އިސްލާމިކް ޔުނިވަރސިޓީ އޮފް މޯލްޑިވްސް( އައިޔޫއެމް) އިން ކޮންމެ އަހަރަކު އެއްފަހަރު ބާއްވަމުން އަންނަ އިސްލާމީ ހޭލުންތެރިކަމާބެހޭ ބައިނަލްއަގްވާމީ މަހާސިންތާ މާދަމާ ފަށާނެ ކަމަށް އެ ޔުނިވާސިޓީން ބުނެފިއެވެ.
"ތޯޓް، ކަލްޗަރ އެންޑް ސިވިލައިޒޭޝަން އިން ބިލްޑިންގޕީސް، ހާރމަނީ އެންޑް ޓޮލަރެންސް އިން ސައުތު އޭޝިޔާ" މި ޝިއާރުގެ ދަށުން ފަންސާހަށް ވުރެ ގިނަ ދިރާސާ ކަރުދާހާއި އެކު ކުރިއަށްގެންދާ މަހާސިންތާ އޮންނާނީ އައިޔޫއެމް ހޯލްގައެވެ.
އިސްލާމިކް ޔުނިވަރސިޓީއާއި އެކު އެމެރިކާގެ އިންޓަރނޭޝަނަލް އިންސްޓިޓިއުފް އޮފް އިސްލާމިކް ތޯޓް (އައިއައިއައިޓީ) އެ މަހާސިންތާ ކުރިއަށް ގެންދިޔުމުގައި އެހީތެރިކަން ފޯރުކޮށްދޭނެ ކަމަށް އައިޔޫއެމްއިން މައުލޫމާތުދެއެވެ. އަދި މީގެ އިތުރުން ޕާކިސްތާނުގެ ރިފާ އިންޓަރނޭޝަނަލް ޔުނިވަރސިޓީއާއި އިންޓަރނޭޝަނަލް އިސްލާމިކް ޔުނިވަރސިޓީ އޮފް އިސްލާމް އާބާދު ވެސް މަހާސިންތާގައި ބައިވެރިވާނެއެވެ.
އައިޔޫއެމް އިން ބުނީ މިއަހަރުގެ މަހާސިންތާއަކީ، ރާއްޖޭގައި ބާއްވާ އިލްމީ މަހާސިންތާތަކުގެ ތެރެއިން އެންމެ ގިނަ ޢިލްމީ ދިރާސާ ކަރުދާސް ހުށަހަޅާނެ މަހާސިންތާއެވެ. ދިރާސާ ކަރުދާހުގެ ތެރޭގައި އެކި ޤައުމުތަކުގެ ބޭފުޅުން ހުށަހަޅުއްވާ 37 ކަރުދަހަކާއި ރާއްޖޭގެ ހަ ބޭފުޅަކު ހުށަހަޅުއްވާ ކަރުދާސް ހިމެނޭނެ ކަމަށް އައީޔޫއެމްއިންވަނީ ބުނެފައެވެ.
"މިފަހަރުގެ ކޮންފަރެންސްގެ ވަރަށް ބޮޑު ކުރިއެރުމެއް މިއީ ބޭރުގެ މިހާ ގިނަ ބޭފުޅުން ބައިވެރިވެވަޑައިގަތުން. މިފަހަރު މިއޮތީ ވަރަށް ފުޅާޓޮޕިކެއް، ސައުތުއޭޝިޔާ ރީޖަންގައި ޕީސްއާއި، އިސްލާމީ ވިސްނުންތައް އިތުރުކުރުމަށްޓަކައިކުރެވިދާނެކަންތައްތައް ދެނެގަތުން. މީގައި ޓޮޕިކްގައިވާ ހުރިހާ ދާއިރާއަކުންވެސް ޕޭޕަރު ހުށަހެޅޭނެ" އައިޔޫއެމްގެ ސެންޓަރ ފޯރ ރިސާޗް އެންޑް ބަޕްލިކޭޝަންގެ ޑީން ޑރ. ދީބާ މޫސާ ވިދާޅުވިއެވެ.
އައިޔޫއެމްއިން ބުނީ ބޭރުގެ މައިގަނޑު 12 ގައުމުކުން މިފަހަރުގެ މަހާސިންތާއަށް ބޭފުޅުން ވަޑައިގަންނަވާނެއެވެ.