ދައުލަތުގެ ބެލުމުގެ ދަށުގައި ހުންނަ ކުޑަކުދިންގެ ހިޔާގައި ދިރިއުޅޭ ކުދިންނަށް އިންޓާންޝިޕްގެ ފުރުސަތު މަގުފަހިކޮށްދިނުމުގެ ގޮތުން ކޮންރަޑް މޯލްޑިވްސް ރަންގަލި އައިލެންޑް ރިސޯޓާއި މިނިސްޓްރީ އޮފް ޖެންޑާ އެންޑް ފެމިލީއާ ދެމެދު އެއްބަސްވުމެއްގެ ސޮއިކޮށްފިއެވެ.
ކޮންރަޑް މޯލްޑިވްސް ރަންގަލި އައިލެންޑް ރިސޯޓްގައި އިއްޔެ ބޭއްވި ރަސްމިއްޔާތުގައި އެކަމާ ގުޅޭ އެއްބަސްވުމުގައި އެ ރިސޯޓްގެ ފަރާތުން ސޮއިކުރެއްވީ ރިސޯޓްގެ ޖެނެރަލް މެނޭޖަރު ސްޓެފަނޯ ރޫޒާއެވެ. އަދި ޖެންޑާ މިނިސްޓްރީގެ ފަރާތުން ސޮއި ކުރެއްވީ އެ ޕްރޮގްރާމް މެނޭޖަރު ޖަލާ ޒުހުރީއެެެވެ.
ޖެންޑާ މިނިސްޓްރީން ބުނީ އެ އެއްބަސްވުމުގެ ދަށުން ކުޑަކުދިންގެ ހިޔާގައި މިހާރު ތިބި 16 އަހަރާ 18 އަހަރާ ދެމެދުގެ ކުދިންނަށް ކޮންރަޑް މޯލްޑިވްސް ރަންގަލި އައިލެންޑް ރިސޯޓްގައި އެއް އަހަރު ދުވަހުގެ ތަމްރީން ޕްރޮގްރާމްތައް ފުރިހަމަކުރުމުގެ ފުރުސަތުތައް ލިބި، ހޮސްޕިޓަލިޓީ އަދި ޓޫރިޒަމް ދާއިރާގައި ކުރިއަށް ދިޔުމުގެ ފުރުސަރު ލިބިގެން ދާނެ ކަމަށެވެ.
ކުޑަކުދިންގެ ހިޔާގައި ދިރިއުޅޭ ކުދިންނަށް އިންޓާންޝިޕްގެ ފުރުސަތު މަގުފަހިކޮށްދިނުމުގެ ގޮތުން ކޮންރަޑް މޯލްޑިވްސް ރަންގަލި އައިލެންޑް ރިސޯޓާއި ޖެންޑާ މިނިސްޓްރީއާއެކު އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގެ ތެރެއިން-- ފޮޓޯ: ޖެންޑާ މިނިސްޓްރީ
އެ ރަސްމިއްޔާތުގައި ވާހަކަ ދައްކަވަމުން ޖެންޑާ މިނިސްޓަރު އައިމިނަތު ޒެނީޝާ ޝަހީދު ޒަކީ ވިދާޅުވީ ދައުލަތުގެ ބެލުމުގެ ދަށުގައި މިވަގުތު 130 އަށް ވުރެ ގިނަ ކުދިން އުޅެމުންގެންދާ ކަމަށެވެ. އަދި އެ ކުދިންނަށް ބޭނުންުވާ ރައްކާތެރިކަމާއި އަޅައިލުން ދިނުމުގެ އިތުރުން އެކުދިންނަށް އެކި ދާއިރާތަކުން ފުރުސަތުތައް ފަހިކޮށްދީ އެ ކުދިން މުސްތަގުބަލުގައި އެކުދިންގެ ވަޒީފާގެ މާހައުލަށް ނުކުތުމަށް ބޭނުންވާ އިލްމާއިި ހުނަރު ތަރައްގީ ކުރުމަކީ މިނިސްޓްރީގެ އަމާޒެއް ކަމަށެވެ.
ދައުލަތުގެ ބެލުމުގެ ދަށުގައި ހުންނަ ކުޑަކުދިންގެ ހިޔާގައި ދިރިއުޅޭ ކުދިންނަށް، އަނަންތާރާ މޯލްޑިވްސް ރިސޯޓުން ހިންގަމުން އަންނަ އިންޓާންޝިޕް ޕްރޮގްރާމްގައި ބައިވެރިވުމުގެ ފުރުސަތަުވެސް ޖެންޑާ މިނިސްޓްރީން ވަނީ ދީފައެވެ. އެ ޕްރޮގްރާމް ނިންމި ކުއްޖަކަށް ދާދިފަހުން އެ ރިސޯޓުންވަނީ ވަޒީފާވެސް ދީފައެވެ.