ހުޅުމާލޭގައި ތަރައްގީކުރާ އިކޮނޮމިކް ޒޯނުގެ ޑިޒައިން ކުރަހަން ހުޅުވާލި ފުރުސަތުން އެއްވަނަ ޗައިނާގެ އާކިޓެކްޗާ ކުންފުންޏަކުން ހޯދައިފި އެވެ.
ސީއޭއޭ ކިޔާ މި ކުންފުނިން ބުނީ މި އިކޮނޮމިކް ޒޯނުގެ މަސައްކަތް 2021ގައި ނިންމަން ޖެހޭ ކަމަށާއި އެއާ އެކު ރާއްޖޭގެ ލޭންޑްމާކް ސަރަހައްދަކަށް އެތަން ވާނެ ކަމަށެވެ.
ސީއޭއޭ އިން ހުށަހެޅި ކުރެހުން -- ފޮޓޯ: ސީއޭއޭ
ރާއްޖޭގެ ކަނޑުގެ ސަރަހައްދާއި، ގުދުރަތީ ރީތިކަން ފެންނަގޮތަށް ޑިޒައިންކޮށްފައިވާ އެ ކުރެހުމަކީ މޫސުމަށް އަންނަ ބަދަލުތަަކުގެ ސަބަބުން ރާއްޖެއަށް އޮތް ނުރައްކާ ކުޑަވާނެގޮތަކަށް ކޮށްފައިވާ ޑިޒައިނެއްކަމަށް ސީއޭއޭ އިން ބުނެ އެވެ. އެކުންފުނިން މި ޑިޒައިނަށް ދީފައިވާ ނަމަކީ "އޯޝަން ހެވެން" އެވެ.
އެކުންފުނިން ބުނެފައި ވަނީ މި ޑިޒައިން އަކީ އިއާދަކުރުވަނިވި ހަކަތަ ބޭނުންކުރެވޭނެހެން، ދެމެހެއްޓެނިވި ތަރައްގީއަށް ވިސްނައިގެން ކޮށްފައިވާ ޑިޒައިނެއް ކަމަށެވެ.
ސީއޭއޭ އިން ހުށަހެޅި ކުރެހުން -- ފޮޓޯ: ސީއޭއޭ
މި އިކޮނޮމިކް ޒޯނު ތަރައްގީކުރަން ހަވާލުކޮށްފައި ވަނީ ޗައިނާގެ ބެއިޖިން އާބަން ކޮންސްޓްރަކްޝަން ގްރޫޕު (ބީޔޫސީޖީ) އާއެވެ. އެ ކުންފުންޏަކީ މިހާރު ވެސް ރާއްޖެގައި ބޮޑެތި މަޝްރޫއުތަކެއް ހިންގަމުންދާ ކުންފުންޏެކެވެ.
ސީއޭއޭ އިން ހުށަހެޅި ކުރެހުން -- ފޮޓޯ: ސީއޭއޭ
ހުޅުމާލޭގައި އެއްލައްކަ އަކަމީޓަރު ހިއްކައި، 60،000 އަމަކީޓަރުގެ ސަރަހައްދެއްހައި ތަރައްގީކުރާ މި އިކޮނޮމިކް ޒޯނުގައި އެއާޕޯޓު ކޮމްޕެނީ ސާވިސް ސެންޓަރަކާއި އިމްޓަނެޝަނަލް ޓްރޭޑް ސެންޓަރެއްގެ އިތުރުން ސެންޓްރަަލައިޒްޑް ރީޓެއިލް ޝޮޕިން އަދި ޑައިވިން އެކްސްޕީރިއަންސް، ކަލްޗްރަލް ޕްލާޒާ ފަދަ ހިދުމަތްތައް ހިމެނޭނެ އެވެ.
މިތަން ތަރައްގީކުރާނީ ދެ ފިޔަވައްސަކަށް ބަހާލައިގެންނެވެ.
ސީއޭއޭ އިން ހުށަހެޅި ކުރެހުން -- ފޮޓޯ: ސީއޭއޭ
ސީއޭއޭގެ ޑިޒައިނަކީ އެއްގަމުންނާއި ކަނޑުުމަގުން ވެސް އެ ތަނަށް ދަތުރުކުރެވޭ ގޮތަށް ތައްޔާރުކޮށްފައިވާ ޑިޒައިނެކެވެ. މި އިކޮނޮމިކް ޒޯނަށް ބޭނުންވާ ހަކަތައިގެ 70 ޕަސެންޓު ވާރޭ ފެނާއި އިރުގެ އަވި އަދި ކަނޑުގެ އޮއިވަރުން އުފެއްދޭނެ ކަމަށް ވެސް ބުނެފައިވެ އެވެ.