އިންޑިއާއަށް ކުރަމުންދާ ވިއްސާރާގައި ކޮޗިންގައި ފެންބޮޑުވެ އާންމު ހާލަތަށް ދަތިވެފައިވާތީ 219 ދިވެއްސަކު ޓްރިވެންޑަރަމަށް ބަދަލުކޮށްފި އެވެ.
ކޮޗިންއިން ޓްރިވެންޑްރަމްއަށް ބަދަލު ކުރި މީހުންގެ ތެރޭގައި ބޭސްފަރުވާއަށް ކޮޗިންގެ އަމްރިތާ ހޮސްޕިޓަލަށް ގޮސް ތިބި މީހުންވެސް ހިމެނެ އެވެ.
ކޮޗިންއިން ޓްރިވެންޓްރަމްއަށް ހަތް ބަހެއްގައި ޖުމްލް 219 ދިވެހިން ބަދަލުކޮށްފައިވާ ކަމަށް ޓްރިވެންޑްރަމްގައި ހުންނަ ރާއްޖޭގެ ކޮންސިއުލޭޓުން ބުންޏެވެ. ކޮޗިންއިން ޓްރިވެންޑްރަމްއަށް ދާން ބޭނުންވާ ދިވެހިންނަށް ބަސް ހަމަޖައްސައިދިނީ ކޮންސިއުލޭޓުންނެވެ.
ކޮންސިއުލޭޓުން ހަމަޖައްސައިދެނީ ހަމަ އެކަނި ބަހުގެ ހިދުމަތެވެ. ޓްރިވެންޑްރަމްގައި ތިބުމުގެ ހިދުމަތާއި އެހެން ހިދުމަތްތައް ފޯރުކޮށެއް ނުދެ އެވެ.
އިންޑިއާގެ ކެރަލާއަށް ކުރަމުންދާ މޫސުމީ ވިއްސާރާގައި ބޯކޮށް ވާރޭ ވެހި، ފެންބޮޑުވުމުގެ ސަބަބުން 167 މިހާތަނަށް މަރުވެފަ އެވެ.
ކެރަލާގައި ފެންބޮޑުވެފައިވާ ސަރަހައްދުތަކުގައި ރެސްކިއު ވޯކަރުން ދަނީ ހެލިކޮޕްޓަރާއި ބޯޓު ބޭނުންކޮށްގެން މީހުން ސަލާމަތް ކުރުމުގެ މަސައްކަތް ކުރަމުންނެވެ. އެސްޓޭޓުގެ 150،000 އަށް ވުރެ ގިނަ މީހުން މިހާރު ވަނީ އެހީ ފޯރުކޮށްދޭ ކޭމްޕުތަކަށް ބަދަލުކޮށްފަ އެވެ.
އިންޑިއާގެ މީޓިއޮރޮލޮޖިކަލް ސެންޓަރުން ބުނާ ގޮތުގައި އާދިއްތަ ދުވަހާ ޖެހެންދެން ކެރަލާއަށް ބޯކޮށް ވާރޭ ވެހެމުންދާނެ އެވެ.
ކެރަލާގެ ޗީފް މިނިސްޓަރު ވިދާޅުވި ގޮތުގައި އެއީ 1924 ވަނަ އަހަރުގެ ފަހުން އެ ސްޓޭޓަށް މޫސުމީ ވިއްސާރައިގެ ސަބަބުން އެހާވަރަށް ގެއްލުން ލިބުނު ފުރަތަމަ ފަހަރެވެ.