ސާނަވީ އިމްތިހާން (އޯ ލެވެލް)ގެ ގަދަ 10 ހޮވާ އުސޫލަށް ގެނައި ބަދަލާއެކު، ގަދަ 10ގައި ހިމެނުނު ދަރިވަރުންގެ އަދަދު މަދުވެއްޖެއެވެ.
މި އަހަރުގެ ޓޮޕް ޓެންގައި 375 ދަރިވަރުން ހިމެނުނުއިރު، މިދިޔަ އަހަރު ޓޮޕްޓެންގައި 589 ދަރިވަރުން ހިމެެނުނެވެ. މިއަހަރު ސާނަވީ ގަދަ 10ގައި އެއްވަނައަށް ހޮވުނު ދަރިވަރުންގެ އަދަދުވެސް ވަނީ ވަރަށް ބޮޑަށް ދަށްވެފައެވެ.
މިދިޔަ އަހަރު ޓޮޕް ޓެންގެ އެއްވަނައިގައި 126 ދަރިވަރުން ހިމެނުނު ނަމަވެސް މިއަހަރު ޓޮޕް ޓެންގައި އެއްވަނައިގައި ހިމެނިފައިވަނީ އެންމެ ހަ ދަރިވަރުންނެވެ.
17 ޖުލައި 2018: އޯ ލެވެލް ޓޮޕް އެޗީވާޒް އެވޯޑްގެ ރަސްމިއްޔާތުގެ ތެރެއިން:-- ސަން ފޮޓޯ/ މުހައްމަދު އަފްރާހް
މިއަހަރު އޯ ލެވެލް ޓޮޕް ޓެންގައި އެއްވަނަ ދީފައިވަނީ ހުރިހާ މާއްދާއަކުންވެސް އޭ ސްޓާ ހޯދި ދަރިވަރުންނަށެވެ.
އޯ ލެވެލް ޓޮޕް އެޗީވާސް އެވޯޑު ދިނުމުަށް ރޭ ބޭއްވި ރަސްމިއްޔާތުގައި ވާހަކަ ދައްކަވަމުން އެޑިއުކޭޝަން މިނިސްޓަރު ޑރ. އައިޝަތު ޝިހާމް ވިދާޅުވީ އޯ ލެވެލްގެ ގަދަ 10 ހޮވާ އުސޫލަށް ބަދަލު ގެނައީ ދަރިވަރުން އެންމެ މަތީ ނަތީޖާތައް ހޯދުމަށް ހިތްވަރު ދިނުމުގެ ގޮތުން ކަމަށެވެ.
"ގާބިލު ދަރިވަރުންނަށް އެންމެ މަތީ ނަތީޖާތައް ހޯދުމަށް ހިތްވަރު ދިނުމަށްޓަކައި އާންމުކޮށް ދެމުންދާ ގަދަ ދިހައެއްގެ އެވޯޑްގެ މިންގަނޑު އޭ ސްޓާގެ ނަތީޖާ ހިމަނައިގެން މިވަނީ 2017 ފެށިގެން މަތިކުރެވިފައި. ނަމަވެސް ލިބޭ ހާއްސަ އުފަލަކީ މި މަތީ މިންގަނޑާ އެކުވެސް އަޅުގަނޑުމެންގެ 376 ދަރިވަރަކު ގަދަ 10ގެ ވަނަތައް ހާސިލުކުރުން،" މިނިސްޓަަރު ވިދާޅުވިއެވެ.
މިއަހަރުގެ ޓޮޕް އެޗީވާސްގައި ބިޒްނަސް އެންޑް އެޑިއުކޭޝަން ޓެކްނޮލަޖީ (ބީޓެކް) ނިންމި ތިން ދަރިވަރަކު ވެސް ވަނީ ހިމެނިފައެވެ.
އެއްވެސް ކުއްޖަކު ބާކީނުކޮށް، ސްކޫލު ތައުލީމުގެ ތެރެއިން ދަރިވަރުންނަށް އިތުރު ފުރުސަތުތައް މަގުފަހިކޮށްދިނުމުގެ މަގުސަދުގައި ހުޅުވާލި ބީޓެކް ޕްރޮގްރާމުގެ ފުރަތަމަ ސާނަވީ އިމްތިހާން ފުރިހަމަކުރީ މިދިޔަ އަހަރުއެވެ.