ސެލްމިން އެނިމޭޝަން ސްޓޫޑިއޯއިން ތައްޔާރުކުރި ފުރަތަމަ އެނިމޭޓެޑް ފިލްމު "ބަގީޗާ" އިންތިހާބީ ރައީސް އިބްރާހިމް މުހައްމަދު ސޯލިހް މިއަދު ޕްރެމިއާ ކޮށްދެއްވައިފިއެވެ.
މި ފިލްމު ޕްރިމިއާ ކޮށްފައިވަނީ ހުޅުމާލޭގައި ހުންނަ ޝްވެކް ސިނަމާގައެވެ. މި ފިލްމަކީ ދިވެހިންގެ ދިރިއުޅުން ދައްކައިދޭ ފިލްމެކެވެ. އެއް ގަޑިއިރުގެ މި ފިލްމަކީ ކުޑަކުދިންނާއި ބޮޑެތިމީހުންވެސް ބެލުން އެކަށީގެންވާ ފިލްމެކެވެ.
މި ފިލްމާ ގުޅޭގޮތުން އިންތިހާބީ ރައީސް އިބްރާހިމް މުހައްމަދު ސޯލިހު ވިދާޅުވީ ބަގީޗާއަކީ އެނިމޭޓެޑް ފިލްމެއްގައި ހުންނަންޖެހޭ ހުރިހާ ރަހައެއް އެކުލެވޭ ފިލްމެއް ކަމަށެވެ. ބޭރުގެ ސްޓޫޑިއޯ އަކުން އުފައްދާނަމަ އެތައް މިލިއަން ޑޮލަރެއް މިފަދަ ފިލްމަކަށް ހަރަދުކުރާނެ ކަމަށް އިބޫ ވިދާޅުވިއެވެ. މިއީ ރާއްޖޭގެ އާޓިސްޓުންގެ ހުނަރު ފެނިގެންދާ ފިލްމެއް ކަމަށްވެސް އިބޫ ވިދާޅުވިއެވެ.
މި ފިލްމަކީ މާކަނާ ޝޯ އުފެއްދި ސްޓޫޑިއޯ ސެލްމިންގެ އުފެއްދުމެކެވެ. ސެލްމިންގެ މޭސްތިރިޔާ ޔާމީން ރަޝީދު ބުނީ ބަގީޗާ ފިލްމުގެ ވާހަކައާ ފިލްމުގެ ޑައިލޮގުތަކަށް އަޑު އަޅާފައި ހުންނަތާ ފަސް އަހަރުވެފައިވާ ކަމަށާއި ފިލްމުގެ އެނިމޭޝަން މަސައްކަތް ފެއްޓީ މިއަހަރުގެ ފެބްރުއަރީމަހު ކަމަށެވެ.
މި ފިލްމު މާލޭގެ ޝްވެކް ސިނަމާގައި އަޅުވަންވަންވެސް ވަނީ ނިންމައިފައެވެ.