ކްލަބު ގްރީން ސްޓްރީޓްސް، މިއަދު ފުރަތަމަ ޑިވިޝަންގައި ކުޅެމުންދަނީ އޭނާ ކުރި މަސައްކަތުން ކަމަށް ކްލަބު ވެލެންސިއާގެ ކޯޗު ސޮބާހު މުހައްމަދު (ސޮބާ) ބުނެފިއެވެ.
ގްރީން ސްޓްރީޓްސް ފުރަތަމަ ޑިވިޝަނަށް ޕްރޮމޯޓްވީ މިދިޔަ ސީޒަނުގައެވެ. ސޮބާއާއެކު އެޓީމު ވަނީ އޭގެ ކުރީ އަހަރު ދެވަނަ ޑިވިޝަންގެ ތަށި އުފުލާލައިފައެވެ. އަދި މިދިޔަ ސީޒަންގައި ސޮބާއާއެކު މާލޭ ލީގުގެ ދެވަނަ ހޯދައި، ޕްރިމިއާ ލީގަށް ގްރީން ކޮލިފައި ކޮށްދިނުމުގައިވެސް ސޮބާގެ ދައުރު ބޮޑެވެ.
މި ހަފްތާގެ މާލޭ ލީގުގައި ކްލަބު ވެލެންސިއާއިން ގްރީންއާ ދެކޮޅަށް ކުޅުނު މެޗަކީ ކްލަބު ވެލެންސިއާގެ ކޯޗުކަމާ ސޮބާ ހަވާލުވިފަހުން ގްރީންއާ ދެކޮޅަށް ނުކުތް ފުރަތަމަ މެޗެވެ.
މެޗަށްފަހު ސޮބާ ބުނީ ގްރީންގެ ސަޕޯޓަރުން އޭނާގެ މަސައްކަތް ބަލައިނުގަތް ނަމަވެސް ފުރަތަމަ ޑިވިޝަންގައި ގްރީން ކުޅެމުންދަނީ އޭނާގެ ވެސް މަސައްކަތުން ކަމަށެވެ.
"ފާހަގަކޮށްލަން ބޭނުންވޭ މެޗު ކުޅެމުން ދިޔައިރު އަޅުގަނޑާ ދިމާއަށް ނިސްބަތްކޮށް ގްރީން ސްޓްރީޓްސްގެ ސަޕޯޓަރުން އެ ގޮވަމުން އައި އެއްޗެހި. އެއްވެސް މައްސަލައެއް ނެތް. މިއަދު ވަރަށް ހެވިލާފަ މި ބުނަނީ އަޅުގަނޑު ކޮށްދިން މަސައްކަތުންނޭ މިއަދު ގްރީން ސްޓްރީޓްސް ފުރަތަމަ ޑިވިޝަންގައި އެ ކުޅެނީ،" ސޮބާ ބުންޏެވެ.
އެވަރު ނުދަންނަ، އެވަރު ބަލައި ނުގަންނަ ބަޔަކު މިއަދު މޮޅުވިޔަސް ކުރިމަގުގައި ވަރަށް ބޮޑެތި އުނދަގޫތަކާ ކުރިމަތިލާން ޖެހޭނެ. ކުރާ މަސައްކަތުގެ އަގު ވަޒަން ކުރަން އެބަ ޖެހޭ،
ސޮބާ ބުނީ ސަޕޯޓަރުންގެ ފަރާތުން ފެނިގެންދިޔައީ ދަށު ދަރަޖައިގެ ކަންތައްތަކެއް ކަމަށާއި، އެކަމަކީ ހިތާމަކުރާ ކަމެއް ކަމަށެވެ. އެހެން ނަމަވެސް އުފާވާން ޖެހެނީ އޭނާ ވަރަށް ރަނގަޅަށް ގްރީން ސްޓްރީޓްސްއާއެކު ކުރި މަސައްކަތުން މިއަދު ފުރަތަމަ ޑިވިޝަންގައި ގްރީން ކުޅޭތީ ކަމަށްވެސް ސޮބާ ފާހަގަކުރިއެވެ.
ގްރީން ސްޓްރީޓްސް އަތުން 5-0ގެ ނަތީޖާއަކުން ބަލިވުމާއެކު ވެލެންސިއާއަށް ލީގުގެ ފުރަތަމަ ބުރު ނިންމާލަން ޖެހުނީ ތާވަލުގެ ފުލުގައެވެ. ކުޅުނު ހަ މެޗުން ވެލެންސިއާއަށް ލިބުނީ ޕޮއިންޓެކެވެ. މި ބުރުގައި ވެލެންސިއާއަށް ބާކީ އޮތް މެޗަކީ ނިއު ރޭޑިއަންޓް ސްޕޯޓްސް ކްލަބާ ދެކޮޅަށް ކުޅޭ މެޗު އެކަންޏެވެ.
ގްރީން އަތުން ބޮޑު ތަފާތަކުން ބަލިވި މެޗާ ގުޅޭގޮތުން ސޮބާ ބުނީ ވެލެންސިއާގެ ކުޅުންތެރިންގެ ފަރާތުން މެޗުގައި ފެނިގެންދިޔައީ ވަރަށް އާދައިގެ ގޯސްތަކެއް ކަމަށާއި، ކުޅުންތެރިންގެ ފަރާތުން "ކޮމިޓްމަންޓް" ފެނުނީ ވަރަށް ދަށްކޮށް ކަމަށެވެ.
"މިއަދު ހަމަ ފެނުނީ ވަރަށް ދަށްކޮށް ފެށިތަން. މިކަހަލަ މެޗެއްގައި ބޭސިކް މިސްޓޭކްތަކެއް ފެނިގެން ނުވާނެ. މި ނުކުންނަނީ މަރުގެ މެޗުތަކަށް. ޓީމުގައި ތިބި ސީނިއާ ކުޅުންތެރިންވެސް އެކަން ނުވިސްނާ ކަމަށް ވަންޏާ ވަރަށް އުނދަގޫވާނެ. ބޭރުން އިރުޝާދު ދެވޭނީ. ގޭމް ޕްލޭންވެސް ހަދާފަ އެރުވޭނީ. އެކަމަކު ކުޅުންތެރިން ގައިގައިވެސް އެ ކޮމިޓްމަންޓް ހުންނަން ޖެހޭނެ،" ސޮބާ ބުންޏެވެ.
ގްރީންގެ ކުޅުމާ މެދު އެޓީމުގެ ކޯޗު އަލީ ސުޒޭން ބުނީ، މެޗުން މޮޅުވެ ގްރީންއަަށް ނޭވައެއް ލުމަށް ފުރުސަތު ލިބިއްޖެ ކަމަށެވެ. އަދި ލީގުގެ ދެވަނަ ބުރަށް ނުކުންނަ އިރު، ޓީމު ވަރަށް ބޮޑަށް ސަމާލުވާން ޖެހޭ ކަމަށެވެ. އަދި ގްރީނުން ދެވަނަ ބުރު ފަށަން އޮތީ ނިއުއާ ދެކޮޅަށް ކުޅޭ މެޗުން ކަން ވިސްނަންވާނެ ކަމަށްވެސް ސުޒޭން ބުންޏެވެ.
ގްރީނުން މާލޭ ލީގުގެ ފުރަތަމަ ބުރު ނިންމާލީ ހަތް މެޗުން ލިބުނު އަށް ޕޮއިންޓާއެކު ހަ ވަނައިގައެވެ.