މާލޭ ފަތާ ޓްރެކް ސަރަހައްދަށް އަނެއްކާ ވެސް ވެލިތައް ޖަމާވެއްޖެ އެވެ.
އެ ސަރަހައްދަށް ވެލި ޖަމާވެ، ކުޑަ ''ގޮނޑުދޮށެއް'' ވެސް ވަނީ ޓެރެކްގެ ހުޅަނގުފަރާތުގައި ހެދިފަ އެވެ.
އެ ސަރަހައްދަށް މޭ މަހު ވެލިތައް ޖަމާވެގެން، ފަސްތައް ނަގައި ފުންކުރުމަށް ފަހު އަލުން ހުޅުވީ މިިދިޔަ މަހުގެ ކުރީކޮޅު އެވެ.
ހައުސިން މިނިސްޓްރީން ވަނީ ފަތާ ޓްރެކް ހިމެނޭ ސަރަހައްދު އަލުން 2.5 މީޓަރާއި 3.5 މީޓަރާ ދެމެދުގެ ފުންމިނަކަށް ފުންކޮށްފަ އެވެ.
ފަތާ ޓެރެކް އަލުން ހުޅުވީ އެ ޓެރެކްގައި ހުރި ބައެއް ޕްލެޓްފޯމްތައް ވެސް އަލުން މަރާމާތުކުރުމަށް ފަހު އެވެ. ނަމަވެސް އަލުން ޓެރެކް ހުޅުވި އިރު ވެސް ނޫ ޕްލެޓްފޯމްގައި ސިޑިއެއް ހަރުކޮށްފައެެއް ނުވެ އެވެ.
ސްވިމިން އެސޯސިއޭޝަނުން ބުނީ އެ ޓްރެކްގައި ހުރި ނޫ ޕްލެޓްފޯމްގައި ސިޑި ހަރުނުކޮށް އަދި ހުރީ އެ ޕްލެޓްފޯމް މަރާމާތުކޮށް ނުނިމޭތީ ކަމަށެވެ.