ފިތުރު އީދާ ދިމާކޮށް ހަބޭސް އިން ބާޢްވާ ހަބޭސް އީދު ޝޯ ހޮނިހިރު ދުވަހުގެރޭ ބާއްވަން ނިންމައިފިއެވެ.
"ހަބޭސް އީދު ޝޯ، ޕަވާޑްް ބައި އޮފިޝަލް އިވެންޓްސް" އޮންނާނީ ހޮނިހިރު ދުވަހުގެރޭ ހުޅުމާލެ ސެންޓްރަލް ޕާކުގައެވެ.
ހަބޭސް އިން ބުނީ ހޮނިހިރު ދުވަހުގެރޭ ބާއްވާ މިއުޒިކް ޝޯގެ އިތުރުން އެދުވަހުގެ ހަވީރު ކުޑަކުދިންނަށް ޚާއްސަކޮށްގެން ސެންޓްރަލް ޕާކުގައި ހަރަކާތްތައް ކުރިއަށް ގެންދާނެ ކަމަށެވެ. "އޯޕަން މައިކް" ގެ ނަމުގައި ކުރިއަށް ގެންދާ މި އިވެންޓުގައި ބޭނުން ކޮންމެ ކުއްޖަކަށްވެސް ސްޓޭޖަށް އަރައި ހުނަރު ދައްކައިލުމުގެ ފުރުސަތު ލިބޭނެ ކަމަށް ހަބޭސް އިން ބުނެއެވެ.
އޯޕަން މައިކް ހަރަކާތުގައި ބައިވެރިވާން ބޭނުންކުދިން ހަބޭސް ގެ ފޭސްބުކް ޕޭޖަށް މެސެޖެއް ކޮށްލުމަށްވެސް ހަބޭސް އިން އެދެއެވެ.
ހޮނިހިރު ދުވަހުގެރޭ ބާއްވާ ޝޯއަކީ އެޗްޑީސީ އާއި ހަބޭސް ގުޅިގެން، ޔޫތް ސިޓީގެ "ޔޫތުންނަށް" ޚާއްސަކޮށްގެން ބާއްވާ ޝޯ އެކެވެ. ޝޯގައި ހަބޭސް ފިއުޝަން، ހަބޭސް ބޮޑުބެރު، ލެވިޓޭޝަން ބައި ހަބޭސް އަދި ޑީޖޭ އަލީގެ އިތުރުން ޓްރެފިކް ޖޭމްގެ ހުށަހެޅުންތައްވެސް އޮންނާނެއެވެ.
ހަބޭސް އީދު ޝޯ މިދިޔަ އަހަރު ބާއްވާފައިވަނީ މާލޭ ކާނިވާ ސަރަހައްދުގައެވެ.