އާސެނަލްގެ ކޯޗުކަމުގައި އާސެން ވެންގާ ހުންނަތާ މިއީ 22 ވަނަ އަހަރެވެ. ގިނަ ދުވަސްތަކެއް އާސެނަލްގައި ހޭދަކުރުމަށްފަހު، ވެންގާ ވަނީ މިސީޒަން ނިމުމުން އާސެނަލް ދޫކޮށްލާނެ ކަމަށް ބުނެފައެވެ.
އާސެނަލްއާއެކު އޭނާ ހޭދަކުރި ފުރަތަމަ ދުވަސްތައް ވަރަށް ކާމިޔާބެވެ. ހާއްސަކޮށް ވެންގާ ފާހަގަކޮށްލެވުނީ އާސެނަލަށް އާމްދަނީ އިތުރުކޮށް، އެއް ލެވެލްއެއްގައި އިނގިރޭސި އެންމެ މަތީ ފުޓުބޯޅައިގައި އާސެނަލްގެ ނަން ހަރުކޮށްލި މީހެއްގެ ގޮތުގައެވެ.
އާސެނަލްގެ ފަރާތުން ވެންގާއަށް ދިން ވަދާއުގެ ތެރެއިން --- ފޮޓޯ/ އޭޕީ
ވެންގާއާއެކު އާސެނަލުން ވަނީ 2004-2003 ވަނަ އަހަރުގެ ލީގު ނަގައިފައެވެ. އެއީ އެއްވެސް މެޗަކުން ބަލިނުވެއެވެ. ޕްރިމިއާ ލީގުގެ މި އެރާގައި އާސެނަލަކީ ބަލިނުވެ ލީގު ނެގި ހަމައެކަނި ޓީމެވެ.
އާސެނަލާއެކު ވެންގާ ހޭދަކުރި ރަންް ދުވަސްތައް މަޑުޖެހިލީ އެހާ ހިސާބުންނެވެ. އެގޮތުން 2005 ވަނަ އަހަރުގެ އެފްއޭ ކަޕް އުފުލާލި ފަހުން އެޓީމަށް ދެން ތަށްޓެއް ލިބުނީ ނުވަ އަހަރު ފަހުންނެވެ. އަދި 2004 ވަނަ އަހަރަށްފަހު ވެންގާއާއެކު އާސެނަލަށް ލީގުވެސް ކާމިޔާބު ކުރެވިފައެއް ނުވެއެވެ.
އާސެނަލްގެ ފަރާތުން ވެންގާއަށް ދިން ވަދާއުގެ ތެރެއިން --- ފޮޓޯ/ އޭޕީ
މިދިޔަ ސީޒަނަކީ ވެންގާގެ އިރުޝާދުގެ ދަށުން އާސެނަލަށް ޗެމްޕިއަންސް ލީގުގެ ފުރުސަތު ގެއްލުނު ފުރަތަމަ ސީޒަނެވެ. އަންނަ ސީޒަންގައިވެސް އާސެނަލަށް އެ މަގާމު ގެއްލިފައިވާ އިރު، އާސެނަލްގެ ގިނަ ސަޕޯޓަރުންތަކެއް ވަނީ ވެންގާ ބޭރު ކުރުމަށް ގޮވައިލައިފައެވެ. ހާއްސަކޮށް މިދިޔަ ސީޒަންގެ ފަހުކޮޅުގައި ވެންގާ ބޭރު ކުރުމަށް ގޮވައި، އާސެނަލްގެ ސަޕޯޓަރުން ވަނީ ކްލަބުގެ ބޯޑާ ދެކޮޅަށް އިހުތިޖާޖުވެސް ކޮށްފައެވެ.
އިނގިރޭސި ޕްރިމިއާ ލީގުގައި ރޭ އާސެނަލާއި ބާންލީ ވާދަކުރި މެޗަކީ ވެންގާގެ އެންމެ ފަހު ހޯމް މެޗެވެ. މެޗުގެ ކުރިން ވެންގާއަށް ހާއްސަ ވަދާއެއް ދީފައިވާ އިރު، އޭނާ ވަނީ އަސަރާއެކު ސަޕޯޓަރުންނާ ވާހަކަ ދައްކައިފައެވެ.
އާސެނަލްގެ ފަރާތުން ވެންގާއަށް ދިން ވަދާއުގެ ތެރެއިން --- ފޮޓޯ/ އޭޕީ
އާސެނަލްގައި އޭނާ ހޭދަކުރި ހުރިހާ ދުވަސަތަކަށް ސަޕޯޓަރުންގެ ކިބައިން ވެންގާ ޝުކުރު އަދާކޮށްފައިވާ އިރު، އޭނާގެ ވާހަކަކޮޅު ނިންމާލަމުން ބުނީ "ހުރިހާ ސަޕޯޓަރުންގެ މަތިންވެސް ވަރަށް ހަނދާން ވާނެ،" މިހެންނެވެ. ދަނޑު މައްޗަށް ހާއްސަ ގާޑް އޮފް އޮނާއަކާއެކު އެރި ވެންގާއަކީ އިނގިރޭސި ލީގުގައިވެސް ލެޖެންޑެކެވެ.
ރޭގެ މެޗު އާސެނަލުން 5-0ގެ ނަތީޖާއަކުން ކާމިޔާބުކުރި ނަމަވެސް، އަންނަ ސީޒަންގެ ޗެމްޕިއަންސް ލީގު ޖާގަ އެޓީމަށް ނުލިބޭނެއެވެ. އަދި ވެންގާގެ ފަހު ސީޒަން ނިންމާލަން ޖެހުނީ ހުސް އަތާއެވެ.