ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަން ވައްޓާލަން އުޅުމުގެ އިތުރުން ވެސް ބޮޑެތި ތުހުމަތުތަކެއްގައި ހައްޔަރުކޮށްފައިވާ ކުރީގެ ރައީސް މައުމޫން އަބްދުލްގައްޔޫމްގެ ސަރީއަތުގެ އަޑުއެހުމުގައި މިއަދު ވެސް އެދިވަޑައިގަތީ އެމަނިކުފާނަކީ މައުސޫމް ބޭފުޅެއް ކަމަށާއި ބަންދުން ދޫކޮށްލަ ދިނުމަށް ނޫނީ ގޭ ބަންދަށް ބަދަލުކޮށްދިނުމަށެވެ.
ރައީސް މައުމޫނުގެ މައްޗަށް އުފުލާފައިވާ ދައުވާތަކުގެ ތެރެއިން މިއަދު އޮތީ ޓެރެރިޒަމްގެ އަމަލެއް ހިންގުމުގެ ކުށުގެ ތުހުމަތުގައި ކުރިއަށްގެންދާ ޝަރީއަތެވެ. ވަކީލަކު އައްޔަނު ކުރުމަށް ދެ ދުވަސް ދެއްވި އެ ޝަރީއަތުގެ މަޖިލީހުގައި ވެސް މައުމޫން ވަނީ އެމަނިކުފާނު ކުށެއް ނުކުރައްވާ ކަމަށް ވިދާޅުވެ ބަންދުން ދޫކޮށްލުމަށް ގާޒީ އަހްމަދު ހައިލަމްއަށް ދަންނަވައިފައެވެ.
މައުމޫން ވިދާޅުވީ މައްސަލައިގެ ބާވަތުން ނަމަވެސް ބަންދުން އެއްކޮށް ދޫކޮށްލެވެން ނެތް ނަމަ ގޭ ބަންދަށް ބަދަލުކޮށްދިނުމަށެވެ. ސަބަބެއްގެ ގޮތުގައި މައުމޫން ފާހަގަކުރެއްވީ އެމަނިކުފާނަކީ އުމުރުން ދުވަސްވީ މީހެއްގެ އިތުރުން ސިއްހީ ގޮތުން ދީމާވެފައިވާ ކަންތައްތަކުގެ ސަބަބުން އެކަނި އޮތުމަކީ ރައްކާތެރިކަމެއް ނޫން ކަމަށް ޑޮކްޓަރުން ލަފާދެއްވާފައިވާތީ ކަމަށެވެ.
ރިމާންޑް ޖަލެއްގައި ބަންދުކޮށްފައި ބެހެއްޓުމުގެ އަމުރެއް ރައީސް މައުމޫނުގެ މައްޗަށް ކޮށްފައިވީ ނަމަވެސް އެމަނިކުފާނުގެ ހާލަތަށާއި ކުރީގެ ރައީސެއް ކަމަށް ވުމުން ހާއްސަ ހާލަތެއްގެ ދަށުން ކަސްޓޯޑިއަލް ޖަލެއްގެއި ބަހައްޓަވާފައި ހުންނަކަން ފާހަގަކޮށް ގާޒީ ހައިލަމް ވިދާޅުވީ މައުމޫނާ ދޭތެރޭގައި ހާއްސަ އުސޫލެއްގެ ތެރެއިން ލުއި ގޮތްތަކެއް ހަމަޖައްސައިދެއްވާފައިވާ ކަން ޕީޖީގެ އިތުރުން އެމަނިކުފާނު ބަންދުގައި ހުންނަ މުއައްސަސާއިން ވެސް އަންގާފައިވާ ކަމަށެވެ.
އެގޮތުން ރައީސް މައުމޫން ހުންނަވަނީ ފުލުހުންގެ ބަންދުގައި މާފުށީ ކަސްޓޯޑިއަލްގައިކަން ފާހަގަކޮށް ގާޒީ ހައިލަމް ވިދާޅުވީ ކުށުގެ ތުހުމަތުގައި ހުންނަ އެހެން ފަރާތްތަކާ ހިލާފަށް މައުމޫން ބޭނުންފުޅު ކޮންމެ ވަގުތެއްގައި ބަންދުކޮށްފައި ހުންނަ ތަނުން ބޭރަށް ނުކުތުމުގެ ފުރުސަތު އޮންނަ ކަމަށާއި އެހީތެރިކަން ބޭނުންވާ ކޮންމެ ގަޑިއެއްގައި އެހީތެރިކަން ފޯރުކޮށްދެމުންދާ ކަމަށް ބަންދުގައި ބަހައްޓާފައި ހުންނަ މުއައްސަސާއިން ކޯޓަށް އަންގާފައިވާ ކަމަށެވެ.
އަދި ކެއިން ބުއިމާއި އެހެނިހެން ކަންކަން ކުރުމަށް ބޭނުންވާ ގޮތްތައް އެންގުމުގެ ފުރުސަތުގެ އިތުރުން ގަވާއިދުން އާއިލީ ބައްދަލުވުންތައް ވެސް ދެއްވަމުން ގެންދަވާ ކަމަށް ފުލުހުންނާ ހަވާލާދެއްވާ ގާޒީ ވިދާޅުވިއެވެ.
ރައީސް މައުމޫންއާ ދޭތެރޭގައި ހާއްސަ އުސޫލަކުން ކަންތައްތައް ކުރައްވަމުން ގެންދަވާކަން ގާޒީ ފާހަގަކުރެއްވުމުން މައުމޫން ވަނީ އެކަމަށް އެއްބަސްވެވަޑައިގެން އެ ފަރާތްތަކަށް ޝުކުރު ދަންނަވައިފައެވެ. އަދި ދެން އޮންނަ ޝަރީއަތެއްގައި އެމަނިކުފާނަށް ދިމާވެފައިވާ ދަތިތަކުގެ ތަފްސީލް ވަކީލުން މެދުވެރިކުރައްވައި ހިއްސާކުރައްވާނެ ކަމަށްވެސް ވިދާޅުވިއެވެ.
މިއަދުގެ ޝަރީއަތުގައި ކޮއްޅަށް ހުންނަވައިގެން މައުމޫން ވާހަކަ ކުރިއަށް ގެންދަވާތީ ގާޒީ ހައިލަމް ވަނީ އެމަނިކުފާނު އިށީންނަވައިގެން އިންނަވައި ވާހަކަފުޅު ކުރިއަށް ގެންދިއުމަށް ދަންނަވައިފައެވެ. ނަމަވެސް މައުމޫން ވިދާޅުވީ އެމަނިކުފާނު ވާހަކަފުޅު ދައްކަވާނީ ކޮއްޅަށް ހުންނަވައިގެން ކަމަށް ވިދާޅުވެ ވާހަކަފުޅު ކުރިއަށްގެންގޮސް ނިންމަވާލިއެވެ.