ކުރީގެ ރައީސް އަބްދުﷲ ޔާމީން ފުލުސް އޮފީހަށް ހާޒިރު ކުރި ދުވަހު ޕީޕީއެމްގެ ސަޕޯޓަރުންނާ އެކު ތިބި ޖުމްހޫރީ ޕާޓީގެ ތިން މެންބަރުން ވަނީ ޕާޓީގެ އުސޫލުތަކާ ހިލާފުވެފައި ކަމަށާއި އެ މައްސަލަ ބަލަމުން އަންނަ ކަމަށް ޖޭޕީގެ ޕާލިމެންޓްރީ ގްރޫޕްގެ ލީޑަރު އަބްދުﷲ ރިޔާޒު ވިދާޅުވެއްޖެ އެވެ.
މިދިޔަ ހޮނިހިރު ދުވަހު ކުރީގެ ރައީސް ޔާމީން ފުލުސް އޮފީހަށް ހާޒިރު ކުރި އިރު އެމަނިކުފާނުގެ ދިފާއުގައި އަޑުއުފުލަމުން ދިޔަ ޕީޕީއެމްގެ ސަޕޯޓަރުންގެ ތެރޭގައި ތިބި ޖޭޕީގެ ތިން މެންބަރުންނަކީ ދާދި ފަހުން ޕީޕީއެމުން ވަކިވި ވިލުފުށީ ދާއިރާގެ މެމްބަރު ރިޔާޒް ރަޝީދާއި ތ. ގުރައިދޫ ދާއިރާގެ މެމްބަރު ހުސެއިން މަނިކު ދޮންމަނިކާއި ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފެވެ.
ވީޓީވީގެ ފަސް މަންޒަރު ޕްރޮގްރާމްގައި ރޭ ވާހަކަ ދައްކަވަމުން ރިޔާޒު ވިދާޅުވީ، ޖޭޕީގެ އެއްވެސް މެންބަރެއް އެ ޕާޓީން ހަދާފައިވާ އުސޫލުތަކާ ހިލާފުވެގެން ނުވާނެ ކަމަށާއި ޙާއްސަކޮށް ޖޭޕީ ހިމެނޭ ކޯލިޝަން ސަރުކާރެއް އޮތް އިރު ސަރުކާރުން ކުރާ ކަންކަމަށް އެއްބާރުލުން ދޭން ޖެހޭނެ ކަމަށެވެ.
"މި ދެންނެވި ތިން މެންބަރުން އުސޫލުތަކާ ހިލާފަށް އެ ބޭފުޅުން ކުރެއްވި ކަމެއް. އެހަމަ މުޅިން ގޯސް ކާމެއް. އެކަންތައް އަޅުގަނޑު ހަމަގައިމު ވެސް ކުށްވެރި ކުރަން. އެ މައްސަލަ މިހާރު އޮންނާނީ ޖުމްހޫރީ ޕާޓީ ލީޑަރުގެ ސަމާލުކަމަށް ގެނައިސްފައި،" ކިނބިދޫ ދާއިރާގެ މެންބަރުކަން ވެސް ކުރައްވަމުން ގެންދަވާ ރިޔާޒު ވިދާޅުވި އެވެ.
ތިން މެންބަރުންގެ މައްސަލާގައި ޖޭޕީގެ ލީޑަރު ގާސިމް އިބްރާހިމް އެ ފަރާތްތަކާ ސުވާލު ކޮށްފައިވާކަން ރިޔާޒު ފާހަގަކުރެއްވި އެވެ.
"އެހެންވީމަ އެކަން ބަލާނެ އެކަން ބަލާފައި އަޅަން ޖެހޭ ފިޔަވަޅު އަޅާނެ ކަން އަޅުގަނޑަށް ޔަގީން،" ރިޔާޒު ވިދާޅުވި އެވެ.
މި ސަރުކާރުގެ ގެނައުމުގައި އެންމެ ބުރަ އެއް މަސައްކަތެއް ކޮށްފައި ވަނީ ޖޭޕީކަން ފާހަގަކޮށް ރިޔާޒު ވިދާޅުވީ، ސަރުކާރުގައި ތިއްބަވައި އިދިކޮޅު ޕާޓީއެއްގެ ދައުރެއް އަދައެއް ނުކުރެވޭނެ ކަމަށާއި ޖޭޕީ އޮންނަން ޖެހޭނީ ސަރުކާރަށް އެހީތެރިވެދިނުމަށް ކަމަށެވެ.
މިދިޔަ ސަރުކާރަކީ ރާއްޖޭގެ ތާރީހުގައި އެންމެ ބޮޑުތި ޖަރީމާތައް ހިންގި ސަރުކާރުން ކަމަށް ރިޔާޒު ވަނީ ތުހުމަތު ކުރައްވާފަ އެވެ. އަދި އެކަމުގެ އެންމެ އިސްކޮށް ހުންނެވީ ކުރީގެ ރައީސް ޔާމީން ކަމަށް ވެސް ރިޔާޒު ވަނީ ތުހުމަތު ކުރައްވާފަ އެވެ.
"އެވަރުގެ މީހަކަށް އެއްވެސް ހާލައްގައި ޖުމްހޫރީ ޕާޓީގެ މެންބަރަކު އަދި ޕާލިމެންޓްރީ ގްރޫޕްގެ މެންބަރަކު ވެސް ގޮސްގެން ވާނެ ކަމަކަށް އަޅުގަނޑު ގަބޫލެއް ނުކުރަން. އެއީ ހަމަ މުޅިން ޕާޓީގެ އުސޫލުތަކާއި ހިލާފް ކަމެއް. އެކަން ބެލެން ޖެހޭނެ އަދި އެކަމަށް އަޅަން ޖެހޭ ފިޔަވަޅެއް އަޅަން ޖެހޭނެ ކަމަށް އަޅުގަނޑު ގަބޫލު ކުރަނީ،" ރިޔާޒު ވިދާޅުވި އެވެ.