ސެމްސަންގުން އެންމެ ފަހުން ނެރުނު ފޯން، ގެލެކްސީ ނޯޓް 9ގެ ޕްރީ އޯޑަރު، އުރީދޫން ނަގަން ފަށައިފި އެވެ.
އުރީދޫން ބުނީ، ރެއިން ފެށިގެން ޕްރީއޯޑަރުތައް ނަގަމުން އަންނަ ކަމަށެވެ. އަދި އެ ކުންފުނީގެ ޕޯސްޓްޕެއިޑް ކަސްޓަމަރުންނަށް މަހުން މަހަށް ފައިސާ ދައްކާ ގޮތަށް އިންސްޓޯލްމަންޓަށް ނޯޓް 9 ގަނެވޭނެ ކަމަށް އެ ކުންފުނިން ބުނެ އެވެ.
އިންސްޓޯލް މަންޓަށް ނަގާ މީހުންގެ ތެރެއިން ހަ މަސް ދުވަހުގެ ތެރޭގައި ފައިސާ ދައްކާ ނަމަ ކޮންމެ މަހަކު ފަސް ޖީބީގެ ހިލޭ ޑޭޓާ ލިބޭނެ އެވެ. އަދި 12 މަސް ދުވަހުން ފައިސާ ދައްކައި ނިންމާ ގޮތަށް ނަގާ މީހުންނަށް ކޮންމެ މަހަކު ދެ ޖީބީގެ ހިލޭ ޑޭޓާ ލިބޭނެ އެވެ.
ޑޭޓާގެ އިތުރުން، ޕްރީއޯޑަރު ކުރާ ކޮންމެ މީހަކަށް ވެސް، އޭކޭޖީ ބްލޫޓޫތު ސްޕީކަރެއް ހިލޭ ދޭނެ ހަމަޖެހިފައިވާ ކަމަށް އުރީދޫން ބުނެ އެވެ.
ފުލް ޕޭމަންޓް ދައްކައިގެން އުރީދޫގެ ހުރިހާ ކަސްޓަމަރުންނަށް ވެސް ނޯޓް 9 ގަނެވޭނެ އެވެ. ނުވަތަ ޕޯޓްޕެއިޑަކަށް ބަދަލު ކުރުމަށް ފަހު އިންސްޓޯލްމަންޓަށް ފޯނު ނެގުމުގެ ފުރުސަތު އޮންނާނެ ކަމަށް އެ ކުންފުނިން ބުނެ އެވެ.
އުރީދޫން ޕްރީ އޯޑަރަށް ހުޅުވާލި ނޯޓް 9ގެ ފޯންތަކުގެ ތެރޭގައި 128 އަދި 512 ޖީބީގެ ފޯން ހިމެނެ އެވެ. އަދި ނޯޓް 9ގެ ތިން ކުލަ ކަމަށްވާ މިޑްނައިޓް ބްލެކް، އޯޝަން ބްލޫ އަދި މެޓަލިކް ކޮޕާ އުރީދޫން ލިބޭނެ އެވެ.
ނޯޓް 9 ގެ ފޯނު ވިއްކާ އަގުތަކާއި، އިންސްޓޯލްމެންޓަށް ދޫކުރާ އަގުތަކާއި އަދި އެހެނިހެން މައުލޫމާތުތައްއު އުރީދޫގެ ވެބްސައިޓުން މިހާރު ބަލައިލެވޭނެ އެވެ. އަދި އޮންލައިންކޮށް ޕްރީއޯޑަރު ވެސް ކުރެވޭނެ އެވެ.