ރޭކްޔަވިކް (ފެބްރުއަރީ 23): އައިސްލޭންޑުން ކުރިއަށް އޮތް ފަސް އަހަރު ތެރޭ 2،000 ބޮޑުމަސް މަރަން ހުއްދަ ދީފިއެވެ.
އައިސްލޭންޑުގެ މިނިސްޓްރީ އޮފް ފިޝަރީސް އެންޑް އެގްރިކަލްޗާއިން ނެރުނު ބަޔާނެއްގައިވާ ގޮތުން 2018 އާއި 2025އާ ދޭތެރޭ، ކޮންމެ އަހަރަކު ޝިކާރަ ކުރަން ހުއްދައީ 209 ފިން ވޭލްއާއި 217 މިންކީ ވޭލްސް ކަމަށެވެ.
އައިސްލޭންޑުގެ ފިޝަރީސް މިނިސްޓްރީން ބުނި ގޮތުގައި އެ ކޯޓާ ކަނޑައަޅާފައި ވަނީ ގައުމުގެ މެރިން ރިސާޗް އިންސްޓިޓިއުޓާއި ޔުނިވާސިޓީ އޮފް އައިސްލޭންޑުން ހެދި ދިރާސާތަކަށް ބިނާކޮށެވެ.
"ބޮޑުމަސް ބާނަނީ އާބާދީ ބޮޑު ބޮޑުމަހަށް ބަލާފައި. އެއީ ސައިންސަށް ބިނާކޮށްފައިވާ، ދެމެހެއްޓެނެވި، ހަރުކަށި ގަވާއިދުތައް ކަނޑައަޅާފައިވާ، އަދި ބައިނަލްއަގުވާމީ ގާނޫނުތަކާ ހިލާފު ނުވާ ކަމެއް،" މިނިސްޓްރީގެ ބަޔާނެއްގައި ވެއެވެ.
ނަމަވެސް ބޮޑުމަސް ހިމާޔަތްކުރުމަށް ގޮވާލާ އެކްޓިވިސްޓުން ވަނީ އެ ބަޔާނާ މެދު ހިތްހަމަނުޖެހުން ފާޅުކޮށްފައެވެ. އަދި އައިސްލޭންޑުގެ ތިމާވެއްޓާ ބެހޭ އެސޯސިއޭޝަނުން ވަނީ މިނިސްޓްރީން ފާހަގަކުރި ދިރާސާއަށް ފާޑު ކިޔާފައެވެ.
އަދި ބޮޑުމަސް ހިމާޔަތް ކުރުމަށް މަސައްކަތް ކުރާ ވޭލް އެންޑް ޑޯލްފިން (ޑަބްލިއުޑީސީ) ޖަމްއިއްޔާއިން ވަނީ ބޮޑުމަސް ޝިކާރަކުރުމަކީ އައިސްލޭންޑުގެ އިގުތިސާދަށް މާބޮޑު ފައިދާއެއް ލިބޭ މަސައްކަތެއް ނޫން ކަމަށާއި އެއީ ގައުމުގެ ގިނަ ރައްޔިތުން ތާއިދު ކުރާ ކަމެއް ނޫން ކަމަށްވެސް ބުނެފައެވެ.
ބޮޑުމަސް ޝިކާރަކުރާ ކުންފުންޏަކުން ބުނާ ގޮތުގައި އެ މަސައްކަތުން އައިސްލޭންޑުގެ އިގުތިސާދަށް 8.4 މިލިއަން ޑޮލަރު ލިބެއެވެ. ނަމަވެސް އެއާ އަޅާ ބަލާއިރު ބޮޑުމަސް ބަލަން ދާ ފަތުރުވެރިންގެ ފަރާތުން އިގުތިސާދަށް 13.4 މިލިއަން ޑޮލަރު ލިބޭ ކަމަށް ޔުނިވާސިޓީ އޮފް އައިސްލޭންޑުގެ ރިޕޯޓެއްގައިވެއެވެ.