އެހެން ކުދިންގެ ފަރާތުން ގަނާލިބުމުގެ އަދި ފުރައްސާރައިގެ ޝިކާރަ އަކަށްވެގެން ޖެންޑާ މިނިސްޓްރީއަށް ރިޕޯޓްކުރި މައްސަލަތައް، މަހެއްގެ ތެރޭގައި ތިން ގުނަ އިތުރުވެއްޖެ އެވެ.
ކޮންމެ މަހެއްގައި ވެސް ޖެންޑާ މިނިސްޓްރީއަށް ރިޕޯޓްކޮށް އެޓެންޑްކޮށްފައިވާ މައްސަލަތަކުގެ ތަފްސީލް އެ މިނިސްޓްރީން ހާމަކުރަމުންދާއިރު، މިދިޔަ މާރިޗް މަހު އެ މިނިސްޓްރީއަށް ޖުމްލަ 217 މައްސަލައެއް ވަނީ ރިޕޯޓް ކޮށްފައެވެ.
އެގޮތުން، ޖެންޑާ މިނިސްޓްރީއަށް ކޮންމެ މަހެއްގައި ވެސް އެންމެ ގިނައިން ހުށަހެޅޭ ކުޑަކުދިންނަށް ކުރާ އެކި ބާވަތުގެ އަނިޔާގެ މައްސަލަތަކަށް ބަލާއިރު އެ ބާވަތުގެ 125 މައްސަލަ އެއް ވަނީ މިދިޔަ މަހު ހުށަހަޅައިފައެވެ. ފެބްރުއަރީ މަހުގެ ތެރޭގައި ހުށަހެޅިފައިވަނީ އެފަދަ 117 މައްސަލަ އެކެވެ.
އެ މައްސަލަތަކުގެ ތެރެއިން ފެބްރުއަރީ މަހާ އަޅާބަލާއިރު މާރިޗު މަހުގެ ތެރޭގައި އެންމެ ގިނައިން ރިޕޯޓް ކޮށްފައިވަނީ، ނަފްސާނީ ހާނިއްކައިގެ މައްސަލަ ތަކާއި އެހެން ކުދިންގެ ފަރާތުން ގަނާލިބުމުގެ އަދި ފުރައްސާރައިގެ ޝިކާރަ އަކަށްވުމުގެ މައްސަލަތައް އަދި އިހުމާލުވުމުގެ މައްސަލަތަކެވެ.
އެގޮތުން ފެބްރުއަރީ މަހުގެ ތެރޭގައި ނަފްސާނީ ހާނިއްކައިގެ ނުވަ މައްސަލައެއް ހުށަހެޅުނުއިރު، މިދިޔަ މަހު ހުށަހެޅުނު އެފަދަ މައްސަލަތަކުގެ އަދަދު ވަނީ 22 އަށް އިތުރުވެފައެވެ.
އަދި އެހެން ކުދިންގެ ފަރާތުން ގަނާލިބުމުގެ އަދި ފުރައްސާރައިގެ ޝިކާރަ އަކަށްވުމުގެ ފަސް މައްސަލައެއް ފެބްރުއަރީ މަހު ހުށަހެޅުނުއިރު، މާރިޗު މަހުގެ ތެރޭގައި ހުށަހެޅިފައިވަނީ އެފަދަ 15 މައްސަލައެކެވެ. އެއީ އެފަދަ ފެބްރުއަރީ މަހާ އަޅައިބަލާއިރު ތިން ގުނަ އިތުރު އަދަދެކެވެ.
އިހުމާލުވުމުގެ މައްސަލަތަކަށް ބަލާއިރު ފެބްރުއަރީ މަހު 18 މައްސަލައެއް ޖެންޑާއަށް ހުށަހެޅުނުއިރު މާރިޗް ވަނީ އެފަދަ އިތުރު ނުވަ މައްސަލައެއް ހުށަހެޅިފައެވެ.
ނަމަވެސް ފެބްރުއަރީ މަހާ އަޅާބަލާއިރު، ކުޑަކުދިންނަށް ކުރި ޖިންސީ އަދި ޖިސްމާނީގެ މައްސަލަތަކާއި ސައިބާ ބުލީންގެ މައްސަލަތައް ރިޕޯޓްކުރި މިންވަރު މާރިޗު މަހު ވަނީ މަދުވެފައެވެ.
އެގޮތުން ޖިސްމާނީ ހާނިއްކައިގެ 30 މައްސަލައެއް ފެބްރުއަރީ މަހު ހުށަހެޅުނުއިރު، މިދިޔަ މަހު ހުށަހެޅިފައިވަނީ އެފަދަ 27 މައްސަލައެކެވެ. އަދި ސައިބާ ބުލީންގެ ފަސް މައްސަލައެއް ފެބްރުއަރީ މަހު ހުށަހެޅުނު ނަމަވެސް މިދިޔަ މަހު ހުށަހެޅިފައިވަނީ އެންމެ މައްސަލައެކެވެ.
ކުޑަކުދިންނަށް ކުރާ އަނިޔާތަކުގެ ތެރެއިން އެންމެ ބޮޑަށް ދަށްވެފައިވަނީ ޖިންސީ ހާނިއްކައިގެ މައްސަލަތައް ރިޕޯޓްކުރި މިންވަރެވެ. އެގޮތުން ފެބްރުއަރީ މަހު ޖިންސީ ހާނިއްކައިގެ 44 މައްސަލައެއް ރިޕޯޓްކުރިއިރު، މާރިޗް މަހު އެފަދަ މައްސަލަތައް ރިޕޯޓްކުރި މިންވަރު ވަނީ 23 އަށް މަދުވެފައެވެ. އެއީ ގާތްގަނޑަކަށް ދެ ގުނައިގެ ދަށްވުމެކެވެ.
މިދިޔަ މަހުގެ ތެރޭގައި ހައްގުތަކުން ކުޑަކުދިން މަހުރޫމް ކޮށްގެން ޖުމްލަ ހަތަރު މައްސަލައެއް ވަނީ ޖެންޑާއަށް ހުށަހެޅިފައެވެ. އެއީ ތައުލީމަށް ހުރަސް އެޅުމުގެ ދެ މައްސަލައަކާއި އުފަންވުން ރަޖިސްޓްރީ ނުކުރުމާބެހޭ މައްސަލަ އެއްގެ އިތުރުން ސިއްހީ ފަރުވާއަސް ހުސްއެޅުމުގެ މައްސަލައެކެވެ.
ކުށް ކުރާ ކުޑަކުދިންނަށް ބަލާއިރު، މިދިޔަ މަހު އެކި ބާވަތުގެ ކުށް ކުރާ ކުޑަކުދިންގެ 12 މައްސަލައެއް ހުށަހެޅިފައިވާއިރު އެ ފަދަ މައްސަލަތަކުގެ ތެރޭގައި ވައްކަންކުރުމުގެ ހަ މައްސަލައެއް ހިމެނެ އެވެ.
ޖެންޑާ މިނިސްޓްރީން ބުނީ، މިދިޔަ މަހު ކުޑަކުދިންގެ އަހުލާގީ މައްސަލަތަކުގެ 12 މައްސަލަ އެއް ހުށަހެޅިފައިވާ ކަމަށެވެ. އޭގެ ތެރޭގައި ހިމެނެނީ ގެއިން ނުކުމެގެން ދިޔުމުގެ ފަސް މައްސަލައަކާއި ސައިބާ ބުލީ ކުރުމުގެ ތިން މައްސަލައެއް އަދި ރުޅިގަދަވެގެން އުޅުމުގެ ދެ މައްސަލަ އަކާއި ސްކޫލަށް ދާން ބޭނުން ނުވުމުގެ ދެ މައްސަލަ އެކެވެ.