ރަޝިއާގައި ރޭ ނިމިގެން ދިޔަ ފީފާ ވޯލްޑް ކަޕް 2018ގެ ފައިނަލް މެޗުގައި ކްރޮއޭޝިއާއާ ދެކޮޅަށް ފްރާންސަށް ދިން ޕެނަލްޓީއަކީ، "100 ޕަސެންޓް ގޯސް ނިންމުމެއް" ކަމަށް، އިނގިރޭސި ޕްރިމިއަރ ލީގުގެ ކުރީގެ ރެފްރީއެއް ކަމަށްވާ ޑާމޮޓް ގެލަގާ ބުނެފިއެވެ.
މެޗުގެ ފުރަތަމަ ހާފްގައި ފްރާންސުން ލަނޑެއް ކާމިޔާބުކޮށްފައި ވަނިކޮށް، ކްރޮއޭޝިއާއިން ނަތީޖާ ހަމަހަމަކުރިއެވެ. ނަމަވެސް، ދެވަނަ ފަހަރަށް ފްރާންސުން ކުރި ހޯދީ އެޓީމަށް ލިބުނު ޕެނަލްޓީއަކުންނެވެ.
މޮސްކޯގެ ލުޒްނިކީ ސްޓޭޑިއަމްގައި ފްރާންސާއި ކްރޮއޭޝިއާ ކުޅުނު ފައިނަލް މެޗުގެ ނަތީޖާ ފްރާންސް ކޮޅަށް ބަދަލުކޮށްލި އެ ޕެނަލްޓީއަކީ، ރަނގަޅަށް ދިން ޕެނަލްޓީއެއް ނޫންކަމަށްބުނެ، މެޗުގެ ރެފްރީއަށް ގިނަ ބަޔަކު ދަނީ ފާޑުކިޔަމުންނެވެ.
އާޖެންޓީނާ ރެފްރީ، ނެސްޓާ ޕިޓާނާ-- ފޮޓޯ: ޑެއިލީމެއިލް
ފްރާންސަށް ޕެނަލްޓީ ލިބުނީ، އެޓީމަށް ލިބުނު ކޯނަރަކުން، އެންޓޮއިން ގްރީޒްމަން ކްރޮއޭޝިއާގެ ގޯލްކުރިމައްޗަށް ހުރަސްކޮށްލި ބޯޅަ ދިފާއުކުރުމަށް، ފުންމައިގެން އެރި، އިވާން ޕެރިސިޗްގެ އަތުގައި ބޯޅަ ޖެހުމުންނެވެ. ނަމަވެސް، އެނިންމުން ގޯސްކަމަށާއި، އެއީ ގަސްތުގައި ބޯޅައިގައި އަތްލުން ނޫންކަމަށް ގެލަގާ ބުންޏެވެ. އަދި ޕެރިސިޗް ބޯޅަ ދިފާއުކުރަން މަސައްކަތްކުރި ވަގުތު، ފްރާންސްގެ ބްލައިސް މަޓުއިޑީ އޭނާ ބްލޮކްކުރުމުން ބޯޅަ އައިސް އަތުގައި ޖެހުނީ ކަމަށް ތަޖްރިބާކާރު ރެފްރީ ބުންޏެވެ.
މެޗުގައި ރެފްރީކަން ކުރި އާޖެންޓީނާގެ ކުރީގެ ފިލްމީ ތަރި ނެސްޓާ ޕިޓާނާ، ފުރަތަމަ ނިންމީ އެއީ ޕެނަލްޓީއެއް ނޫން ކަމަށެވެ. ނަމަވެސް އެވަގުތު ކައިރީގައި ތިބި، ފްރާންސް ފޯވާޑް އޮލިވާ ޖިރޫއާއި ލޫކާސް ހެނާންޑޭޒް އެއީ ޕެނަލްޓީއެއް ކަމަށް ބުނެ، މައްސަލަ ޖެއްސުމުން ދެން ރެފްރީ އިޝާރާތްކުރީ، ވީޑިއޯ އެސިސްޓެންޓް ރެފްރީ (ވީއޭއާރް)ގެ އެހީތެރިކަމަށެވެ.
ގަލެގާ ބުނީ، ޕެރިސިޗް ބޯޅައިގައި އަތްލީ ނޫން ކަމަށާއި، ބޯޅަ އައިސް އަތުގައި ޖެހުނީ ކަމަށް. އަދި އެއީ ގަސްތުގައި އަތްލުން ކަމަށް ނިންމައި، ޕެނަލްޓީ ނުދެވޭނޭ ކަމަށް-- ފޮޓޯ: ޑެއިލީމެއިލް
އެ ހާދިސާ އެނަލައިޒް ކުރުމަށް ފަހު، ވީއޭއާރުން ލަފާދިނީ، ރިޕްލޭ ބެލުމަށް ފަހު މެޗުގެ ރެފްރީ ގޮތެއް ނިންމުމަށެވެ.
"100 ޕަސެންޓް، އެއީ ޕެނަލްޓީއެއް ނޫން. ދުރުން އައި ބޯޅަ ޕެރިސިޗްގެ ބޯމަތިން ދިޔައީ އޭނާއާ ވަރަށް ކައިރިން،" ސްކައި ސްޕޯޓްސްއަށް ގެލަގާ ބުންޏެވެ.
"ބޯޅަ އައިސް އޭނާގެ އަތުގައި ޖެހުނީ، އޭނާގެ އަތް ބޯޅައާ ދިމާއަށް ހަރަކާތެއް ނުކުރޭ. އޭނާ ބޯޅައިގައި އަތްލުމުގެ އެއްވެސް ގަސްދެއް ނެތް. ފުޓްބޯޅައިގެ ގަވާއިދު ބުނަނީ، އެއީ ގަސްތުގައި އަތްލުން ކަމަށް ވާންޖެހޭނޭ."
ގެލަގާ ބުނީ، ޕެރިސިޗްގެ އަތް އުފުލިފައި ހުރިއިރު ހުރީ "އަންއޯތޮޑޮކްސް ޕޮޒިޝަން"އެއްގައި ކަމަށެވެ. އެހެންކަމުން އާންމުކޮށް އަތް ބަހައްޓާ ޕޮޒިޝަން ނޫންގޮތަކަށް އެހާލަތުގައި އަތްހުރެ، އޭނާގެ ގަސްތަކާ ނުލައި، އަދި ބޯޅައިގައި އަތްލުމަށް ހަރަކާތްވެސް ނުކުރެވޭ ހާލުގައި، އަތުގައި ބޯޅަ ޖެހުމުން ޕެނަލްޓީ ދެވޭނޭ އެއްވެސް ހަމައެއް ނޯންނާނޭ ކަމަށެވެ.
މެޗުގެ ނަތީޖާ 1-1 އިން އެއްވަރު ވެފައި ވަނިކޮށް، ފްރާންސަށް ލިބުނު އެ ޕެނަލްޓީން އެޓީމަށް ދެވަނަ ފަހަރަށް ލީޑު ނަގައިދިނީ ގްރީޒްމަންއެވެ. އަދި އޭގެ ފަހުން، ކީލިއަން އެމްބާޕޭއާއި ޕައުލް ޕޮގްބާގެ ލަނޑާއެކު ފްރާންސުން ދެވަނަ ފަހަރަށް ވޯލްޑް ކަޕްގެ ތަށި އުފުލައިލީ 4-2ގެ ނަތީޖާއަކުން ކްރޮއޭޝިއާ ބަލިކުރުމަށް ފަހުއެވެ.
އާޖެންޓީނާގެ ކުރީގެ އެކްޓަރެއް، އަދި މިހާރު ޖިމްނާސްޓީކް ޓީޗަރެއް ކަމަށްވާ ޕިޓާނާ އެންމެ ފުރަތަމަ ރެފްރީކަން ކުރަން ފެށީ، 2007 ވަނަ އަހަރުއެވެ. އޭނާ ވަނީ ތިން އަހަރު ދުވަހުގެ ތެރޭގައި ފީފާ ރެފްރީ ބެޖްހާސިލްކޮށްފައެވެ.
ޕިޓާނާއަކީ، މިފަހަރުގެ ވޯލްޑް ކަޕް ފައިނަލް މެޗުގެ ރެފްރީގެ އިތުރުން، މިފަހަރުގެ ވޯލްޑް ކަޕްގެ ފުރަތަމަ މެޗުކަމަށްވާ، ރަޝިއާ ސައޫދީ އަރަބިއްޔާ ވާދަކުރި މެޗުގެ ވެސް ރެފްރީއެވެ.