ދުނިޔޭގައި ބާއްވާ އެންމެ ބޮޑު ހެކަތޯން ކަމަށްވާ "އޭންޖަލްހެކް"، މިއަދު ރާއްޖޭގައި ފަށައިފިއެވެ.
ދިރާގާއި ސްޕާކްހަބް ގުޅިގެން، "ސީމްލެސް ޓެކްނޯލޮޖީ" ތީމްގެ ދަށުން ދެ ދުވަހަށް ކުރިއަށް ގެންދާ މި ހެކަތޯން އޮންނާނީ މިއަދާއި މާދަމާ (21-22 ޖުލައި)އެވެ.
ރާއްޖޭގެ އެކި ކަންކޮޅުތަކުގައި ތިބި، ކޮމްޕިއުޓަރ ޓެކްނޯލޮޖީގެ ހުނަރުވެރި، އަދި ތޫނުފިލި އެތަކެއް ޒުވާނުން ބައިވެރިވާ މި ހެކަތޯންގެ ބައިވެރީން، އާ އީޖާދީ އުފެއްދުންތައް ކޯޑުކޮށް، އެތަކެތި ޓެސްޓްކުރުމާއި ލޯންޗުކުރުން ކުރިއަށް ގެންދާނެއެވެ.
އެންޖެލްހެކް މޯލްޑިވްސް ހުޅުމުގެ ގޮތުން މިއަދު ހެނދުނު، ހޮޓެލް ޖެންގައި ބޭއްވި ރަސްމިއްޔާތުގައި ވާހަކަފުޅުދައްކަވަމުން، ދިރާގުގެ ސީއީސޯ އިސްމާއީލް ރަޝީދު ވިދާޅުވީ، ދިރާގުގެ އިޖްތިމާއީ ޒިންމާގެ ދަށުން ކުރިއަށް ގެންދާ ޕްރޮގްރާމްތަކުގެ މައިގަނޑު ވިސްނުމަކީ ޒުވާނުން ބާރުވެރިކުރުވުން ކަމަށެވެ.
އެގޮތުން ރާއްޖޭގައި ބާއްވާ އެންމެ ބޮޑު އަދި އެންމެ ފުރަތަމަ ބައިނަލްއަގްވާމީ ހެކަތޯން ކަމަށްވާ، އެންޖަލްހެކްގައި ދިރާގުގެ ދައުރަކީ، ޒުވާނުންނަށް ރަނގަޅު ފުރުސަތުތަކެއް ފަހިކޮށްދީ، އެ ޒުވާނުންގެ ހަގީގީ ގާބިލްކަން އަންގައި ދިނުމާއި، އުނގެނުމުގެ ތެރޭން އެކުދީންގެ މުސްތަގުބަލު ބިނާކޮށްދިނުން ކަމަށެވެ.
ރާއްޖޭގެ އައިސީޓީ ދާއިރާ ފުޅާވަމުންދާ ދިއުމަށް އިޝާރަތްކުރައްވައި، ސްޕާކް ހަބްގެ މެނޭޖިންގ ޕާޓްނަރ، އަލީ ހާރިސް ވިދާޅުވީ، އެންޖެލްހެކް އަކީ، ހުނަރުވެރި ޑިވެލޮޕަރުންނާއި ޑިޒައިނަރުން ފަދަ ފަންނާނުންނަށް އެމީހުންގެ ހުނަރު ދައްކާލުމުގެ މާހައުލު ތަނަވަސްކޮށްދޭ ބަޔަކަށް ވާއިރު، ދިރާގާއި ސްޕާކްހަޕްގެ އަމާޒަކީ، މިފަދަ ފަންނުވެރީންގެ ހުރަނު ބައިނަލްއަގްވާމީ ފެންވަރުގައި ވެސް ދައްކާލުމުގެ ފުރުސަތު ލިބޭފަދަ "ސްޓާރޓްއަޕް އިކޯސިސްޓަމް"އެއް ގާއިމުކުރުން ކަމަށެވެ.
އެންޖަލްހެކް މޯލްޑިވްސް އަކީ، 10,000 އަށް ވުރެ ގިނަ ޑިވެލޮޕަރުން ހިމެނޭގޮތަށް، ތިން މަސްދުވަހުގެ މުއްދަތެއްގެ ތެރޭގައި ބޭއްވޭ 60 ހެކަތޯންގެ ބައެކެވެ.
ހެކަތޯން ނިމުމުން، ފަނޑިޔާރުންގެ ޚާއްސަ ޕެނަލަކުން، ބައިވެރީންގެ ތެރޭން އެންމެ މޮޅު ޑިވެލޮޕަރާއި، އެންމެ މޮޅު ޓީމު ހޮވާނެއެވެ. އަދި ވަނަތައް ހޯދާ ފަރާތްތަކަށް، އެންޖަލްހެކްސްގެ ހެކްސެލެރޭޓަރ ޕްރޮގްރާމްގައި ބައިވެރިވުމާއި، ސެން ފްރެންސިސްކޯގައި އޮންނަ ސިލިކަން ވެލީ ހަފްތާގައި ބައިވެރިވުމުގެ ދައުވަތު ލިބޭނެއެވެ.