އަރަބި ޖަޒީރާގެ ގިނަ ގައުމުތަކުން ގުޅުންް ކަނޑާލައި ބާކީކޮށްލައިފައިވާ ގަތަރު، އަރަބި ޖަޒީރާ (އެރެބިއަން ޕެނިންސިއުލާ)އިންވެސް ވަކިކޮށްލަން ނިންމައިފިއެވެ.
ޝިބުހު އަރަބި ޖަޒީރާ ނުވަތަ އެރެބިއަން ޕެނިންސިއުލާގައި ހިމެނޭ ގައުމުތަކަކީ ގަތަރުގެ އިތުރުން ޔަމަނު، އޮމާން، ބަހްރައިން، ކުވައިތު، ސައުދީ އަރަބިއްޔާ، ޔުނައިޓެޑް އެރެބް އެމިރޭޓްސް އަދި އިރާގާއި އުރުދުންގެ ބައެކެވެ.
މީގެ ތެރެއިން، އަރަބި ޖަޒީރާގެ ހުޅަނގު އުތުރުގައި، ޕާޝިއަން ގަލްފް (ޚަލީޖް އަލް ފާރްސީ)ގައި އޮންނަ ގަތަރާ އެއްގަމުން ގުޅިފައި އޮންނަނީ ސައުދީ އަރަބިއްޔާ އެކަންޏެވެ.
ސައުދީ އަރަބިއްޔާއިން ނިންމާފައިވަނީ އެގައުމާއި ގަތަރާ އެއްގަމު މަގުން ގުޅޭ ސަރަހައްދީ ރޮނގުގައި ކެނަލްއެއް ކޮނުމަށެވެ. މިކަމުގެ ނަތީޖާއަކަށް ވާނީ ޝިބުހު އަރަބި ޖަޒީރާގެ މެއިންލޭންޑް ނުވަތަ މައި ބިމުން ގަތަރު ވަކިވެ، ވަކިން އޮންނަ ރަށަކަށް ވުމެވެ.
އެ ސަރަަހައްދުގައި ކެނަލްއެއް ކޮނުމަށް މިމަހު 25 ވަނަ ދުވަހު ބީލަަމަށްލާ ގޮތަށް ނިންމާފައިވާއިރު، ފަސް ކުންފުންޏަކުން ވަނީ އެކަަމަށް ޝައުުގުވެރިކަން ފާޅުކޮށްފައެވެ.
ސައުދީގެ މީޑިއާތަކުން ބުނީ އެ ޕްރޮޖެކްޓަށް 746 މިލިއަން ޑޮލަރު ހަރަދުކުރަން ނިންމާފައިވާ ކަމަށެވެ. އަދި އެ ކެނަލްގެ ދިގުމިނުގައި 600 ކިލޯ މީޓަރު، އަދި ފުޅާ މިނުގައި 200 މީޓަރު ހުންނާނެ ކަމަށެވެ.
ވިހި މީޓަރުގެ ފުން އެ ކަނަލްގައި އަސްކަރިއްޔާ ހަރަކާތްތެރިވާނެ ކަމަށާއި އަދި އެ ސަރަހައްދުގައި ޓޫރިސްޓް ހޮޓާތައްވެސް ހެދުމަށް ނިންމަައިފައިވާ ކަމަށް ސައުދީގެ މީޑިއާތަކުން ބުންޏެވެ.
އެ ސަރަހައްދުގައި ކެނެލްއެއް ހަދައި އަސްކަރީ މަރުކަޒެއް ހަދައި ނިއުކުލިއާ ވޭސްޓް އެތަނަށް ބޭރުކުރާނެ ކަމުގެ އިންޒާރު މިދިޔަ އޭޕްރީލް މަހު ސައުދީން ވަނީ ދީފައެވެ.
ސައުދީން ވަނީ ގަތަރާ ގުޅޭ ބޯޑަރުވެސް މިދިޔަ ޑިސެމްބަރު މަހު ބަންދުކޮށްފައެވެ. އަދި އެ ސަރަަހައްދުގައި އުޅުނު ގަތަރުގެ ޖަނަވާރުތައްވެސް ސައުދީން ވަނީ ބޭރުކޮށްލައިފައެވެ.
ގަތަރުން ޓެރެރިޒަމަށް ވާގިވެރިވާ ކަމަށް ބުނެ މިދިޔަ އަހަރު ސައުދީން ވަނީ އެ ގައުމާ ހުރިހާ ގުޅުންތަކެއް ވަނީ ކަނޑާލައިފައެވެ. ސައުދީގެ ނިންމުމާ އެކު، އަރަބި އިސްލާމީ ގިނަ ގައުމުތަކަކުންވެސް ވަނީ ގަތަރާ ގުޅުން ކަނޑާލައިފައެވެ.