އީޕީއެސް ކުރިން ހިންގި އިމާރާތް ހިންގަން އައިލެންޑާސް އެޑިއުކޭޝަންއަށް 25 އަހަރަށް ކުއްޔަށް ދޫކޮށްފިއެވެ.
އެޑިއުކޭޝަން މިނިސްޓްރީގައި އިއްޔެ މެންދުރު ބޭއްވި ރަސްމިއްޔާތުގައި އެ އެއްބަސްވުމުގައި އެޑިއުކޭޝަން މިނިސްޓްރީގެ ފަރާތުން ސޮއިކުރެެއްވީ ސްޓޭޓް މިނިސްޓަރު އަހުމަދު ޝަފީއުއެވެ. އަދި އައިލެންޑާސް އެޑިއުކޭޝަންގެ ފަރާތުން ސޮއިކުރެއްވީ އެ ކުންފުނީގެ ޗެއާމަން އަބްދުއް ރަޝީދެެވެ.
ދެހާސް އަށްވަނަ އަހަރު، ދިހަ އަހަރުގެ މުއްދަކަށް އެކުލަވާލި އެއްބަސްވުމެއްގެ ދަށުން އައިލެންޑާސް އެޑިއުކޭޝަނުން އިޕީއެސް ހިންގަމުންދިޔައީ އެ ސްކޫލުގެ ފައުންޑަރުންނާ ގުޅިގެންނެވެ. އައިލެންޑާސްއިން އީޕީއެސްގެ ފައުންޑަރުންނާ ގުޅިގެން އެ ސްކޫލު ހިންގީ " ބިލަބޮންގް ހައި އިންޓަނޭޝަނަލް އީޕީއެސް ސްކޫލު"ގެ ނަމުގައެވެ.
ނަމަވެސް އެ އެއްބަސްވުން މިއަހަރު ހަމަވާތީއާއެކު އެޑިއުކޭޝަން މިނިސްޓްރީން އެ ސްކޫލު ހިންގުމަށް މިދިޔަ އަހަރު ވަނީ އަލުން ބީލަމަށް ހުޅުވާލައިފައެވެ.
އައިލެންޑާސްއިން ބީލަން ކާމިޔާބުކުރިކަން އެޑިއުކޭޝަން މިނިސްޓްރީން ވަނީ މިދިޔަ އަހަރުގެ ނޮވެމްބަރު މަހު އިއުލާންކޮށްފައެވެ. އައިލެންޑާސް އިން އެެ ބީލަން ކާމިޔާބުކޮށްފައިވަނި އެހެން ތިން ފަރާތަކާ ވާދަކޮށްގެންނެވެ.