މިއަދަކީ 1439 ވަނަ އަހަރުގެ އަރަފާތު ދުވަހެވެ. ހައްޖުގެ މަތިވެރި ރުކުން ފުރިހަމަ ކުރުމަށް ސައުދީ އަރަބިއްޔާ އަށް ގޮސް ތިބި ހައްޖާޖީން ވަނީ އަރަފާތު ބިމަށް ޒިޔާރަތް ކުރަން ފަށައިފަ އެވެ. އަރަފާތު ބިމަށް ޒިޔާރާތްކުރުމަކީ ހައްޖުގެ ރުކުންތަކުގެ ތެރޭގައި ހިމެނޭ އެންމެ މުހިއްމު ރުކުނެވެ. އެއާ ނުލައި ހައްޖުގެ މާތް އަޅުކަން ފުރިހަމަ ނުކުރެވޭނޭ ރުކުނެކެވެ.
އަރަފާތު ދުވަހުގެ އިރު އޮއްސުމުގެ ކުރީން އަރަފާތު ބިމަށް ނުދެވިއްޖެ ނަމަ ހައްޖުގެ އަޅުކަން ފުރިހަމައެއް ނުވާނެ އެވެ. އެހެންކަމުން މި މުހިއްމު ރުކުން އަދާކުރުމަށް ހައްޖުގައި ބައިވެރިވާ އެންމެން މިއަދު އަރަފާތަށް ޖަމާވާން ޖެހޭނެ އެވެ.
ދެ މިލިއަނަށް ވުރެ ގިނަ މުސްލިމުން މިއަހަރުގެ ހައްޖުގެ އަޅުކަން އަދާކުރުމަށް ސައުދީ އަށް ގޮސްފައިވާއިރު އަރަފާތު ބިމުގައި އަޅުކަން ކުރުމުގައި މުސްލިމުން ވަގުތު ހޭދަކުރާނެ އެވެ.
ހައްޖުގެ އަޅުކަން އަދާ ކުރުމަށް މައްކާ އަށް ދިއުމުގެ ނަސީބު ނުލިބޭ މުސްލިމުންނަށް ވެސް މި މާތްދުވަހުގެ ބޭނުން ހެޔޮގޮތުގައި ހިފިދާނެ އެވެ. އަރަފާތު ދުވަހުގެ ރޯދައަކީ އިސްވެ ގޮސްފައިވާ އަހަރާއި ކުރިއަށް އޮތް އަހަރުގެ ފާފަތައް ފުއްސަވާނެ ރޯދައެއް ކަމަށް ރިވާވެގެން ވެއެވެ.
އަރަފާތު ބިމުގައި މިއަދު އިރު އޮއްސެންދެން އަޅުކަންކުރުމުގައި ހޭދަކުރުމަށް ފަހު ދެން ހައްޖުވެރީން ޒިޔާރަތްކުރާނީ މުޒްދަލިފާއަށެވެ.
ހައްޖުގެ ކަންތައްތަކާ ގުޅޭ ސައޫދީ ވުޒާރާއިން މައުލޫމާތުދޭ ގޮތުގައި މިއަހަރުގެ ހައްޖުގެ މާތް އަޅުކަން އަދާކުރުމަށް ދެމިލިއަނަށް ވުރެ ގިނަ މީހުން މައްކާއަށް ޒިޔާރާތްކުރާއިރު، އެ އެންމެންގެ ސަލާމަތާ ރައްކާތެރިކަމާއެކު ހައްޖުގެ އަޅުކަން އަދާކުރުމަށް ސައުދީ ފަރާތްތަކުން ވަނީ ވަރަށް ފުރިހަމައަށް ތައްޔާރުވެފައެވެ.