވާނުން ގަބޫލުކޮށް ކޮންމެވެސް މަސައްކަތަކުން އާމްދަނީ ހޯދަން ތެދުވުމަކީ މިފަދަ ދުވަހެއް ފާހަގަކުރާއިރު އަޒުމް ކަނޑައަޅަންވީ އެއް ކަންތައް ކަމަށް ރައީސް ސޯލިހު ވަނީ ވިދާޅުވެފަ އެވެ.
ދިވެހިން ކުރަމުން އަންނަ މަސައްކަތާއި ދިވެހިން ހަވާލުވުމަކީ ރާއްޖޭން ބޭރުވާ ބޭރު ފައިސާގެ މިންވަރު ވަރަށް ބޮޑަށް މަދުކުރެވޭނެ ކަމެއް ކަމަށް ވެސް ރައީސް ސޯލިހު ވިދާޅުވި އެވެ.
މަސައްކަތްތެރިންގެ ހައްގުތައް ވަނީ ނިގުޅައިގެންފައި
މަސައްކަތްތެރިންގެ ދުވަހެއް ފާހަގަކުރާ އިރު، މަސައްކަތްތެރީންގެ އެތައް ހައްގުތަކެއް ނިގުޅައިގަނެވިފައިވާކަން ގަބޫލުކުރަން ޖެހޭ ކަމަށް ރައީސް ވިދާޅުވި އެވެ. ޤާނޫނު އަސާސީ އާއި ވަޒީފާއާ ބެހޭ ގާނޫނާ ހިލާފަށް މުވައްޒަފުންގެ މެދުގައި ތަފާތުކުރުމާއި މުވައްޒަފުންނަށް އިންޒާރު ދިނުމާއި ވަޒީފާއިން ވަކިކުރުމަކީ، ސަރުކާރުގެ ތެރޭގައި ނޫނަސް، މިހާރު ވެސް ހިނގަމުންދާ ކަންކަން ކަމަށް ރައީސް ވިދާޅުވި އެވެ.
"ވަކީން ހާއްސަކޮށް އިންސާނުން ދިރިއުޅެން އެކަށީގެންނުވާ ދަށު ދަރަޖައިގެ ތަންތަނުގައި ބިދޭސީ މަސައްކަތްތެރީން ނިންދެވުމާއި މަސައްކަތް ކުރުވުމަށް ފަހު މުސާރަ ނުދިނުމަކީ ޙައްލުކުރަންޖެހިފައިވާ ބޮޑު މައްސަލައެއް." ރައީސް ސޯލިހު ވިދާޅުވި އެވެ.
އަރާމުކުރުމަށް އެކަށީގެންވާ ވަގުތު ނުދީ މަސައްކަތް ކުރުވުމާއި، މަކަރާއި ހީލަތުން އޮޅުވާލައިގެން އެމީހުން ލައްވައި މަސައްކަތް ކުރުވުމަކީ ވެސް، މިހާރުން މިހާރަށް ހުއްޓުވަން ޖެހިފައިވާ ކަންކަމަށް ރައީސް ސޯލިހު ވިދާޅުވި އެވެ.
ވަޒީފާގެ ބާޒާރަށް ވީހާ ގިނަ ދިވެހީން ނެރުމަށް ޓަކައި މިހާރުން މިހާރަށް ކުރަންޖެހިފައިވާ އެންމެ މުހިންމު އެއް ކަމަކީ ވަޒީފާ އަދާކުރާ މީހުންނަށް އެންމެ ކުޑަމިނުން ދެވޭނެ އުޖޫރަ ކަނޑައެޅުން ކަމަށް ރައީސް ސޯލިހު ވިދާޅުވި އެވެ. ޤާނޫނީ އޮނގަނޑުގެ ތެރެއިން އެކަން ކުރުމަށް ޓަކައި ކަމާ ގުޅުން ހުރި ފަރާތްތަކާ އެކު މަޝްވަރާ ކުރަމުން އަންނަ ކަމަށް ވެސް ވިދާޅުވި އެވެ. އަދި ވިދާޅުވީ ނަވާރަ ވަނަ ރައްޔިތުންގެ މަޖިލީހުގެ މަސައްކަތްތައް ފަށައިގަތުމުން، އެ މަސައްކަތް ހަލުވިމިނުގައި ކުރިއަށް ގެންދެވޭނެ ކަމަށް އުންމީދު ކުރައްވާ ކަމަށެވެ.
ރާއްޖޭގައި ވެސް މަސައްކަތްތެރިންނަކީ މި ގައުމުގެ ކުރިއެރުމާއި ތަރައްޤީގެ ސަރަކަ ކަމަށް ރައީސް ސޯލިހު ވިދާޅުވި އެވެ.
ގައުމެއްގެ އިގްތިސާދު ދިރިގެން އަންނަނީ މަސައްކަތްތެރިން އޮހޮރާ ދަލުން ކަމަށާއި މަސައްކަތްތެރިން ކޮށްދެމުން އަންނަ މަތިވެރި ހިދުމަތުގެ އަގު ވަޒަންކުރާ ކަމަށް ވެސް ރައީސް ސޯލިހު ވަނީ ވިދާޅުވެފަ އެވެ.