ކުއަލަލަމްޕޫރު (އޮކްޓޯބަރު 4): މެލޭޝިއާގެ ކުރީގެ ބޮޑުވަޒީރު ނަޖީބު ރައްޒާގުގެ އަނބިކަނބަލުން ރޮސްމާ މަންސޫރުގެ މައްޗަށް މަނީ ލޯންޑަރިންނާއި ޓެކުހަށް މަކަރު ހެދުމުގެ 17 ދައުވާކޮށްފި އެވެ.
މެލޭޝިއާގެ އެންޓި ކޮރަޕްޝަން ކޮމިޝަން (އެމްއޭސީސީ)އިން އިއްޔެ ހައްޔަރު ކުރި ރޮސްމާގެ މައްޗަށް އެދައުވާތައް ކުރީ އެގައުމުގެ އިންވެސްޓުމެންޓު ފަންޑު ވަންއެމްޑީބީގެ ކޮރަޕްޝަނުގެ މައްސަލައިގަ އެވެ.
އެމައްސަލައިގައި ރޮސްމާއާ ވަނީ ތިން ފަހަރެއްގެ މަތިން ސުވާލުކޮށްފަ އެވެ. އަދި މިއަދު ކޯޓުން ނިންމި ގޮތުގައި އޭނާ ކަފާލާތުގެ ދަށުން ދޫކުރާނީ 482،500 ޑޮލަރު ދެއްކުމުންނެވެ. ރޮސްމާ ވަނީ އޭނާގެ މައްޗަށް ކޮށްފައިވާ ދައުވާތަކަށް އިންކާރު ކުރައްވާފަ އެވެ.
ވަންއެމްޑީބީގެ ކޮރަޕްޝަނުގެ މައްސަލައިގައި ރޮސްމާގެ އިތުރުން ނަޖީބުވެސް މިއަދު ކޯޓަށް ހާޒިރު ކުރާނެ އެވެ. އޭނާގެ މައްޗަށް ވަނީ މަނީ ލޯންޑަރިން އާއި ބާރުގެ ބޭނުން ނަހަމަ ގޮތުގައި ބޭނުން ކުރުމުގެ 32 ދައުވާއެއްކޮށްފަ އެވެ.
އެމެރިކާގެ ޖަސްޓިސް ޑިޕާޓްމެންޓުން ތުހުމަތުކުރާ ގޮތުގައި 1އެމްޑީބީ ފަންޑުން ވަނީ 4.5 ބިލިއަން ޑޮލަރު ޑައިވާޓުކޮށް، ލޯންޑާކޮށްފައެވެ. އަދި އެފަންޑުން ވަނީ 700 މިލިއަން ޑޮލަރާ ގާތް ކުރާ ވަރަށް ފައިސާ ނަޖީބުގެ އަމިއްލަ އެކައުންޓަށް ޖަމާކޮށްފައި ކަމަށް ވޯލް ސްޓްރީޓް ޖާނަލްއިން 2015 ވަނަ އަހަރު ތުހުމަތުކުރިއެވެ.
ނަމަވެސް މެލޭޝިއާގެ ކޯޓަކުން ވަނީ އެ 700 މިލިއަން ޑޮލަރަކީ ސައުދީ ޝާހީ އާއިލާއިން، ނަޖީބަށް އެރުވި ހަދިޔާއެއް ކަމަށް ނިންމާފައެވެ.
ވަންއެމްޑީބީގެ މައްސަލަ އަނެއްކާވެސް ތަހުގީގު ކުރަން ފެށީ މިދިޔަ މެއި މަހު އެގައުމުގައި ބޭއްވި ރިޔާސީ އިންތިހާބުން ނަޖީބު ނާކާމިޔާބުވެ، ބޮޑުވަޒީރު ކަމަށް މަހާތިރު މުހައްމަދު ވަޑައިގަތުމުންނެވެ. (އަލްޖަޒީރާ)