މަރާލެވިފައިވާ މީހުންނާއި ގެއްލިފައިވާ މީހުންގެ މައްސަލަތައް ބަލަން ރައީސުލްޖުމްހޫރިއްޔާ އުފެއްދެވި ރިޔާސީ ކޮމިޝަނުން މިހާތަނަށް 24 މައްސަލައެއް ބަލަން ނިންމާފައިވާ ކަމަށް އެ ކޮމިޝަނުން ހާމަކޮށްފިއެވެ.
ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމެއްގައި އެ ކޮމިޝަނުގެ ޗެއާ ސުއޫދު ވިދާޅުވީ، އެ ކޮމިޝަނުން ބަލާނެ މައްސަލަތައް އާންމުންގެ ފަރާތުން ހުށަހެޅުމަށް ހުޅުވާލި އިރު، އެ ކޮމިޝަނުން މިހާތަނަށް ވަނީ 24 މައްސަލައެއް ބެލުމަށް ނިންމާފައި ކަމަށެވެ.
ސުއޫދު ވަނީ އެ 24 މައްސަލަ އިއުލާނުވެސް ކުރައްވާފައެވެ. އޭގެ ތެރޭގައި ނޫސްވެރިޔާ އަހްމަދު ރިޟްވާން އަބްދުﷲ ގެއްލުނު މައްސަލައާއި، ބްލޮގަރ ޔާމީން ރަޝީދު މަރާލި މައްސަލައާއި، ބަންގްލަދޭޝްގައި މަރުވި ދިވެހި ދަރިވަރު ރައުދާ އާތިފްގެ މަރުގެ މައްސަލައާއި، އަބްދުﷲ މާއީލް ގެއްލުނު މައްސަލައާއި، އިލްމުވެރިޔާ ޑރ. އަފްރާޝީމް އަލީ މަރާލި މައްސަލަ ހިމެނެއެވެ.
ސުއޫދު ވިދާޅުވީ މި މައްސަލަތަކުގެ ތެރެއިން މަދުވެގެން ދެ މައްސަލައެއް ކޮމިޝަނުން ބަލާނީ އާންމުކޮށް ހުޅުވާލައިގެން، ޕަބްލިކް އިންކުއަރީއެއްގެ ގޮތުގައި ކަމަށެވެ.
ކޮމިޝަނުން ބަލާ މަރުގެ މައްސަލަތައް:
- ޑރ. އަފްރާޝީމް މަރާލި މައްސަލަ
- އެމްއެމްއޭ ކައިރީގައި އިބްރާހިމް އާގިލު މަރާލި މައްސަލަ
- 2014 ވަނަ އަހަރު ހިނގާފައިވާ މަރުގެ މައްސަލައެއް
- ކަލައިދޫގައި ހިނގި އެކްސިޑެންޑެއްގައި ޒަހަމްވެ މަރުވި އަހުމަދު ވިޝާލްގެ މައްސަލަ
- މުހައްމަދު އަނަސް މަރާލި މައްސަލަ
- ނަދާލް ރަޝީދުގެ މަރުގެ މައްސަލަ
- ދޫނިދޫ ޖަލުގައި މުސާ ނައީމް މަރުވި މައްސަލަ
- ޖަލުގައި މަރުވި އަލީ އަބްދުﷲގެ މައްސަލަ
- ރައުދާ އާތިފްގެ މަރުގެ މައްސަލަ
- ޖަލުގައި އަބްދުﷲ ރަޝީދު މުހައްމަދު މަރުވި މައްސަލަ
- އަބްދުއްޝުކޫރު އަބްދުﷲ މަރުވި މައްސަލަ
- ޔާމީން ރަޝީދު މަރާލި މައްސަލަ
- އަހުމަދު ނަޒީފު ޝައުކަތު އަޑި ޕާކު ތެރޭގައި މަރާލާފައި އޮއްވާ ފެނުނު މައްސަލަ
- މުހައްމަދު ޝަހުދުގެ މަރުގެ މައްސަލަ
- ބަންގްލަދޭޝްގެ ރައްޔިތެއް ކަމަށްވާ ޝާހީން މިއާ މަރާލި މައްސަލަަ
- ލ. މުންޑޫ، ނޫވިލް، އަލީ ޒިޔަދަމް މަރާލި މައްސަލަ
- 2016 ވަނަ އަހަރު މާލޭގައި ހިނގާފައިވާ މަރުގެ ދެ މައްސަލައެއް
- ހ. ހަންޑްރެޑް ފްލާވާ، އަހުމަދުު ޖައިލަމް ޝާކިރު މަރާލި މައްސަލަ
- ފުވައްމުލަކު ސިޓީ، ދޫނޑިގަމު އަވަށު، ނާޝިދު މޫސާގެ މަރުގެ މައްސަލަަ
- 2016 ވަނަ އަހަރުގެ އޮކްޓޯބަރު މަހުގެ ތެރޭގައި ކުޑަކުދިންގެ ހިޔާގައި ބަލަމުން ދިޔަ ފަސް މަހުގެ ކުއްޖަކު މަރުވި މައްސަލަ
ކޮމިޝަނުން ބަލާ ގެއްލިފައިވާ މީހުންގެ މައްސަލަތައް:
- ހާއްސަ އެހީއަށް ބޭނުންވާ މީހުންގެ މަރުކަޒުގައި ފަރުވާ ދެމުން ދިޔަ އަހުމަދު މިޝްފާގު ގެއްލިފައިވާ މައްސަލަ
- މުހައްމަދު ޝަފީއު އިބްރާހިމް ގެއްލިފައިވާ މައްސަލަ
- އަބްދުﷲ މާއިލް ގެއްލިފައިވާ
- ރިލްވާން ގެއްލުނު މައްސަލަ
މިއަދުގެ ނޫސްވެރިންގެ ބައްދަލުވުމުގައި ސުއޫދު ވިދާޅުވީ، އަނިޔާވެރި ގޮތަކަށް މަރާލި ތުއްތު ކުއްޖާ، މުހައްމަދު އިބްތިހާލްގެ މަރުގެ މައްސަލަ އެ ކޮމިޝަނުން ބަލާ މަރުގެ މައްސަލަތަކުގެ ލިސްޓުގައި ނެތީ އެ މައްސަލަ ބެލުމާ މެދު އެ ކުއްޖާގެ އާއިލާއާ ވާހަކަ ދައްކަމުން ދާތީ ކަމަށެވެ. ނަމަވެސް އެ މައްސަަލަވެސް ކޮމިޝަނުން ބައްލަވާނޭ ކަމަށް ސުއޫދު ވިދާޅުވި އެވެ.