ޗެކް ރިޕަބްލިކްގައި ބޯޓު ދެލި ނަގާ މައިނެއްގައި ހިނގި މީތޭން ގޭސް އެކްސްޕްލޯޝަނެއްގެ ސަބަބުން 13 މީހަކު މަރުވެއްޖެއެވެ.
މިހާދިސާގައި މަރުވި މީހުންގެ ތެރެއިން 11 މީހުންނަކީ ޕޮލެންޑަށް ނިސްބަތްވާ މީހުން ކަމަށާއި ބާކީ ތިބި ދެމީހުންނަކީ ޗެކް ރިޕަބްލިކަށް ނިސްބަތްވާ މީހުންކަމަށް ރިޕޯޓުތައް ބުނެއެވެ.
މި ހާދިސާގައި އިތުރު 10 މީހަކު ޒަހަމްވެފައިވާއިރު އެކެއްގެ ހާލު ވަރަށް ނާޒުކެވެ. މައިނުގައި އިތުރު ބަޔަކު ތާށިވެފައި ތިބިތޯ ބެލުމަށް ކުރާ މަސައްކަތް ކުރިއަށް ނުގެންދެވޭ ކަމަށާއި އެކްސްޕްލޯޝަނުގެ ސަބަބުން މައިނުގެ ހާލަތު ވަރަށް ގޯސް ކަމަށްވެސް ރިޕޯޓުތައް ބުނެއެވެ.
މި ހާދިސާ ހިނގީ ބިމުގެ އަޑިން 800 މީޓަރުގައި ހުރި ކޯލް މައިނެއްގައެވެ. މިއީ 1990 ގެ ފަހުން ޗެކްރިޕަބްލިކްގައި ހިނގި މިފަދަ އެންމެ ހިތާމަވެރި ހާދިސާ އެވެ.