އާސެނަލްގެ ކޯޗު ކަމުގެ މަގާމުގައި 22 އަހަރު ހޭދަކުރުމަށްފަހު މި ސީޒަންގައި ޓީމު ދޫކޮށްލި ތަޖުރިބާކާރު ކޯޗު، އާސެން ވެންގާގެ މަގާމު ދެން ފުރާނެ ކޯޗަކީ މިދިޔަ ދެ ސީޒަންގައިވެސް ޕީއެސްޖީއަށް ކޯޗުކޮށްދިން އުނައި އެމެރީ ކަމަށް މީޑިއާ ރިޕޯޓުތައް ބުނެފިއެވެ.
ވެންގާ ނެތްތަން ފޫބައްދާނެ ކޯޗުންގެ ލިސްޓްގެ އެންމެ ކުރީގައި ކުރިން އޮތީ އާސެނަލްގެ ކުރީގެ ކެޕްޓަން މިކެލް އާޓެޓާގެ ނަން ނަމަވެސް ކްލަބުން ބޭއްވި ރެކްރޫޓްމަންޓަކާއެކު އުނައި އެމެރީ އެ މަގާމަށް ހޮވިފައިވާ ކަމަށް މީޑިއާތައް ބުނެއެވެ.
ސެވިއްޔާއާއެކު ޖެހިޖެހިގެން ތިން އަހަރު ޔޫރޮޕާ ލީގު ނެގުމަށްފަހު އުނައި އެމެރީ ޕީއެސްޖީއަށް ބަދަލުވީ 2016 ވަނަ އަހަރުގައެވެ. ޕީއެސްޖީއާއެކު މި އަހަރުގެ ފްރާންސް ލީގު ހޯދި ނަމަވެސް ޗެމްޕިއަންސް ލީގުގައި އެންމެ އެދެވޭ ކާމިޔާބީއެއް ހޯދައި ނުދެވުން އެމެރީއަށް ވަނީ ފާޑުކިޔުންތައް އަމާޒުވެފައެވެ. ޕީއެސްޖީއާއެކު އެމެރީ ހަދައިފައިވާ ކޮންޓްރެކް މި ސީޒަނުގެ ނިޔަލަށް ހަމަވާން އޮތް އިރު، މިދިޔަ މަސް ތެރޭގައި އެމެރީ އިއުލާން ކޮށްފައިވަނީ މި ސީޒަނަށްފަހު ޕީއެސްޖީ ދޫކޮށްލާނެ ކަމަށެވެ.
އާސެނަލްގެ ކޯޗުގެ މަގާމަށް ގިނަ ނަންތަކެއް ޝޯޓުލިސްޓް ވެފައިވާ އިރު، އޭގެ ތެރޭގައި އާޓެޓާ އަދި ކްލަބު ލެޖެންޑް ތިއެރީ އޮންރީވެސް ހިމެނެއެވެ. މީގެ އިތުރުންވެސް ޔުވެންޓަސްގެ ކޯޗު މަސިމިލިއާނޯ އަލެގްރީއާއި ކުރިން ޗެލްސީއަށް ކޯޗުކޮށްދިން ކާލޯ އެންސެލޯޓީވެސް އާސެނަލްގެ ކޯޗުގެ މަގާމަށް ޝޯޓް ލިސްޓް ކުރެވިފައިވެއެވެ.
މީޑިއާތައް ބުނާ ގޮތުން އާސެނަލަށް ކޯޗަކު ހޯދުމަށް ހިންގި ރެކްރޫޓްމަންޓްގައި ކޯޗަކު ނަގަން އިންޓަވިއު ކޮށްފައިވަނީ ކްލަބު ޗީފް އެގްޒެކެޓިވް އިވާން ގަޒީޑިސްގެ އިތުރުން ފުޓުބޯލް ރިލޭޝަންސް ހެޑް ރައުލް ސަންލޭހީއާއި ރެކްރޫޓްމަންޓް ހެޑް ވޭން މިސްލިންޓެންޓެވެ.
ރެކްރޫޓްމަންޓް ޕެނަލުން އުނައި އެމެރީ ހިޔާރުކުރި ނަމަވެސް އެންމެފަހުގެ ނިންމުން ނިންމާނީ ކްލަބުގެ މައި ހިއްސާދާރު އަދި އޯނަރު ސްޓޭން ކްރޮއެންކީއެވެ.