އޭޝިއާގެ ގައުމުތަކުގެ ތެރެއިން ޓެކުހުގެ ދާއިރާއިން ފާހަގަކޮށްލެވޭ ލަނޑުދަނޑިތައް ހާސިލްކޮށްފައިވާ ފަރާތްތައް ފާހަގަކޮށް، އިންޓަނޭޝަނަލް ޓެކްސް ރިވިއު (އައިޓީއާރު)އިން ދޭ "އޭޝިއާ ޓެކްސް ކޮމިޝަނަރު އޮފް ދަ އިޔާ"ގެ އެވޯޑު ލިބުނު ރާއްޖޭގެ ކޮމިޝަނަރު ޖެނެރަލް އޮފް ޓެކްސޭޝަން ޔަޒީދު މުހައްމަދުގެ އަގު ވަޒަންކޮށް އޭނާއަށް ރައީސް އިނާމު ދެއްވައިފިއެވެ.
ޔަޒީދަށް އިނާމު ދެއްވީ މިނިވަން ދުވަހުގެ މުނާސަބަތުގައި ޖުމްހޫރީ މައިދާނުގައި ރޭ ބޭއްވި ޖަލްސާގައެވެ. ޔަޒީދުގެ އިތުރުން ދެ ފަރާތަކަށް ވަނީ ބައިނަލްއަގުވާމީ މައުރަޒަކުން ނުވަތަ މުބާރާތަކުން އެންމެމަތީ ޝަރަފު ހޯދައިގެން ރައީސްގެ އިނާމް ލިބިވަޑައިގެންފައެވެ. އެއީ ޝާހީން އިބްރާހީމްދީދީ (ސީނުގެ، ގއ. ކޮނޑޭ)އާއި ޝަހުމީނާ ލަބީބު (ބެރެބެދިމާގެ، ސ. ހިތަދޫ)އެވެ.
އައިޓީއާރުން ކޮންމެ އަހަރަކު ބާއްވާ "އޭޝިއާ ޓެކްސް އެވޯޑް"ގައި ޔަޒީދަށް އެ އެވޯޑް ލިބިވަޑައިގަތީ، ރާއްޖޭގެ ޓެކްސް ނިޒާމު ހަރުދަނާކޮށް ޒަމާނީ ކުރުމަށްޓަކައި މިދިޔަ އަހަރުގެ ތެރޭގައި ކުރައްވާފައިވާ މަސައްކަތްތައް ރިއާޔަތްކުރުމަށްފަހުއެވެ.
ރާއްޖެއިން ޓެކްސް ކޮމިޝަނަރު ޔަޒީދުގެ އިތުރުން އެ އެވޯޑަށް ވާދަ ކުރީ އޮސްޓްރޭލިއާ، ސިންގަޕޫރު، ޗައިނާ އަދި ހޮންގްކޮންގުގެ ޓެކްސް ކޮމިޝަނަރުންނެވެ.
އޭޝިއާ ޓެކްސް ކޮމިޝަނަރު އޮފް ދަ އިޔާ އެވޯޑަކީ މިދިޔަ އަހަރު ޓެކެހުގެ ދާއިރާއިން އޭޝިއާގައި އެންމެ ފާހަގަކޮށްލެވޭ ފަރާތް ކަމަށް އައިޓީއާރުގެ އިދާރާއަށް ފެންނަ ފަރާތަށް ދެވޭ އެވޯޑެކެވެ. އަދި އެ އެވޯޑު ދިނުމުގައި އެންމެ އެކަށީގެންވާ ފަރާތެއް ހޮވަނީ އައިޓީއާރުގެ ހާއްސަ ފަނޑިޔާރުންގެ ޕެނަލަކުންނެވެ.
އައިޓީއާރަކީ ޓެކުހާ ގުޅޭ އެކިއެކި މައުލޫމާތު ދުނިޔޭގެ އެކި ކަންކޮޅުތަކުގެ ޓެކްސް އިދާރާގައި މަސައްކަތްކުރާ ފަރާތްތަކާ، ސަރުކާރުތަކާއި، ޓެކުހުގެ ރޮނގުން ދިރާސާ ހަދާ ފަރާތްތައް އަދި ޓެކުހާ ގުޅޭ މަސައްކަތް ކުރާ އަމިއްލަ ކުންފުނިތަކަށް ހާއްސަކޮށްގެން ގެނެސްދޭ އިދާރާއެކެވެ.
އަދި އެ އިދާރާއިން ކޮންމެ އަހަރަކުވެސް ބާއްވާ އޭޝިއާ ޓެކްސް އެވޯޑް ހަފްލާއަކީ އޭޝިއާ ސަރަހައްދުގެ ގައުމުތަކުން ޓެކުހާ ގުޅޭ އެކި ރޮނގު ރޮނގުން އެންމެ ހޮވާލެވޭ ކުންފުނިތަކާއި، ލީޑަރުން ހޮވާ އެކަމުގެ އަގު ވަޒަންކޮށް އެ ފަރާތްތަކަށް ހައްގުވާ އެވޯޑް ހަވާލުކުރާ ހަފުލާއެކެވެ.