ތުރުކީގެ ރިޔާސީ އިންތިހާބު ކާމިޔާބު ކުރެއްވި އެގައުމުގެ މިހާރުގެ ރައީސް ރަޖަބް ތައްޔިބް އުރުދުޣާންއަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް މަރުހަބާ ވިދާޅުވެއްޖެ އެވެ.
އުރުދުޣާން އަށް މަރުހަބާ ވިދާޅުވެ ރައީސް ފޮނުއްވި މެސެޖުގައި ތުރުކީގެ ރިޔާސީ އިންތިހާބުގެ އިތުރުން އެގައުމުގައި ބޭއްވި ޕާލަމެންޓްރީ އިންތިހާބުގައި ރައީސް އުރުދުޣާންގެ ޖަސްޓިސް އެންޑް ޑިވެލޮޕްމަންޓް ޕާޓީން އުފެއްދި ކޯލިޝަނުން ހޯއްދެއްވި ކާމިޔާބީއަށް ވެސް މަރުހަބާ ވިދާޅުވެފައިވެ އެވެ.
އަދި ތުރުކީގެ ހަމަޖެހުމާއި، ސަލާމަތާއި، ރައްކާތެރިކަމަށާއި، އެގައުމުގެ ރައްޔިތުންނަށް ކުރިއެރުމާއި އުފާ ފާގަތިކަން ހޯއްދަވައިދެއްވުމަށް ތުރުކީގެ ރައީސް ކުރައްވަމުން ގެންދަވާ މަސައްކަތްޕުޅުތަކަށް އިތުރު ކުރިއެރުމަށް އެދިވަޑައިގެންފައިވެއެވެ.
ދިވެހިރާއްޖެއާއި ތުރުކީއާ ދެ ގައުމުގެ ދެމެދުގައި ޒަމާންވީ ގާތްގުޅުމަށް އިޝާރާތްކުރައްވައި ރައީސް ވިދާޅުވީ، ރައީސް އުރުދުޣާންގެ ވެރިކަމުގައި އެ ގުޅުން އިތުރަށް ބަދަހިވެ، ދެގައުމުގެ ރައްޔިތުންގެ ލާބައާއި މަންފާއަށް އަދި އިސްލާމީ އުއްމަތަށް ދިވާމެފައިވާ ގޮންޖެހުންތައް ހައްލުކުރެއްވުމުގައި އެކުގައި މަސައްކަތްކުރައްވާނެ ކަމުގައި ޔަގީންކުރައްވާ ކަމަށެވެ.
ތުރުކީގެ އިންތިހާބު ކާމިޔާބު ކުރެއްވުމަށްފަހު އުރުދުޣާން ވިދާޅުވީ، އެއީ އިންގިލާބު ގެނަސްގެންނާއި އެނޫންގޮތްގޮތުން އޭނާ ވެރިކަމުން ވައްޓާލަން މަސައްކަތްކުރި ފަރާތްތަކަށާއި އެފަރާތްތަކުގެ ފަހަތުގައިވާ ގައުމުތަކަށް ލިބިގެންދިޔަ ވަރުގަދަ ފިލާވަޅެއްކަމަށެވެ.