އައިހެވަންގެ މަޝްރޫއު ނުފެށިއޮތީ ތަރައްގީއާ ދެކޮޅަށް ހިންގަމުންދާ ކަންތަކުގެ ސަބަބުން ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމު ވިދާޅުވެއްޖެއެވެ.
ހއ. ހޯރަފުށީ ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުން ރައީސް ވިދާޅުވީ، އައިހެވަންގެ މަޝްރޫއު ހަނދާން ނުނެތޭ ކަަމަށާއި ނަމަވެސް އެކަން މަޑުޖެހިފައި އޮތީ ރާއްޖޭގެ މަސްރަހާއި، ރާއްޖެއިން ބޭރުގެ މަސްރަހު އަދި ރާއްޖޭގައި ތަރައްގީއާ ދެކޮޅަށް ހިންގަމުންދާ ކަންކަމުގެ ސަބަބުން ކަމަށެވެ.
"ނިލަންދޫ އަކީ އަޅުގަނޑުމެން ދުވަހަކުވެސް އުއްމީދު ނުކުރާ ވަރުގެ، ހުވަފެނުންވެސް ނުދެކޭ ވަރުގެ ބޮޑު ބިޔަ މަޝްރޫއެއް އަމާޒުވެފައި، އަދި މުޅި މަޝްރޫއާ ގުޅޭ ހުރިހާކަމެއް ނިންމާފައި އޮތް ތަނެއް. މަސައްކަތަށް ބޭނުންވާ ފީޒިބިލިޓީ ނިމި، މުޅި ރާއްޖޭގެ ލޭންޑްސްކޭޕު ބަދަލުކޮށްލާވަރުގެ ބޮޑު ބިޔަ މަޝްރޫއެއް. އޭގެ މިސާލުތައް ދުނިޔޭގެ އެކި ސަރަހައްދުތަކުންވެސް ފެންނަން ހުރި ވަރުގެ މަޝްރޫއެއް. އެއީ ދުނިޔޭގެ ފެންވަރުން އެއްވަނަ ދެވަނަ ތިންވަނައިގައިވެސް ހިމެނޭ ފެންވަރުގެ މޮޑެލް އެއް. ކީއްވެތޯ އެ މަޝްރޫއު ނުފެށިގެން މިއުޅެނީ؟ އެ މަޝްރޫއު ނުފެށިގެން މިއުޅެނީ އަޅުގަނޑުމެން ތެރޭ 'ހެޔޮ އެދިވަޑައިގަންނަވާ' ބޭފުޅުން ތިއްބެވިލެއް ގިނަ ކަމުން،" އައި ހެވަންގެ މަޝްރޫއު ނުފެށި އޮތީ ކީއްވެގެންކަން ބަޔާންކޮށްދެއްވަމުން ރައީސް މިސާލު ޖެއްސެވިއެވެ.
ހއ. މާފިނޮޅުގައި އަޅާ އެއާޕޯޓަކީ އައިހެވަން މަޝްރޫއުގެ ދަށުން ކުރިއަށް ގެންދާނެ މަސައްކަތެއް ކަމަށް ރައީސް ވިދާޅުވިއެވެ. އެ މަޝްރޫއާ އެކީ އެ އެއާޕޯޓު އިތުރަށް ބޮޑުވެގެންދާނެ ކަމަށް ވެސް އެމަނިކުފާނު ވިދާޅުވިއެވެ.
ރައީސް ވިދާޅުވީ، ރާއްޖޭގައި ބިން ނެތް ކަމަށް ބުނެ އެ މަޝްރޫއާ ދެކޮޅަށް ވާހަކަ ދެއްކި ކަމަށެވެ. ނަމަވެސް މިއީ ހަގީގަތެއް ނޫންކަމަށާއި ރާއްޖޭގައި ބިން އޮތްކަން މިހާރު ހާމަވާނެ ކަމަށެވެ. އެކަމަށް މިސާލު ޖައްސަވައި ރައީސް ވިދާޅުވީ ހޯރަފުށީގެ ފަޅަކީ ތިލަ ފަޅެއް ކަމަށާއި ފަޅު ހިއްކުމުން ހުޅުމާލޭގެ ދެ ފިޔަވަހި އެއްކޮށްލުމުން ވާވަރުގެ އަށް ގުނައަށް ބިން ލިބޭނެ ކަމަށެވެ. އެމަނިކުފާނު ވިދާޅުވީ އެކި ސަރަހައްދުތަކުގައި ހިއްކި ބިން ތަކަށް ބަލާއިރު އިތުރު 20 ރަށް އުފަން ކުރެވިފައިވާ ކަމަށެވެ.
ރާއްޖޭގައި ހިންގަމުން އަންނަ މަޝްރޫއުތަކަށް އިޝާރާތް ކުރައްވައި ރައީސް ވިދާޅުވީ، މި ސަރަހައްދުގައި ވެސް އެންމެ ވަސީލަތްތައް ތިޔާގިކޮށް ކަންކަން ކުރަމުން ތަރައްގީ އަންނަ ގައުމަކީ ރާއްޖެކަން އެންމެންވެސް ގަބޫލުކުރާ ކަމަށެވެ.
"އެންމެ އިންވެސްޓުމެންޓަކަށް ބަލާލަމާ ހިންގަވާ. އަޅުގަނޑުމެން ވެލާނާ އިންޓަނޭޝަނަލް އެއާޕޯޓު ބޮޑު އެއާޕޯޓަކަށް ހެދުމަށް އެއްހާސް މިލިއަން ޑޮލަރުގެ ލޯނު ނަގައިގެން، ބިންގާ އެޅި ހިސާބުން އެހެން އެއްވެސް ކަމެއް ނޫން ކަށަވަރު ކޮށްދިނީ. ބިންގާ އެޅި ހިސާބުން ތައިލެންޑުގެ އެންމެ މަޝްހޫރު އެންމެ ވަރުގަދަ ނުވަ ކުންފުނީގެ ތެރޭގައި ހިމެނޭ އެނބޫދޫ ފިނޮޅު ފަޅުގެ ތެރޭގައި އެކުރީ ހަމަ އެ އަދަދުގެ އިންވެސްޓުމެންޓެކޭ. އެއްހާސް ޑޮލަރުގެ އިންވެސްޓުމެންޓެއް އެތާ އެ ކުރިއަށް ދަނީ. ސަރުކާރުން އެންމެ ލާރިއެއްވެސް ނުލަން،" އެމަނިކުފާނު ވިދާޅުވިއެވެ.
ރައީސް ވިދާޅުވީ، މިފަދަ މަޝްރޫއުތައް ކުރިއަށް ދާނީ ރާއްޖޭގައި ހަމަޖެހުން އޮވެގެން ކަމަށެވެ.
"ހަމަޖެހުން އޮތުމަކީ ހަމަޖެހުން ނަގާލާ މީހުން ޖަވާބުދާރީ ކުރުވުން،" ކަމަށްވެސް އެމަނިކުފާނު ވިދާޅުވިއެވެ.