ފީފާ ވޯލްޑް ކަޕްގެ ގަދަ 16ގައި ރަޝިއާ އަތުން ބަލިވެ، މުބާރާތާ އަލްވަދާއު ކިޔަން ޖެހުނު ސްޕެއިންގެ ތަޖުރިބާކާރު މިޑްފީލްޑަރު އަންދްރޭސް އިނިއެސްޓާ، ގައުމީ ޓީމަށް ކުޅުން ހުއްޓާލައިފިއެވެ.
ރަޝިއާއާ ދެކޮޅަށް ރޭ ކުޅުނު މެޗުގެ ފުރަތަމަ 11ގައި އިނިއެސްޓާ ހިމެނިފައިނުވި ނަމަވެސް، ބަދަލު ކުޅުންތެރިއެއްގެ ގޮތުގައި މެޗުގެ 67 ވަނަ މިނެޓުން ފެށިގެން އޭނާ ފެނިގެންދިޔައެވެ.
އެ މެޗުގެ ފުރިހަމަ ވަގުތު އަދި އިތުރު ވަގުތުގެ ދެ ހާފުގެ ކުޅުން ނިމުނު އިރުވެސް 1-1ގެ ނަތީޖާއަކުން ދެ ޓީމު އެއްވަރުވެފައި އޮތުމުން ނަތީޖާ ނެރެން ޖެހުނީ ޕެނަލްޓީ ޖަހައިގެންނެވެ. ސްޕެއިނުން ޕެނަލްޓީ ކާމިޔާބުކުރި ކުޅުންތެރިންގެ ތެރޭގައި އިނިއެސްޓާ ހިމެނިގެންދިޔަ އިރު، އެޓީމު ބަލިވީ ކޮކޭ އާއި އިއާގޯ އަސްޕާސްގެ ޕެނަލްޓީ ނާކާމިޔާބުވުމުންނެވެ.
"މިއީ އަހަރެން ގައުމީ ޓީމަށް ކުޅޭ ފަހު މެޗު. ގައުމީ ޓީމާއެކު ވަރަށް ކާމިޔާބު އަހަރުތަކެއް ހޭދަކުރެވިއްޖެ. ބައެއް ފަހަރު ނިމުން އަންނާނީ ތިމާ ބޭނުންވާ ގޮތަކަށް ނޫން. ގައުމީ ޓީމުން ކުރިމަގުގައި ވެސް ކާމިޔާބު ހޯދުމަށް މަސައްކަތްކުރާނެ. އަހަރެމެން މަސައްކަތްކުރަން ޖެހޭނެ ގޮތަކީ ވެސް އެއީ،" އިނިއެސްޓާ ބުންޏެވެ.
އިނިއެސްޓާ ވަނީ ސްޕެއިން ގައުމީ ޓީމަށް 131 މެޗު ކުޅެ، 13 ލަނޑު ކާމިޔާބުކޮށްފައެވެ. އޭނާ ވަނީ ގައުމީ ޓީމާއެކު ވޯލްޑް ކަޕް 2010، ޔޫރޯ 2008 އަދި ޔޫރޯ 2012 ކާމިޔާބުކޮށްފައެވެ. ވޯލްޑް ކަޕް 2010ގެ ފައިނަލުގައި ނެދަލޭންޑްސްއާ ދެކޮޅަށް ކުޅުނު މެޗުގައި ސްޕެއިން މޮޅުކޮށްދިން ލަނޑު، ސްޕެއިންއަށް ކާމިޔާބުކޮށްދިން ކުޅުންތެރިޔަކީ އިނިއެސްޓާއެވެ.