ސްރީލަންކާގެ ގައުމީ ބޭންކް، ބޭންކް އޮފް ސިލޯނުގެ ގޮތްޕެއް ހުޅުމާލޭގައި ހުޅުވަން ނިންމައިފި އެވެ.
ރާއްޖޭގައި މިވަގުތު ހުންނަނީ ބޭންކް އޮފް ސިލޯނުގެ އެންމެ ބްރާންޗެކެވެ. އެއީ މާލޭ ބޮޑުތަކުރުފާނުމަގުގައި، ބޭންކް އޮފް މޯލްޑިވްސްއާ ޖެހިގެން ހުންނަ އިމާރާތުގަ އެވެ.
ބޭންކް އޮފް ސިލޯނުން ރާއްޖޭގައި ގާއިމުކުރާ ދެވަނަ ގޮފި ގާއިމުކުރަނީ ހުޅުމާލޭގައި އަމީން ކޮންސްޓްރަކްޝަނުން ހަދަމުންދާ "އަމީން އެވެނިއު"ގެ ކޮމާޝަލް ބްލޮކުގަ އެވެ. ބޭންކް އޮފް ސިލޯނާއި އެޗްޑީސީއާ ދެމެދުގެ އެއްބަސްވުމުގައި ވަނީ ސޮއިކޮށްފަ އެވެ.
ބޭންކް އޮފް ސިލޯނު މާލޭ ބްރަންޗަށް މިދިޔަ އަހަރު އާމްދަނީގެ ގޮތުގައި 167.5 މިލިޔަން ރުފިޔާ ލިބުނު އިރު، ޓެކްސްގެ ގޮތުގައި ދައުލަތަށް 48.35 މިލިޔަން ރުފިޔާ ދައްކާފައިވެ އެވެ.
ބޭންކް އޮފް ސިލޯން ރާއްޖޭގައި ހުޅުވީ 1981 ވަނަ އަހަރުގަ އެވެ. ރާއްޖޭގައި ހިންގާ ބޭރުގެ އެހެން ބޭންކުތަކަކީ ސްޓޭޓް ބޭންކް އޮފް އިންޑިއާ، ހަބީބް ބޭންކް، އެޗްއެސްބީސީ އަދި މޮރީޝަސް ކޮމާޝަލް ބޭންކެވެ.
ރާއްޖޭގައި ދެން ހަރަކާތްތެރިވާ ބޭންކުތަކަކީ ބޭންކް އޮފް މޯލްޑިވްސްގެ އިތުރުން ދިވެހި ސަރުކާރާއި އައިސީޑީ ގުޅިގެން އުފެއްދި މޯލްޑިވްސް އިސްލާމިކް ބޭންކް، އަދި ޓްރީޓޮޕް އިންވެސްޓްމެންޓްސް އާއި ސްރީލަންކާގެ ކޮމާޝަލް ބޭންކް އޮފް ސިލޯން ގުޅިގެން އުފައްދާފައިވާ ކޮމާޝަލް ބޭންކް އޮފް މޯލްޑިވްސް އެވެ.