ނިމިގެން ދިޔަ އެމްޑީޕީ ޕްރައިމަރީގެ ބައެއް ދާއިރާތަކުގެ ވޯޓު ފޮށިތައް އަލުން ގުނަން އެ ޕާޓީން ނިންމައިފިއެވެ.
އެމްޑީޕީން މިއަދު ނެރުނު ބަޔާނުގައި ބުނީ ޕްރައިމަރީއާ ގުޅިގެން 8 ޝަކުވާއެއް ހުށަހެޅި ކަމަށެވެ. އޭގެ ތެރެއިން ދެ ދާއިރާގެ ފޮށިތައް އަލުން ގުނައި އަދި އެއް ދާއިރާއެއްގެ މައްސަލަ އިތުރަށް ބެލުމަށް ޕްރައިމަރީއާގުޅޭ ޝަކުވާ ކޮމެޓީން ނިންމައިފައިވާ ކަމަށެވެ.
އަދި އޭގެ ތެރެއިން ފަސް މައްސަލައެއް ބަލާނެތަނެއް ނެތްކަމަށް ކަމަށްވެސް އެ ޕާޓީން ބުންޏެވެ.
އަލުން ގުނުމަށް ނިންމައިފައިވަނީ ހޮޅުދޫ ދާއިރާއާއި އަދި ތިނަދޫ ދެކުނު ދާއިރާގެ ވޯޓު ފޮށިތައް ކަމަށް އެމްޑީޕީން ބުންޏެވެ.
"ދެ ކެންޑިޑޭޓުންނަށް ލިބުނު ވޯޓުގެ ފަރަގު ނުހަނު ހަނިކަމުން ހޮޅުދޫ ދާއިރާއާއި ތިނަދޫ ދެކުނު ދާއިރާގެ ފޮށިތައް އަލުން ގުނުމަށް ނިންމިއިރު، ފުވައްމުލަކު ދެކުނު ދާއިރާގެ ދެ ކެންޑިޑޭޓުންގެ ދެމެދުގައިވާ ފަރަޤަކީ 24 ވޯޓުކަމުގައިވާތީ، ރީރެޖިސްޓްރޭޝަންގެ ކިތައް މައްސަލަ ކެންޑިޑޭޓުން ހުށަހެޅިތޯ ބެލުމަށްފަހު، ގޮތެއް ނިންމުމަށް ކޮމިޓީން ނިންމާފައިވެއެވެ." އެމްޑީޕީގެ ބަޔާނުގައި ވެއެވެ.
ޕްރައިމަރީގައި ކަނޑިތީމް ދާއިރާއިން ވޯޓު އޮޅުވާލިކަމަށް ބުނެ ވާހަކަތަކެެއް ވެސް އިއްޔެ ވަނީ ފެންމަތިވެފައެވެ. ނަމަވެސް އެމްޑީޕީން ބުނީ ބިލެއްފަހީގެ ފޮށީގެ ވޯޓުލުން ކުރިއަށް ދިޔައީ ދެ ކެންޑިޑޭޓުންގެ މަންދޫބުންގެ ހާޒިރުގައިކަމަށް ވެފައި، ވޯޓުލާން ދިޔަ ކޮންމެ މީހެއްގެ ނަން އަޑުހަރުކޮށް އިޢުލާނުކޮށްފައިވީއިރުވެސް، ކެންޑިޑޭޓުގެ މަންދޫބު އިއުތިރާސްކޮށްފައެއް ނެތް ކަމަށެވެ.
އަދި އެ މައްސަލަ ފެންމަތިކުރީ ފޮށި ބަންދުކުރަން ދެ މިނެޓަށްވެފައިވަނިކޮށް، އެ ކަމެއް ހިނގިތާ އެތައް އިރެއް ފަހުންކަމުގައި ވެފައި، އެ ކަމެއް ހިނގިއިރު އެކަން ފާހަގަކޮށްފައިނުވާތީ، އަދި އިސްވެރިޔާގެ ސަމާލުކަމަށް މި މައްސަލަ ގެނައުމުން، އެނާ މި މައްސަލަ ބެއްލެވިއިރު، ހެކި ފެނިފައި ނުވާތީ، މައްސަލަ ބެލެނޭ ތަނެއް ނެތްކަމަށް އެމްޑީޕީން ބުންޏެވެ.