ނަސްލީ ގޮތުން ތަފާތުކުރުމާއި ގިނަ ފާޑުކިޔުންތަކެއް އަމާޒުވާ ކަމަށް ބުނެ، ޖަރުމަނު ގައުމީ ޓީމަށް ކުޅުން މެސުޓް އޮޒިލް ހުއްޓާލީ މިދިޔަ އާދީއްތަ ދުވަހުގައެވެ.
ކުޅުން ހުއްޓާލިކަން އިއުލާންކޮށް، އޭނާ ނެރުނު ބަޔާނުގައި ބުނެފައި ވަނީ ޖަރުމަނުގެ ފުޓުބޯޅަ އިދާރީން އޭނާއަށް ތަފާތު ކުރުންތައް ގެންގުޅެފައިވާ ކަމަށާއި، ވޯލްޑް ކަޕްގެ ގްރޫޕް ސްޓޭޖުން ކެޓުމުގެ ޒިންމާވެސް އޭނާ ބޮލުގައި އަޅުވާފައިވާ ކަމަށެވެ.
ޖަރުމަނުގެ ފުޓުބޯޅަ އިދާރާއިން އޮޒިލްއަށް ތަފާތު ކުރުންތައް ގެންގުޅެފައި ވަނީ އޭނާގެ އަސްލަކީ ތުރުކީއަށް ވުމުންތޯ ނޫނީ ދީނަކީ އިސްލާމް ދީން ކަމަށްވުމުންތޯ އޮޒިލް ވަނީ ސުވާލު އުފައްދާފައެވެ. އޭނާ ބުނެފައި ވަނީ ޖަރުމަނުގެ ފުޓުބޯޅަ އިދާރާއިން ކަންކުރިގޮތުން އިހުސާސް ވަނީ ނަސްލީ ގޮތުން ތަފާތު ކުރުންތަކެއް ގެންގުޅެފައިވާ ކަމަށް ކަމަށެވެ.
އޮޒިލްގެ ބަޔާނާ ގުޅިގެން ޖަރުމަނުގެ ފުޓުބޯޅަ އިދާރާއިން ނެރުނު ބަޔާނުގައި ބުނެފައި ވަނީ އޮޒިލް ގައުމީ ޓީމު ދޫކޮށްލުމަށް ނިންމުމުން ހިތާމަކުރާ ކަމަށެވެ. އެހެން ނަމަވެސް އެ ނިންމުމަށް އިހުތިރާމް ކުރާ ކަމަށާއި، އޮޒިލްއަށް ތަފާތު ކުރުމުގެ އިހުސާސްކުރެވިފައި އޮތުމުން އެކަމަށް މައާފަށް އެދޭ ކަމަށްވެސް ފެޑަރޭޝަނުން ބުނެފައިވެއެވެ.
މިއަހަރު ރަޝިއާގައި ބޭއްވި ވޯލްޑް ކަޕް ފެށެނިކޮށް، ތުރުކީގެ ރައީސް ރަޖަބު ތައްޔިބް އުރުދުގާންއާއި ޖަރުމަން މިޑްފީލްޑަރު އިލްކާއި ގުންޑޮގަންއާއެކު ނެގި ފޮޓޯއާ ގުޅިގެން އުމުރުން 29 އަހަރުގެ މިޑްފީލްޑަރު އޮޒިލްއަށް ގިނަ ފާޑުކިޔުންތަކެއް އަމާޒުވެފައިވާ އިރު، ތުރުކީގެ ރައީސްގެ ކެމްޕެއިން ޓީމުން އެ ފޮޓޯ ބޭނުން ކުރުމުން ފުޓުބޯޅަ ފެޑަރޭޝަނުންވެސް ވަނީ އެކަން ކުށްވެރިކޮށްފައެވެ.
ވޯލްޑް ކަޕް 2014 ކާމިޔާބުކުރި ޖަރުމަނުގެ ސްކޮޑުގައި ހިމެނޭ އޮޒިލް ނެގި އެ ފޮޓޯއާ ގުޅިގެން ޖަރުމަންގެ ފުޓްބޯޅަ އިދާރާއާއި އެ ގައުމުގެ މީޑިއާތަކުން އޮޒިލްއަށް ގިނަ ފާޑުކިޔުންތަކެއް އަމާޒުކުރިއެވެ. ރަޝިއާގައި ބޭއްވި ވޯލްޑް ކަޕްގައި އާސެނަލްގެ މިޑްފީލްޑަރު އޮޒިލްއަށް އެންމެ އެދެވޭ ކުޅުމެއް ވެސް ދެއްކިފައެއް ނުވެއެވެ.
ފެޑަރޭޝަންގެ ބަޔާނުގައި ބުނެފައި ވަނީ އެ އިދާރާގެ އެންމެ މުހިންމު ކަމަކީ ވަކި ނަސްލެއް ނެތި ކުޅުންތެރިންނަށް އިހުތިރާމުކުރުން ކަމަށާއި، އެއްވެސް ކަމެއްގައި ތަފާތުކުރުން ނުގެންގުޅޭނެ ކަމަށެވެ. އަދި އޮޒިލް ގައުމީ ޓީމަށް ކޮށްދީފައިވާ ހިދުމަތަށް އިހުލާސްތެރިކަމާއެކު އެ އިދާރާއިން ޝުކުރު އަދާކުރާ ކަމަށްވެސް ބަޔާނުގައިވެއެވެ.
ޖަރުމަން ޓީމާއެކު އޮޒިލް ފުރަތަމަ މެޗެއް ކުޅުނީ 2009 ވަނަ އަހަރުގެ ފެބްރުއަރީގައެވެ. އޭނާ ވަނީ ގައުމީ ޓީމަށް 92 މެޗު ކުޅެ، 23 ގޯލް ޖަހައިދީފައެވެ.