ލ. މުންޑޫ އާއި ގަން ގުޅުވައިދިނުމަށް މުންޑޫ ކައުންސިލުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އަރިހު އެދިއްޖެއެވެ.
ކައުންސިލުން އެގޮތަށް އެދުނީ މިއަދު ރައީސް އާ އެކު ބޭއްވި ބައްދަލުވުމުގައެވެ.
ރައީސް އޮފީހުގައި ބޭއްވި މި ބައްދަލު ކުރެއްވުމުގައި މުންޑޫ ހިމެނޭ ގަމު ދާއިރާ އަށް އިންތިހާބުވި މެންބަރު މުހައްމަދު ވިސާމާއި، ކުރިން އެ ދާއިރާ ތަމްސީލު ކުރެއްވި މިހާރުގެ އިކޮނޮމިކް މިނިސްޓަރު ފައްޔާޒު އިސްމާއިލްވެސް ބައިވެރިވެ ވަޑައިގެންނެވިއެވެ.
މި ބައްދަލުވުމުގައި މުންޑޫ ކައުންސިލުންވަނީ މުންޑުއަކީ މީހުން ދިރިއުޅޭ ރަށެއްކަން ރަސްމީކޮށް އެނގެން ނެތުމުގެ ސަބަބުން ދިމާވާ މައްސަލަތައް ރައީސް އާ ހިއްސާ ކުރައްވައިފައެވެ.
ސުނާމީގައި އެތައް ބައެއްގެ ގެދޮރު ހަލާކުވުމުގެ ސަބަބުން ކުރިމަތިވެފައިވާ ގެދޮރުގެ ދަތިކަމާއި، ފެނާއި ނަރުދަމާގެ ހިދުމަތް ނެތުމުން ކުރިމަތިވާ ދަތިތައް ކައުންސިލުން ވަނީ ރައީސް އާ ހިއްސާ ކޮށްފައެވެ.
މުންޑޫގައި ލޯކަލް ޓުއަރިޒަމް ތަރައްޤީކުރުމަށް ސަރުކާރުން އެހީތެރިކަން ދިނުމަށްވެސް ކައުންސިލުން ވަނީ ރައީސް އަރިިހު އެދިފައެވެ.
ކައުންސިލް އިން ހުށަހެޅި ކަންތައްތަކާ ގުޅޭގޮތުން ރައީސް ވިދާޅުވީ ކަމާގުޅޭ އިދާރާތަކާ މަޝްވަރާކުރެއްވުމަށް ފަހު، އެކަންކަމަށް ހައްލު ހޯދައިދެއްވުމަށް މަސައްކަތް ކުރައްވާނެ ކަމަށެވެ.
މުންޑޫ އަކީ ފަޅުރަށެއްގެ ގޮތުގައި ކަނޑައެޅުއްވުމަށްފަހު، ކުރީގެ ސަރުކާރުން ވަނީ އެ ކަން ބާތިލް ކޮށްފައެވެ. އެ ރަށުގެ ގިނަ އަދަދެއްގެ ބަޔަކު ގަމަށް ބަދަލުކޮށްފައިވާއިރު، މުންޑޫގައިވެސް މީހުން ދިރިއުޅެއެވެ.