އިކޮނޮމިކް މިނިސްޓްރީގެ ޑެޕިއުޓީ މިނިސްޓަރުގެ މަގާމަށް، މޯލްޑިވްސް ރޯޑް ޑިވެލޮޕްމެންޓް ކޯޕަރޭޝަން (އެމްއާރުޑީސީ)ގެ ޑެޕިއުޓީ މެނޭޖިންގް ޑިރެކްޓަރު އަހްމަދު މަމްދޫހު އައްޔަނުކޮށްފިއެވެ.
ރައީސް އޮފީހުން ބުނީ، އިކޮނޮމިކް މިނިސްޓަރުގެ ނައިބުގެ މަގާމަށް މއ. އެރަލްސީ އަހްމަދު މަމްދޫހު އައްޔަނުކުރެއްވީ މިއަދު ކަމަށެވެ.
އަހްމަދު މަމްދޫހަކީ އެމްއާރުޑީސީގެ ޑެޕިއުޓީ އެމްޑީގެ މަގާމުގައި ހުންނަވައި، އެކްޓިންގް މެނޭޖިންގް ޑިރެކްޓަރުގެ ގޮތުގައި އެކުންފުނި ހިންގެވުމުގެ މަސައްކަތްވެސް ކުރެއްވި ބޭފުޅެކެވެ.
އެމްއާރުޑީސީން ވަނީ އެކުންފުނި އުވާލުމުގެ މަސައްކަތް މިހާރު ފަށައިފައެވެ.
އެކުންފުނިން މިދިޔަ މަހުގެ ތެރޭގައި މިކަން ރަސްމީކޮށް ހާމަކުރި ނަމަވެސް، ކުންފުނި އުވާލާ ސަބަބެއް ހާމަކޮށްފައެއް ނުވެއެވެ. އެމްއާރުޑީސީގައި މަސައްކަތްކުރި މުވައްޒަފުން ވަނީ ހައުސިންގް މިނިސްޓްރީގެ ޕަބްލިކް ވޯކްސް ސެކްޝަނަށް ބަދަލުކޮށްފައެވެ.
މަމްދޫހުއާ އެކު، އިކޮނޮމިކް މިނިސްޓްރީގެ ނައިބުންގެ ގޮތުގައި ފަސް ބޭފުޅަކު ތިއްބަވާނެއެވެ.