ޖަރުމަނުގެ ފުޓުބޯޅަ އިދާރާއިން ނަސްލީގޮތުން ތަފާތު ކުރުމާއި، އެހެނިހެންވެސް ގޮތް ގޮތުން ގަދަރު ކުޑަކުރި ކަމަށްބުނެ ގައުމީ ޓީމަށް ކުޅުން ހުއްޓާލިކަން މެސުޓް އޮޒިލް އިއުލާން ކޮށްފައިވާ އިރު، އޭނާގެ ދިފާއުގައި ގިނަ ބަޔަކު ޖަރުމަނުގެ ބާލިންގެ މަގުތަކަށް ނުކުމެއްޖެއެވެ.
އޮޒިލްގެ އުފަން ގައުމު ކަމަށްވާ ތުރުކީވިލާތުގެ ދިދައާއި ޖަރުމަނުގެ ދިދަތަކުގެ އިތުރުން އޮޒިލްއަށް ހިތްވަރު ލިބޭ ކަހަލަ ބަސްތައް ބޭނުންކޮށްފައިވާ ޓީޝާޓްތަކާއެކު އެއްތައް ސަތޭކަ ބަޔަކު ޖަރުމަނުގެ މަގުތަކަށް އިއްޔެ ވަނީ ނުކުމެފައެވެ. ސަޕޯޓަރުން ބުނެފައި ވަނީ ގައުމީ ޓީމުން އޮޒިލްއާ ދޭތެރޭ ކަންތައް ކުރީ ރަނގަޅަށް ނޫން ކަމަށާއި، އޮޒިލްއަކީ ކޮންމެ ނަސްލަކަށް ނިސްބަތްވާ މީހެއް ނަމަވެސް، އޭނާ ގައުމީ ޓީމަށް ކޮށްދީފައި ވަނީ އަގުހުރި ހިދުމަތެއް ކަމަށެވެ.
ގައުމީ ޓީމުން ރިޓަޔާ ކުރިކަން އިއުލާންކޮށް އާސެނަލްގެ މިޑްފީލްޑަރު އޮޒިލް ނެރުނު ރަސްމީ ބަޔާނުގައި އޭނާ ބުނެފައި ވަނީ ޖަރުމަނުގެ ފުޓުބޯޅަ އިދާރާއިން އޭނާއާ ދޭތެރޭ ކަންތައްތައް ބެހެއްޓި ގޮތުން ގައުމީ ޓީމަށް ކުޅެން އޭނާ ބޭނުން ނުވާ ކަމަށެވެ.
ވޯލްޑް ކަޕަށް ތައްޔާރުވަމުން ދަނިކޮށް، މިދިޔަ މޭ މަހު ތުރުކީގެ ރައީސް ރަޖަބު ތައްޔިބު އުރުދުގާންއާއެކު އޮޒިލް ނެގި ފޮޓޯއަކާ ގުޅިގެން ޖަރުމަނުގެ ފުޓުބޯޅަ އިދާރާއިން އެކަން ވަނީ ކުށްވެރިކޮށްފައެވެ. އަދި ޖަރުމަނުގެ ގިނަ ނޫސްވެރިންވެސް ވަނީ އޮޒިލްގެ ހިތުގައި ޖަރުމަނަށް އޮތް ލޯތްބާ ގުޅޭގޮތުން ސުވާލު އުފައްދާފައެވެ.
އޮޒިލްއާއި މެންޗެސްޓާ ސިޓީގެ އިލްކޭ ގުންޑޮގާންވެސް ތުރުކީގެ ރައީސާއެކު ފޮޓޯ ނަގާފައިވާ އިރު، އޭރު އުރުދުގާން ދިޔައީ އޭނާގެ ދެވަނަ ދައުރަކަށް ކެމްޕެއިން ކުރައްވަމުންނެވެ. އަދި އޭނާގެ ކެމްޕޭނުގައި އެ ފޮޓޯ ބޭނުންވެސް ކޮށްފައިވެއެވެ.
އޮޒިލް ބުނެފައި ވަނީ އޭނާ އުރުދުގާންއާއެކު ފޮޓޯ ނެގީ ސިޔާސީ ބޭނުމެއްގައި ނޫން ކަމަށާއި، ވޯޓަށް އޭގެ ސަބަބުން އަސަރުކުރާނެ ކަމަށް ނުބެލޭ ކަމަށެވެ. އަދި ތުރުކީއަކީ އޭނާގެ އުފަން ގައުމަށްވެފައި، އެގައުމުގެ ރައީސާއެކު ފޮޓޯއަކަށް ހުއްޓުމަކީ އޭނާއަށް ސަގާފީ ކަމެއް ކަމަށްވެސް އޮޒިލްގެ ބަޔާނުގައި ބުނެފައިވެއެވެ.
އޮޒިލް އިތުރަށް ބުނެފައި ވަނީ އޭނާގެ އުފަން ގައުމު ހަނދާން ނައްތާނުލާނެ ކަމަށެވެ. އެހެން ނަމަވެސް އޭނާގެ ހިތުގައި ޖަރުމަނަށް އޮތް ލޯބި އެ ފޮޓޯގެ ސަބަބުން މިނެކިރާލަން އުނދަގޫވާނެ ކަމަށްވެސް އޮޒިލް ބުނެފައިވެއެވެ.
އޮޒިލްގެ ރިޓަޔާމަންޓް އިއުލާން ކުރަމުން އޭނާ ބުނެފައި ވަނީ ޖަރުމަނު މޮޅުވާނަމަ އޭނާ ވަނީ ޖަރުމަނު މީހަކަށް ނަމަވެސް، ބަލިވާ ހާލަތު އޭނާ ވަނީ ހިޖުރަކޮށްފައިވާ ތުރުކީގެ މީހަކަށް ކަމަށެވެ. އަދި ސަޕޯޓަރުންގެ ފަރާތުން އޭނާއާއި އާއިލާއަށް މަރުގެ އިންޒާރުތަކާއި ނަސްލީ ގޮތުން ދިމާކުރުންތައް އައިސްފައިވާ ކަމަށްވެސް އޮޒިލްގެ ބަޔާނުގައި ބުނެފައިވެއެވެ.
އެހެން ނަމަވެސް އެކަންކަން ޖަރުމަނުގެ ފެޑަރޭޝަނުން ވަނީ ކުށްވެރިކޮށްފައެވެ.
ޖަރުމަނުގެ ގައުމީ ޓީމަށް އޮޒިލް ކުޅުން ހުއްޓާލާފައިވާ އިރު، އޭނާ ވަނީ ގައުމީ ޓީމަށް 90 އަށްވުރެ ގިނަ މެޗު ކުޅެދީ 23 ގޯލް ޖަހައިފައެވެ. އާއްމުކޮށް ގޯލަށް އެސިސްޓް ކުރުމަށް ހުނަރުވެރި ކުޅުންތެރިއެއްގެ ގޮތުގައި ފާހަގަކުރެވޭ އޮޒިލް ވަނީ ގައުމީ ޓީމުގެ 40 ގޯލަށް އެސިސްޓް ކޮށްދީފައެވެ.
ޖަރުމަނު ގައުމީ ޓީމާއެކު 2014 ވަނަ އަހަރުގެ ވޯލްޑް ކަޕް އުފުލާލި އޮޒިލް ވަނީ ފަސް ފަހަރަށް ޖަރުމަނުގެ އެންމެ މޮޅު ކުޅުންތެރިޔާގެ މަގާމުވެސް ހޯދައިފައެވެ.