ކުރީގެ ރައީސް މައުމޫނު އަބްދުލްގައްޔޫމްގެ ދަރިކަންބަލުން ޔުމްނާ މައުމޫނުގެ ފިރިކަލުން މުހައްމަދު ނަދީމް މައްޗަށް އުފުލާފައިވާ ޓެރަރިޒަމްގެ ދައުވާގައި ނަދީމާ ދެކޮޅަށްވެސް ސިއްރުހެކި ހުށަހަޅަން ބޭނުންވާކަމަށް ދައުލަތުން ބުނެފިއެވެ.
ދައުލަތުން މިހެން ބުނީ ނަދީމާއި ދެކޮޅަށް ކުރާ ޓެރަރިޒަމްގެ އަމަލެއް ކުރުމުގެ ދައުވާގައި ކްރިމިނަލް ކޯޓްގައި ބޭއްވި އިބްތިދާއީ އަޑުއެހުމުގައެވެ.
ޝާރީއަތާ ގުޅޭ ބައެއް ލިޔުންތަށް ހަވާލުކުރުމަށްފަހު ދައުލަތުން ބުނީ، ބައެއް ލިއުންތަކާއި ހެކިތައް ސިއްރުކުރަން ބޭނުންވާ ކަމުގައެވެ.
މިއަދުގެ ޝަރީއަތުގެ މަޖިލީހުގައި ނަދީމުގެ ފަރާތުންވަނީ 26 ހުށަހެޅުމެއް ހުށަހަޅާފައެވެ.
ކުއްލި ނުރައްކަލުގެ ހާލަތުގެ ދަށުން ހައްޔަރުކޮށް މިހާރު ޝަރީއަތް ނިމެންދެން ބަންދުގައި ބަހައްޓާފައިވާ ނަދީމުގެ މައްޗަށް ޓެރަރިޒަމްގެ ދައުވާގެ އިތުރުން ޤާނޫނާ ހިލާފަށް ސަރުކާރު ވައްޓާލަން އުޅުމުގެ ދައުވާއާއި ރިޝްވަތު ދިނުމުގެ ދައުވާވެސްވަނީ އުފުލާފައެވެ.