މާލޭގައި ދުއްވާ ކޮންމެ ކާރަކަށް ގަރާޖެއް ނެތް ނަމަ އެ ކާރުތަކުގެ ރަޖިސްޓްރީ އުވާލަން ޓްރާންސްޕޯޓް މިނިސްޓްރީ އިން ނިންމައިފިއެވެ.
މިއިދު ޓްރާންސްޕޯޓް މިނިސްޓްރީގައި ބޭއްވި ނޫސްވެރިންގެ ބައްދަލުވުމައި ޓްރާސްޕޯޓް މިނިސްޓަރު އައިޝަތު ނަހުލާ ވިދާޅުވީ، ކޮންމެ ކާރަކަށް ގަރާޖެއް ނެތް ކާރުތަކާއި، އޮޅުވާލާ، ގަވާއިދާ ހިލާފަށް ރަޖިސްޓްރީކޮށްފައިވާ ކާރުތަކުގެ ތަޖިސްޓްރީ އުވާލަން އެ މިނިސްޓްރީ އިން ނިންމާފައިވާ ކަމަށެވެ.
"މިހާރުވެސް ރަޖިސްޓްރޭޝަން ހައްދައިފައިވާ ކާރުތަކުގެ [ރަޖިސްޓްރީކުމުގައި] ވަރަށް ގިނަ މައްސަލަ އެބަ ހުރި. އެއްގަރާޖަކައް އެތައް ބައިވަރު ކާރުތައް ރަޖިސްޓްރީ ކުރުމާއި މިކަހަލަ ކަންތައް ހިނގައިފާ އެބަ ހުރި،" މިނިސްޓްރު ނަހުލާ ވިދާޅުވިއެވެ.
"އަޅުގަނޑުމެން މި އޮންނަ ގާނޫނީ އިމުގެ ތެރެއިން ،އުސޫލުގެ ދަށުން، އަޅުގަނޑުމެން އިސްޕެކްޝަން ޓީމެއް ކަނޑައަޅާ އެތަންތަން ބަލާ، ގަވާއިދާ ހިލާފަށް ރަޖިސްޓްރީ ކޮށްފައިވާ ކާރުތަކުގެ ރެޖިސްޓްރީތައް އުވާލާނަން،"
ނަހުލާ ވިދާޅުވީ ރައްޔިތުންގެ ފަރާތުން އެމިނިސްޓްރީއަށް އެންމެ ބޮޑަށް ލިބޭ ޝަކުވާއަކީ ގަރާޖު ސިޓީގެ މައްސަލަ ކަމަށާއި މިހާރު އެކަންތައްތަކައް ހައްލެއް ހޯދުމަށް ޓީމެއް ނަގައިފައިވާ ކަަމަށެވެ.
ޓްރާސްޕޯޓް މިނިސްޓަރު އައިޝަތު ނަހުލާ ނޫސްވެރިންނަށް މައުލޫމާތު ދެއްވަނީ -- ސަން ފޮޓޯ/ އަހުމަދު އަވްޝަން އިލްޔާސް
އަދި އޮޅުވާލައިގެން ގަވާއިދާ ހިލާފަށް މީގެ ކުރިން ރަޖިސްޓްރީ ކުމުގައި ޝާމިލުވާ ފަރާތްތަކަކީ "ކޮންމެ ފެންވަރެއް ކޮންމެ ބަޔެއް" ކަމުގައި ވީ ނަމަވެސް އެ ފަރާތްތަކާ މެދުވެސް ފިޔަވަޅު އެޅުމަށް ރައީސް އިބްރާހިމް މުހައްމަދު ސޯލިހް އަންގަވާފައިވާ ކަމަށް މިނިސްޓަރު ނަހުލާ ވިދާޅުވިއެވެ.
މާލެގައި އެއްގަމު ދަތުރުފަތުރުފަތުރު ކުރާ އިންޖީނުލީ އުޅަދުތައް ރަޖިސްޓްރީ ކުރުމާބެހޭ ގަވައިދުގައިވާ ގޮތުން، ދެ ފުރޮޅަށްވުރެ ގިނަ ފުރޮޅުލީ އުޅަދުތައް ރަޖިސްޓްރީ ކުރުމަށް ލިޔުން ހުށަހަޅާއިރު، އެ އުޅަނދު ޕާކްކޮށްފައި ބާއްވާނެ ގަރާޖެއްގައި ހުންނަން ވާނެ އެވެ.
ޓްރާންސްޕޯޓް އޮތޯރިޓީ އިން މިހާތަނަށް އަމަލުކޮށްފައިވަނީ ކޮންމެ ކާރަކަށް ވެސް 100 އަކަ ފޫޓްގެ ޖާގައެއް އެ ގަރާޖެއްގައި ހުންނަން ވާނެ ގޮތަށެވެ. އަދި ޖާގަ އޮތް ނަމަ ގަރާޖަކަށް ދެ ކާރުވެސް ރަޖިސްޓްރީ ކުރެވިދާނެ ކަމަށް އެ އޮތޯރިޓީ އިން ބުންޏެވެ.
ޓްރާސްޕޯޓް މިނިސްޓަރު އައިޝަތު ނަހުލާ ނޫސްވެރިންނަށް މައުލޫމާތު ދެއްވަނީ -- ސަން ފޮޓޯ/ އަހުމަދު އަވްޝަން އިލްޔާސް
ނޫސްވެރިންގެ ބައްދަލުވުމުގައި އިތުރަށް ވާހަކަ ދައްކަވަމުން ނަހުލާ ވިދާޅުވ،ީ ޓެކްސީގެ ހާލަތުތައް ގޯސްކަމަށް ބުނެ ވަރަށް ގިނަ އާންމު ރައްޔިތުންގެ ޝަކުވާ ވެސް އަންނަމުންދާ ކަމަށާއި ޓެކްސީ ތަކުގެ ފެންވަރު ރަގަޅުކުރުމަށް، ކާރުތަކުގެ އިސްވެރިންނާ ވާހަކަ ދެކެވި އެއްބަސްވާ ގޮތެއްގެ މަތީން 15 އަހަރު ނުވަތަ 20 އަހަރުވެފައިވާ ކާރުތަކުގެ ރެޖިސްޓްރީ ވެސް އުވާލަން ނިންމާފައިވާ ކަމަށެވެ.
"ކާރު ދުއްވާ ފަރާތްތަކާވެސް ވާހަކަ ދައްކާ، އެއްބަސްވާ ގޮތެއްގެ މަތީން، 15 ނުވަތަ 20 އަހަރުވެފައިވާ ކާރުތައް އުވާލަން އަޅުގަނޑުމެން ގަސްތުކުރަން،" މިނިސްޓަރު ނަހުލާ ވިދާޅުވިއެވެ.
ނަހުލާ ވިދާޅުވީ، ކުޑަކުދިން ބޮޑުވާ މާހައުލެއްގައިި އެހާ ގިނަ ކާރުތަކައި ސައިކަލުތައް ތޮއްޖެހުމުގެ ސަބަބުން ތިމާވެއްޓަށް ވަރަށް ނޭދެވޭ ގެއްލުންތަކެއް އިތުރުވާ ކަމަށާއި އެކަމުގެ ސަބަބުން ސާފު ވެއްޓެއްގައި ނޭވަލުމަށް ކުދީންނަށް ފުރުސަރު ނުލިބޭ ކަމަށެވެ. އަދި އެކަމަށް ހައްލެއް ގެނައުމަށް ތިމާވެއްޓާ ރަށްޓެހި ވެހިކަލްތައް ތައާރަފް ކުރުމަށް ވިސްނުން ގެންގުޅުއްވާ ކަމަށް މިނިސްޓަރު ވިދާޅުވިއެވެ.